1 Piter
1 Jãn Piter, juon rijjilõk an Jesus Christ, ñan ro rej ruwamãejet im rejjeplõklõk ilo Pontõs, Galetia, Kapedosia, Eijia* im Bitinia, ro kar kããlõt er 2 ãinwõt an kar Anij, eo ej Jemãd, kar karõkl̦o̦k im̦aan, im ro jetõb kwõjarjar* ear kokkwõjarjar er, unin ej kõnke ren pokake im erreo ikijjeen bõtõktõkin Jesus Christ:
En l̦apl̦o̦k ami bõk jouj eo el̦ap im aenõm̦m̦an.
3 Nõbar en ilo̦k ñan Anij, Jemãn ad Irooj Jesus Christ, kõnke ikijjeen tũriam̦o eo an el̦ap, ear kõm̦m̦an bwe jen bar l̦otak im bõk juon kõjatdikdik eo ejjãmin jako kõn an kar Jesus Christ jerkakpeje jãn mej, 4 im bwe jen bõk menin jolõt eo ejjãmin wabanban im ejjab ettoon im eban jako. Menin jolõt in em̦õj kõpooje ñan kom̦ ilañ, 5 kom̦ ro im kõn ami tõmak, kajoor eo an Anij ej kõjparok kom̦ bwe kom̦win bõk lo̦mo̦o̦r, eo ej pojakin wal̦o̦k ilo iien eo ãliktata. 6 Kõn wõt men kein, elukkuun l̦ap ami lañlõñ meñe kom̦ij iioon eñtaan kõn elõñ kain mãlejjoñ ko ium̦win jidik wõt iien, ijoke kom̦ naaj aikuj deblo̦ke mãlejjoñ ko, 7 kõnke tõmak eo ami me ej iioon mãlejjoñ, eo el̦apl̦o̦k an aorõk jãn juon gold eo ej etal im jorrããn im jako meñe rej karreoiki* kõn kijeek, en maroñ oktak im juon menin wũjtak, nõbar, im aiboojoj ilo iien eo Jesus Christ enaaj wal̦o̦k. 8 Meñe kom̦ar jab lo e, ak kom̦ij yokwe e. Meñe kom̦ij jab loe kiiõ ak kom̦ij kwal̦o̦k ami tõmak ilo e, im elukkuun l̦ap ami m̦õn̦õn̦õ kõn lañlõñ eo el̦ap an em̦m̦an im el̦l̦ã jãn maroñ ba, 9 kõn ami naaj tõpar mejãnkajjik eo ej itok jãn ami tõmak, eo im enaaj lo̦mo̦o̦ren kom̦.
10 Ikijjeen lo̦mo̦o̦r in, ri-kanaan ro rar kanaan kõn jouj eo el̦ap im ej ñan kom̦, im rar lukkuun kõm̦m̦an etale ko kõn lo̦mo̦o̦r in im kanooj liñõri. 11 Ear jab bõjrak aer etale ñããt iien eo ak tõre eo enaaj jejjet kũtien kanaan ko jetõb kwõjarjar,* eo ej pãd ippãer, ear kwal̦o̦k kõn Jesus Christ, ilo an kar kaalikkarl̦o̦k im̦aan kõn wãween an naaj Jesus Christ eñtaan im kõn wãween ko raiboojoj renaaj wal̦o̦k tokãlik. 12 Kar kwal̦o̦k ñan er bwe rejjab jerbal ñan er make, ak rej jerbal ñan kom̦. Rein rar kwal̦o̦k kõn men ko kom̦ij roñ kaki kiiõ jãn ro rej kwal̦o̦k kõn ennaan eo em̦m̦an ñan kom̦ ikijjeen jetõb kwõjarjar,* eo kar jilkintok jãn lañ, im enjel̦ ro relukkuun kõn̦aan jel̦ã* men kein.
13 Innem kom̦win kõpooj l̦õmn̦ak ko ami ñan jerbal; kom̦win ekkõl ilo men otemjej, im kom̦win likũt ami kõjatdikdik ilo jouj eo el̦ap naaj lewaj ñan kom̦ ilo iien eo Jesus Christ enaaj wal̦o̦k. 14 Kom̦ ro rej ãinwõt ajri ro rej pokake, en bõjrak an kõn̦aan ko ami ãeik kom̦,* kõn̦aan ko kom̦ar kõm̦m̦ani m̦okta ilo ami jaje. 15 Ijoke kom̦win kwõjarjar ilo aolep kõm̦m̦an ko ami ãinwõt Eo Eokkwõjarjar, eo ear kũr kom̦, 16 bwe em̦õj je: “Kom̦ij aikuj kwõjarjar, kõnke ña ikkwõjarjar.”
17 Im ñe kom̦ij kũr ñan Jemãdwõj ilañ, eo ej ekajete kajjojo armej ekkar ñan jerbal ko aer ilo ejjel̦o̦k kalijekl̦o̦k, kom̦win kwal̦o̦k mijak ilo kõm̦m̦an ko ami ilo iien in kom̦ij ruwamãejet. 18 Bwe kom̦ jel̦ã bwe men ko rej wabanban, ãinwõt jelba ak gold, rar jab kanemkwõj kom̦* jãn wãween kar mour ko ami ejjel̦o̦k tokjãer, ko rar itok jãn ro jim̦m̦ami.* 19 Bõtab kar kanemkwõj kom̦ kõn bõtõktõk eo eaorõk bõtõktõkin Jesus Christ, eo ej ãinwõt bõtõktõkin juon koon in jiip erreo im ejjab lippijinjin.20 Em̦ool bwe kar kããlõte l̦o̦k im̦aan m̦okta jãn jinoin lal̦,* bõtab kar kwal̦o̦ke ilo iien ko ãliktata kõn kom̦.21 Bwe kõn e, kom̦ij tõmak ilo Anij, eo ear kõjerkake jãn mej im lel̦o̦k ñane nõbar kõnke kom̦win maroñ likũt ami tõmak im kõjatdikdik ilo Anij.
22 Kõn ami pokake m̦ool eo, em̦õj ami kõm̦m̦an bwe kom̦win erreo, im tokjãn men in kom̦ij m̦ool ilo ami yokwe ro jeimi im jatimi. Innem kiiõ, kom̦win kanooj yokwe doon jãn bũruomi.23 Bwe ikijjeen naan ko an Anij eo emour im ej ñan indeeo, kar kõm̦m̦an bwe kom̦win bar l̦otak kõn juon ine* eo eban wabanban, im ejjab kõn juon ine eo emaroñ wabanban,24 bwe “aolep ro rej kanniõk* rej ãinwõt ujooj ko, im aolepen aiboojoj ko aer rej ãinwõt mel̦aaj ko rej ebbõl kõn wũt; ujooj ko rej aemedl̦o̦k im wũt ko rej wõtlo̦k,25 bõtab naan ko an Jeova rej pãdwõt ñan indeeo.” Im “naan” kein rej ennaan eo em̦m̦an kar kwal̦o̦k ñan kom̦.