Mark

7 Parisi ro im jet iaan skraib ro rar itok jãn Jerusalem im etal ñan ippãn Jesus im rar kaapool̦e. 2 Innem rar lo an jet iaan ri-kal̦oor ro an m̦õñã kõn peier meñe ettoon* im rar jab kwal̦e. 3 (Parisi ro im aolep ri-Ju ro reban m̦õñã m̦ae iien rej kwal̦e addiin peier l̦o̦k ñan jim̦win peier. Rekõn̦aan wõt l̦oore m̦anit in ej itok jãn ro jim̦m̦aer ilo iien ko etto. 4 Bareinwõt, ñe rej itok jãn jikin wia ko, reban m̦õñã m̦ae iien rej karreoik er make kõn dãn. Ebar lõñ m̦anit ko jet rej l̦oori. Ñan waanjoñak, m̦okta jãn aer kõjerbal cup ko, pijja ko, paan ko kõm̦m̦an jãn kõba, rej aikuj katulo̦ki* ilo dãn.) 5 Innem Parisi im skraib rein rar kajjitõk ippãn im ba: “Etke ri-kal̦oor ran̦e am̦ rejjab l̦oore m̦anit im imminene ko an ro jim̦m̦aad, im rej m̦õñã meñe ettoon peier?” 6 Ak ear jiroñl̦o̦k er im ba: “Kom̦ ri-etao, em̦ool wõt an kar Aiseia kanaan kake kom̦ ke ear jeje im ba, ‘Armej rein rej nõbar eõ kõn tieer, bõtab elukkuun ettol̦o̦k bũrueer jãn eõ. 7 Ejjel̦o̦k tokjãn aer kabuñ ñan ña kõnke katak ko aer rej itok jãn kien ko kõm̦m̦anin armej.’ 8 Kom̦ij julo̦k kien ko an Anij im eddãp wõt ñan m̦anit im imminene ko an armej.”

9 Innem ear bar ba: “Kom̦ lukkuun jel̦ã kappok ial̦an ami jab l̦oore kien ko an Anij kõnke kom̦win maroñ l̦oore m̦anit im imminene kan̦e ami. 10 Ñan waanjoñak, Moses ear ba, ‘Kwõn kautiej jem̦am̦ im jinõm̦.’ Ear bar ba, ‘Jabdewõt eo ej kwal̦o̦k naan ko renana kõn jemãn ak jinen, ren m̦ane ñan mej.’ 11 Bõtab kom̦ij ba, ‘Ejjel̦o̦k jorrããn ñe jabdewõt ej ba ñan jemãn ak jinen im ba: “Em̦õj aõ kallim̦ur ñan Anij bwe inaaj lel̦o̦k ñane men ko* imaroñ kar jipañ eok kaki.”’ 12 Kõn ami ãindein, kom̦ij kõm̦m̦an bwe armej ro ren jab jipañ jemãer ak jineer ñan jidik. 13 Kom̦ij kajejtokjãn naan ko an Anij kõn wõt m̦anit im imminene kein ami me kom̦ij lil̦o̦k ñan ro jet. Kom̦ij kõm̦m̦ani elõñ men ko ãinwõt men in.” 14 Innem ear kũrtok armej ro bwe ren itok ñan ippãn, im ear ba: “Kom̦win aolep roñjake bwe kom̦win mel̦el̦e ta ko ij ba. 15 Men ko rej kattoon juon armej im̦aan mejãn Anij ej men ko rej wal̦o̦ktok jãn bũruon, ejjab men ko ej kañi.” 16 *——

17 Ke Jesus ear ilo̦k jãn armej ro im del̦o̦ñl̦o̦k ilo juon em̦, ri-kal̦oor ro an rar kajjitõk ippãn kõn waanjoñak eo. 18 Im ear uwaak er im ba: “Kom̦ij jab bar mel̦el̦e ãinwõt er ke? Kom̦ij jab jel̦ã ke bwe men ko juon armej ej kañi rejjab kattoone? 19 Unin ej kõnke men ko ej kañi rejjab del̦o̦ñ ñan bũruon ak rej wanlal̦l̦o̦k ñan lo̦jien im diwõjl̦o̦k jãn ãnbwinnin.” Ilo an Jesus ba men in ej kaalikkar bwe aolep m̦õñã im erreo. 20 Innem ear bar ba: “Men ko rej wal̦o̦ktok jãn bũruon juon armej rej kattoone. 21 Bwe jãn itulowa, jãn bũruon armej ej itok l̦õmn̦ak ko renana: l̦õñ,* ko̦o̦t, uror, 22 lejãn,* arõk, kõm̦m̦an ko rejekkar, etao, peran in kõm̦m̦ani men ko renana,* ebbanban, kõnono n̦ae, utiej bõro, im jajel̦o̦kjen̦. 23 Aolep men kein renana rej itok jãn bũruon armej im rej kõm̦m̦an bwe juon armej en ettoon.”

24 Innem ear ilo̦k jãn ijo im etal ñan jikin ko ipel̦aakin Tair im Saidon. Im ear del̦o̦ñl̦o̦k ilo juon em̦ im ear jab kõn̦aan bwe jabdewõt en jel̦ã bwe emoottok, bõtab armej ro rar jel̦ã bwe epãd ijo. 25 Juon kõrã ear roñ kõn e im ear kajju itok ñan ippãn im bukwelõlõ iturin neen. Jetõb ettoon ear mo̦k* n̦a ippãn ledik eo nejin kõrã in. 26 Kõrã in ej juon ri-Grik, jãn jikin eo etan Pinisia ilo Siria, im ear akwel̦ap ñan Jesus elõñ alen bwe en kadiwõjl̦o̦k jetõb ettoon* eo jãn ledik eo nejin. 27 Bõtab ear uwaake kõrã eo im ba: “Jej aikuj kõtl̦o̦k m̦okta an ajri ro m̦õñã ñan ñe remat, kõnke ejjab jim̦we ñan bõk m̦õñã ko kijen ajri ro im lil̦o̦ki ñan kidu jiddik ko.” 28 Kõrã eo ear uwaak im ba: “Irooj, kwõj m̦ool, ijo wõt ke kidu jiddik ko rej pãd ium̦win tebõl̦ eo im attũkokoiki bũrar ko rej wõtlo̦k jãn men ko kijen ajri ro.” 29 Innem Jesus eba: “Kõn am̦ ba men in, kwõmaroñ etal. Em̦õj an jetõb ettoon eo diwõjl̦o̦k jãn ledik eo nejũm̦.” 30 Im kõrã eo ear jepl̦aak ñan m̦weo im̦õn im ear loe ledik eo nejin ej babu ioon peet eo, im ejako jetõb ettoon eo jãne.

31 Innem Jesus ear ilo̦k jãn jikin ko ilo Tair im ear etal ilujenl̦o̦k jikin ko ilo Saidon im Dekapolis* bwe en jibadekl̦o̦k Lom̦al̦o in Galili. 32 Im armej ro rar bõktok juon em̦m̦aan ejarroñroñ im epen an kõnnaan, im rar akwel̦ap ñan Jesus bwe en likũt pein ioon. 33 Ear ãñini em̦m̦aan eo bwe erro en makel̦o̦k iaaerro jãn armej ro. Innem ear likũt addiin pein ilo lo̦jilñin em̦m̦aan eo, im ãlikin an Jesus kar kaplo, ear uñũr loon l̦eo. 34 Im ear reilõñl̦o̦k ñan lañ im bõk kũtuon im ba ñan em̦m̦aan eo: “Eppata,” mel̦el̦ein, “En pel̦l̦o̦k.” 35 Ilo iien eo wõt, lo̦jilñin em̦m̦aan eo ear pel̦l̦o̦k im ear kajju em̦m̦an an kõnnaan. Em̦m̦aan eo ear jino kõnnaan ãinwõt an armej ro jet bar kõnnaan. 36 Innem Jesus ear jiroñ er bwe ren jab kwal̦o̦k ñan jabdewõt kõn men in. Bõtab el̦ak l̦apl̦o̦k wõt an jiroñl̦o̦k er men in, ej kab baj l̦apl̦o̦k wõt aer kõnnaan kake. 37 Ear l̦ap jãn joñan an kar armej ro bwilõñ, im rar ba: “Aolep men ej kõm̦m̦ani relukkuun em̦m̦an. Joñan ej kõm̦m̦an bwe ro rejarroñroñ ren roñl̦o̦kjen̦ im ro rejaje kõnnaan ren kõnnaan.”