Mark

6 Innem ear ilo̦k jãn ijo ñan bukwõn eo an, im ri-kal̦oor ro an rar etal ippãnl̦o̦k. 2 Ke ear jejjet raanin Jabõt,* ear ilo̦k ñan im̦õn kabuñ eo im jino an katakin armej ro ie. Enañin aolep armej ro rar roñjake rar kanooj bwilõñ, im rar ba: “L̦ein ear bõk jãn ia men kein? Etke kar lel̦o̦k mãlõtlõt in ñane im lel̦o̦k an maroñ bwe en kõm̦m̦an menin bwilõñ? 3 Ejjab kaam̦tõ eo nejin Meri in ke? Im ejjab ke etan l̦õm̦aro jatin in Jemes, Josep, Judas, im Saimõn? Lim̦aro jatin rej jokwe ippãd ilo bukwõn in, ejjab ke?” Kõn men in, rar jab kõn̦aan tõmake. 4 Ak Jesus ear ba ñan er: “Aolep iien armej rej kautiej juon ri-kanaan. Bõtab ro ilo bukwõn eo an im ro nukũn kab ro ilo m̦weo im̦õn rejjab kautieje.” 5 Kõn men in, ear jab kõm̦m̦an elõñ menin bwilõñ ilo bukwõn eo, ak ear likũt pein ioon jejjo wõt ri-nañinmej im kõmour er. 6 Ear kanooj bwilõñ kõn an ejjel̦o̦k aer tõmak. Innem ear jibadekl̦o̦k aolepen bukwõn ko jet ilo jikin in im katakin armej ro ie.

7 Im ear kũrtok rijjilõk ro 12 im lel̦o̦k aer maroñ ñan kadiwõjl̦o̦k jetõb ko rettoon. Innem ear jilkinl̦o̦k er, ruo iaan ruo iaan. 8 Bareinwõt, ear jiroñ er bwe ren jab ebbõk jabdewõt men ilo ial̦ eo aer l̦o̦k ijello̦kun wõt juon jokon̦. Ear ba bwe ren jab ebbõk pilawã, nien m̦õñã, im jããn* ilo kañũr ko aer. 9 Ak ear jiroñ er bwe ren etal wõt kõn juuj im nuknuk ko rej kõn̦aki. 10 Ear wõnm̦aanl̦o̦k im ba ñan er: “Jabdewõt jikin kom̦ij etal ñane im del̦o̦ñl̦o̦k ilo juon em̦, kom̦win jokwe ie m̦ae iien kom̦ij ilo̦k jãn jikin eo. 11 Bõtab jabdewõt jikin rejjab karwaineneik kom̦ ak roñjake kom̦ ie, kom̦win pikpikũri neemi im jol̦o̦k jãn bũñalin ñe kom̦ij etal jãne. Men in ej kein kakkõl er.” 12 Innem rar etal im kwal̦o̦k naan ñan armej ro bwe ren ukel̦o̦k, 13 im rar kadiwõjl̦o̦k jetõb ko rettoon* im kapit armej ro renañinmej kõn weil̦ im kõmour er.

14 Kiiñ Herod ear roñ kõn men kein kõnke ear buñbuñ etan Jesus, im armej ro rej ba: “Em̦õj an Jon ri-Peptaij jerkak jãn mej, eñin unin ewõr an maroñ ñan kõm̦m̦ani menin kabwilõñlõñ ko.” 15 Ak ro jet rar ba: “E Ilaija.” Im bar jet reba: “E juon ri-kanaan ãinwõt kar ri-kanaan ro etto.” 16 Ke Herod ej roñ men kein, ear ba: “Jon, eo iar jebbare, em̦õj an bar mour.” 17 M̦oktal̦o̦k Herod ear ijjilõkl̦o̦k bwe ren bõk Jon im lukwõje im likũti ilo kalbuuj kõn wõt Herodias lio kar pãleen Pilip, l̦eo jein, kõn an kar Herod m̦areiki. 18 Elõñ alen an kar Jon jiroñl̦o̦k Herod im ba: “Ejjab mãlim bwe kwõn bõk kõrã n̦e pãleen l̦een̦ jeim̦.” 19 Kõn men in, Herodias ear lukkuun kũtõtõik Jon im kõn̦aan m̦ane. Bõtab ear ejjel̦o̦k an maroñ 20 kõnke Herod ear kõjparoke Jon kõn an mijak im jel̦ã bwe ej juon eo ewãnõk im eokkwõjarjar. Jabdewõt iien Herod ear roñ an Jon kõnnaan, ejaje en ta ñane ak ear m̦õn̦õn̦õ wõt in roñjake.

21 Bõtab ear pel̦l̦o̦k juon iien em̦m̦an ñan an Herodias katõprak kõn̦aan eo an ke ear jejjet raanin l̦otak eo an Herod. Herod ear kõm̦m̦ane juon kõjota el̦ap im ear kũrtok ri-utiej ro rej pãd ium̦win maroñ eo an, kapen in jarin tarin̦ae ro, im ri-utiej ro ilo Galili. 22 Ledik eo nejin Herodias ear jãdetok im eb, im men in ear kam̦õn̦õn̦õik Herod im ro rar kõjota* ippãn. Innem kiiñ eo ear ba ñan ledik eo: “Kwal̦o̦k jabdewõt men kokõn̦aan im inaaj lewaj ñan eok.” 23 Ear bar kallim̦uri im ba: “Jabdewõt men eo kwõnaaj kajjitõk ippa kake, inaaj lewaje, jekdo̦o̦n ñe kwõnaaj kajjitõk kõn jimattanin aelõñ in aõ.” 24 Innem ledik eo ear etal im kajjitõk ippãn jinen im ba: “Ta eo in kajjitõk kake?” Im jinen ear ba: “Bõran Jon ri-Peptaij.” 25 Im ledik eo ear m̦õkaj im jepl̦aak ñan ippãn kiiñ eo im ba: “Ikõn̦aan bwe kwõn letok ñan ña bõran Jon ri-Peptaij ilo juon pileij kiiõ wõt.” 26 Meñe kiiñ eo ear lukkuun bũrom̦õj, ak ear jab kõn̦aan kõjekdo̦o̦n kajjitõk eo an ledik eo kõnke em̦õj an kõm̦m̦an kallim̦ur im kõn wõt ri-lotok ro an.* 27 Kõn men in, kiiñ eo ear kajju jilkinl̦o̦k juon rũttarin̦ae im ear ba ñane bwe en bõktok bõran Jon. Innem rũttarin̦ae eo ear etal im jebbare Jon ilo jikin kalbuuj. 28 Im ear bõktok bõran Jon ioon juon pileij im lel̦o̦ke ñan ledik eo, im ledik eo ear bõkl̦o̦ke ñan ippãn jinen. 29 Ke ri-kal̦oor ro an Jon rar roñ kõn men in, rar ilo̦k im bõk ãnbwin eo im likũti ilo juon lõb.*

30 Rijjilõk ro an Jesus rar itok ñan ippãn im kõnnaanek e kõn aolep men ko rar kõm̦m̦ani im katakin ro jet kaki. 31 Innem ear ba ñan er: “Jen ilo̦k ñan juon jikin ejjel̦o̦k armej ie bwe jen kakkije jidik.” Ear ba men in kõnke ejjab bõjrak an armej ro jibadektok er,* im ejjel̦o̦k iien aer kakkije im m̦õñã. 32 Kõn men in, rar jerak im jibadekl̦o̦k juon jikin me ejjel̦o̦k armej ie bwe ren makel̦o̦k iaaer. 33 Bõtab armej ro rar lo aer etal im elõñ rar bar jel̦ã kake. Innem armej ro jãn bukwõn ko wõj rar ettõrl̦o̦k ñan jikin eo im rar tõparl̦o̦k ijo m̦okta jãn er. 34 Ke Jesus ear to jãn wa eo, ear lo jarlepju in armej ro im ear tũriam̦okake er kõnke rej ãinwõt jiip ko ejjel̦o̦k aer jabõt. Kõn men in, ear jino katakin er kõn elõñ men.

35 Kiiõ ear jotal̦o̦k im ri-kal̦oor ro rar itok ñan ippãn im ba: “Ejjel̦o̦k jabdewõt men ilo jikin in ak m̦õttan jidik eboñ. 36 Kwõn ba ñan armej rein bwe ren ilo̦k ñan jikin kan̦ im bukwõn kan̦ repaak bwe ren wia kijeer m̦õñã.” 37 Im ear ba: “Kom̦win lel̦o̦k kijeer m̦õñã.” Im ri-kal̦oor ro reba: “Kokõn̦aan ke bwe kõmin etal im wia pilawã kõn tarrin 200 denarii* im lel̦o̦k ñan armej rein bwe ren m̦õñã?” 38 Im eba: “Jete en̦ pilawã ippemi? Etal m̦õk im lale!” Ãlikin aer lale rar itok im ba: “L̦alem wõt wũdin pilawã im ruo ek.” 39 Innem ear kõjenolo̦k armej ro ilo jet kumi im jiroñ er bwe ren jijet ioon ujooj ko,* 40 im armej ro rar jijet. Jet kumi 100 oraer im kumi ko jet 50 oraer. 41 Im ear bõk pilawã ko l̦alem im ek ko ruo, im ear reilõñl̦o̦k ñan lañ im jar. Ãlikin, ear kõrrãjeti pilawã ko ñan elõñ m̦õttan. Innem ear lel̦o̦k pilawã ko im ek ko ñan ri-kal̦oor ro bwe ren ajejil̦o̦k ñan armej ro. 42 Aolep armej ro rar m̦õñã im mat, 43 im ke rar aini bween pilawã ko, ear obrak 12 iep, ejjañin kobatok bween ek ko. 44 Oran em̦m̦aan ro rar m̦õñã pilawã ej 5,000.

45 Innem Jesus ear m̦õkaj im jiroñ ri-kal̦oor ro an bwe ren uwe ilo wa eo im jerakl̦o̦k im̦aan ñan ijo turãjetin lom̦al̦o eo, im etal iturinl̦o̦k Betseida. Ke rar ilo̦k, ear jilkinl̦o̦k armej ro. 46 Ãlikin an armej ro ilo̦k, ear wanlõñl̦o̦k ñan juon tol̦ im jar. 47 Em̦õj an jok marok ke wa eo ej pãd ilo lukwõl̦pãn lom̦al̦o eo, bõtab ear make iaan ioon ãne. 48 Im m̦okta jãn an al̦ jino tak,* ear jibadekl̦o̦k ri-kal̦oor ro an ke ear lo aer eñtaan in aõn̦õn̦ kõnke kõto eo eitok im̦aan wa eo. Ke ej etetall̦o̦k ioon dãn im jibadekl̦o̦k er, ear ãinwõt ñe ear itõn etal wõt jãn er. 49 Im ke rar loe an etetal ioon dãn, rar lam̦õj im ba: “Ta n̦e n̦e tok?”* 50 Er aolep rar loe im rar kanooj mijak. Bõtab, ear m̦õkaj im kõnnaanl̦o̦k ñan er im ba: “Kom̦win peran im jab mijak bwe ña e!” 51 Innem ear uwel̦o̦k ioon wa eo ippãer, im ear jako an l̦ap kõto. Kõn men in, rar lukkuun bwilõñ 52 kõnke rar jab jel̦ã ta mel̦el̦ein menin kabwilõñlõñ eo ear kõm̦m̦ane kõn pilawã ko. Rejjañin de mel̦el̦e ilo bũrueer.

53 Im ke rar tõpar ijo turãjet, rar pol̦o̦k ilo jikin eo etan Genesaret, im rar añkõ ijo. 54 Bõtab rej tol̦o̦k wõt jãn wa eo ak em̦õkaj an armej kile er. 55 Im armej ro rar ettõrl̦o̦k im kõnnaanek ro jet ilo jikin eo, im rar jino bõktok ri-nañinmej ro ioon men ko kinier tok ñan ijo rar roñ bwe Jesus ej pãd ie. 56 Im jabdewõt jikin ak bukwõn ak jikin kallib ej ilo̦k ñane, armej ro rej bõktok ri-nañinmej ro ñan jikin wia ko. Innem rej akwel̦ap ñane bwe en kõtl̦o̦k an ri-nañinmej ro uñũr wõt tõrerein nuknuk eo an. Aolep ro rar uñũri tõrerein nuknuk eo an rar mour.