Jerbal
18 Ãlikin men in, ear ilo̦k jãn Atens im itok ñan Korint, 2 im ear iioone juon ri-Ju ijin etan Akula. L̦ein ej jãn Pontõs im erro kõrã eo pãleen etan Prisilla rej kab itok jãn Itali kõnke Klaudiõs ear kakien aolep ri-Ju ro bwe ren em̦m̦akũt jãn Rom. Kõn men in, Paul ear etal ñan ippãerro, 3 im kõnke juon wõt aerjel jerbal, ear jokwe ippãerro im jerbal ippãerro kõnke erjel aolep rej ri-kõm̦m̦an em̦ nuknuk. 4 Im aolep Jabõt* ekõn kwal̦o̦k juon katak* ilo im̦õn kabuñ eo ijo im kareel ri-Ju ro im ri-Grik ro.
5 Ke Sailas im Timote rar tõpartok ijo jãn Masedonia, ear l̦apl̦o̦k wõt an Paul kwal̦o̦k kõn ennaan eo. Ear kwal̦o̦k naan ñan ri-Ju ro im kam̦ool bwe Jesus ej Christ. 6 Bõtab kõn wõt an jab bõjrak aer jum̦aiki im kwal̦o̦k naan ko reddo ñane, ear pikpikũri nuknuk ko an im ba ñan er: “Ñe jabdewõt men enaaj wal̦o̦k ñan kom̦, enaaj ruomi make, eban ruõ.* Jãn kiiõ im ilo̦k, inaaj etal ñan ippãn armej in aelõñ ko.” 7 Innem ear etal jãn ijo* im etal ñan m̦weo im̦õn juon em̦m̦aan etan Titius Jõstõs, juon eo ej kabuñ ñan Anij, im m̦weo im̦õn ej atartar ippãn im̦õn kabuñ eo. 8 Im Krispõs, em̦m̦aan eo ej bõk eddon im̦õn kabuñ eo, ear erom juon iaan rũttõmak ro an Irooj, e im aolep ro ilo m̦weo im̦õn. Elõñ iaan ri-Korint ro rar roñjake ennaan eo rar jino aer tõmak im rar peptaij. 9 Bareinwõt, Irooj ear jiroñ Paul ilo juon pijen ke ear boñ im ba: “Kwõn jab mijak, ak kwõn wõnm̦aanl̦o̦k wõt im kõnnaan im jab ikõñ 10 bwe ij pãd ippam̦ im ejjel̦o̦k juon enaaj m̦an eok, kõnke ej lõñ wõt aõ armej ilo jikin in.” 11 Innem ear pãdwõt ijo ium̦win juon iiõ im jiljino allõñ im katakin er kõn naanin Anij.
12 Ke Gallio ear kom̦ja* ilo Akeia, ri-Ju ro rar ippãn doon im jum̦aik Paul im rar bõkl̦o̦ke ñan jikin ekajet eo, 13 im rar ba: “L̦ein ej kareel armej ro bwe ren kabuñ ñan Anij ilo juon wãween ej n̦ae kien.” 14 Bõtab ke Paul ear itõn kõnnaan, Gallio ear ba ñan ri-Ju ro: “Ri-Ju ran̦, el̦aññe l̦ein ear kõm̦m̦ane juon bõd el̦ap ak jum̦ae kien, innem enaaj kar wõr tokjãn aõ kijenmej im roñjake kom̦. 15 Ak el̦aññe poktak kein rej kõn naan im ãt im kõn kien eo ami make, kom̦win make kõm̦adm̦õdi. Ijjab kõn̦aan bõk kun̦aõ im ekajet ilo men kan̦e.” 16 Innem ear jilkinl̦o̦k er jãn jikin ekajet eo. 17 Kõn men in, rar aolep jibwe Sostenis, em̦m̦aan eo ej bõk eddon im̦õn kabuñ eo an ri-Ju, im rar jino m̦ane im̦aanin wõt jikin ekajet eo. Bõtab Gallio ear jab bõk kun̦aan ilo men kein ñan jidik.
18 Paul ear bar pãd ijo ium̦win elõñ raan, im ãlikin an kar yokyokwe rũttõmak ro, ear jerakl̦o̦k ñan Siria, im Prisilla im Akula rar etal ippãnl̦o̦k. Ear kõkaduukl̦o̦k kool̦an bõran ilo Senkria kõnke em̦õj an kar kõm̦m̦ane juon kallim̦ur. 19 Innem ke rar tõparl̦o̦k Epesõs, ear likũti erro ilo jikin eo im etal ñan im̦õn kabuñ eo im kõmel̦el̦eiki ri-Ju ro. 20 Meñe rar akwel̦ap ñane bwe en kaetokl̦o̦k an pãd, bõtab ear jab ukot an l̦õmn̦ak 21 ak ear yokyokwe er im ba: “El̦aññe ej ankilaan Jeova,* eokwe inaaj bar jepl̦aaktok ñan ippemi.” Im jãn Epesõs ear jerakl̦o̦k ñan 22 Seseria. Innem ear etal* im yokyokwe ro ilo eklejia eo, im ear wanlal̦l̦o̦k wõt ñan Antiok.
23 Ãlikin an kar pãd jidik ijo, ear ilo̦k im itoitak jãn jikin ñan jikin ibul̦õn Galetia im Prijia im kõkajoor aolep ri-kal̦oor ro.
24 Ekar wõr juon ri-Ju etan Apollõs jãn Alexandria ear itok ñan Epesõs. Ear juon em̦m̦aan eo ewãjepdik an kõnnaan im el̦ap an jel̦ã kobban Jeje ko. 25 Em̦õj kar katakini em̦m̦aan in* kõn ial̦ eo an Jeova.* Ear kanooj kijejeto kõnke jetõb kwõjarjar* ear pãd ippãn, im ear kõnnaan im katakin armej ro ilo jim̦we kõn Jesus, ijoke ear jel̦ã wõt kõn peptaij eo an Jon. 26 Ear jino kõnono ilo peran ilo im̦õn kabuñ eo an ri-Ju ro, im ke Prisilla im Akula rar roñ men ko ej ba, rar bõke ippãerro im kõmel̦el̦eikil̦o̦k wõt ilo jim̦we kõn ial̦ eo an Anij. 27 Innem kõnke ear kõn̦aan etal ñan Akeia, em̦m̦aan ro rar jejel̦o̦k ñan ri-kal̦oor ro bwe ren karwaineneiki. Ke ear tõparl̦o̦k ijo, ear l̦ap an jipañ ro rar erom rũttõmak kõn wõt jouj eo el̦ap an Anij. 28 Ear lukkuun kam̦ool im kaalikkar an ri-Ju ro bõd im̦aan mejãn armej ro ilo an kar kwal̦o̦k ñan er jãn Jeje ko bwe Jesus ej Christ.