2 Korint

10 Ña, Paul, ij akwel̦ap ñan kom̦ kõn ineem̦m̦an im jouj eo an Christ. Jet iaami rej ba bwe im̦õjn̦o̦ ñe ij pãd ippemi, bõtab iperan ñe ij jejewaj ñan kom̦. 2 Kõn men in, ij akwel̦ap ñan kom̦ bwe ñe inaaj iwõj, in jab aikuj in kwal̦o̦k aõ peran im lukkuun kauweik ro rej watõk kõm ãinwõt ro rej etetal ekkar ñan kanniõk. 3 Meñe kõmij etetal ilo kanniõk, kõmij jab tarin̦ae ekkar ñan kanniõk. 4 Unin ej kõnke kein tarin̦ae ko am rejjab jãn kanniõk, bõtab rej kein tarin̦ae ko rekajoor jãn Anij, im remaroñ julo̦k men ko elukkuun pen aer jako. 5 Kõmij julo̦k mel̦el̦e ko im jabdewõt l̦õmn̦ak ko reutiej im rej n̦ae jel̦ãl̦o̦kjen̦ eo an Anij, im kõmij kõm̦akokoik aolep l̦õmn̦ak ko bwe ren maroñ pokake Christ. 6 Bareinwõt, ãlikin wõt ami kaalikkar bwe kom̦ij lukkuun pokake, kõm pojakin kaje jabdewõt eo ejjab pokake ilo jabdewõt men.

7 Kom̦ij ekajet ekkar ñan men ko kom̦ij loi itulik. El̦aññe jabdewõt ej lukkuun tõmak bwe ej doon Christ, eokwe en bar kõl̦mãnl̦o̦kjen̦ kake mel̦el̦e in em̦ool: El̦aññe e ej doon Christ, kõm bareinwõt kõmij doon Christ. 8 Jekdo̦o̦n ñe emaroñ l̦ap jidik aõ kõmjãje kõn maroñ eo Irooj ear letok ñan kõm bwe kõmin kõjerbale ñan kõkajoor kom̦ im jab ko̦kkure kom̦, ak iban jook kake men in. 9 Ijjab kõn̦aan bwe kom̦win l̦õmn̦ak bwe ij kajjioñ in kalõl̦ño̦ñ kom̦ kõn lõta kein aõ. 10 Kõnke jet rej ba: “Eddo im kajju lõta kan̦ an, bõtab el̦ak pãd ippãd, em̦õjn̦o̦ im naan kan̦ an ejjel̦o̦k tokjãer.” 11 Armej eo ej ba men in en jel̦ã bwe meñe kõm jako jãn ippemi, ak men ko kõmij ba* ilo lõta ko, kõm naaj bar kõm̦m̦ani* ñe kõmij pãd ippemi. 12 Kõmij jab kõn̦aan watõk kõm bwe kõmij juon wõt ippãn ro rej kautiej er make ak keidi kõm ippãn armej rein. Ñe rej ekajete er make im keidi er make ekkar ñan l̦õmn̦ak ko aer make, men in ej kaalikkar an ejjel̦o̦k aer jel̦ãl̦o̦kjen̦.

13 Ijoke, kõm ban kõmjãje kõn jikin ko kõmar jab kwal̦o̦k naan ie, bõtab kõm naaj kõmjãje kõn jikin ko Anij ear litok* ñan kõm, im jikin kein ekitibuj ijen̦e kom̦ij pãd ie. 14 Ilo m̦ool, ke kõmar iwõj ñan ippemi kõmar jab el̦l̦ãl̦o̦k jãn jikin ko Anij ear litok ñan kõm, kõnke kõm eo m̦oktata kõmar tõpar kom̦ kõn ennaan eo em̦m̦an kõn Christ. 15 Kõmij jab kõmjãje kõn jerbal ko an ro jet ilo jikin ko Anij ear jab litoki ñan kõm, bõtab kõmij kõjatdikdik bwe ilo an naaj l̦apl̦o̦k wõt tõmak n̦e ami, men ko kõmar kõm̦m̦ani ilo jikin ko kar litoki renaaj l̦apl̦o̦k wõt. Innem jerbal ko am renaaj l̦apl̦o̦k wõt, 16 kõnke kõmin maroñ kwal̦o̦k kõn ennaan eo em̦m̦an ñan aelõñ ko jet ilo jikin ko rettol̦o̦k jãn kom̦, im bwe kõmin jab kõmjãje kõn jerbal ko em̦õj kõm̦m̦ani ilo jikin kwal̦o̦k naan ko an ro jet. 17 “Bõtab eo ej kõmjãje, en kõmjãje kõn Jeova.”* 18 Bwe armej eo ej kõmjãje kõn e make, Anij ejjab buñbũruon kake, kõnke Jeova* ej make kããlõt wõn eo ej buñbũruon kake.