1 Timote
1 Jãn ña Paul, rijjilõk an Christ Jesus ekkar ñan karõk eo an Anij, eo ej ad ri-Lo̦mo̦o̦r, im Christ Jesus, eo ej ad kõjatdikdik, 2 ñan Timote,* nejũ eo em̦ool ilo tõmak:
Jouj eo el̦ap im tũriam̦o kab aenõm̦m̦an eo jãn Anij, eo ej Jemãdwõj, im jãn Christ Jesus ad Irooj, en pãd ippam̦.
3 Ãinwõt aõ kar rõjañ eok bwe kwõn pãdwõt ilo Epesõs ilo iien eo iar itõn etal ñan Masedonia, kiiõ ij bar rõjañ eok bwe kwõn pãdwõt ie, kõnke kwõn jiroñ ro jet bwe ren bõjrak jãn aer kwal̦o̦k katak ko reoktak, 4 im ren kõjparok er jãn bwebwenato ko reriab im jãn aer etale laajrakin menmenbwij ko. Ejjel̦o̦k tokjãn men kein, ilo m̦ool rej kõm̦m̦an an wõr kajjitõk ko ejjel̦o̦k unin kõnono kaki ijello̦kun aer kwal̦o̦k kõn men ko jãn Anij im rej kõkajoor tõmak. 5 Ilo m̦ool, unin naanin jiroñ* in ej bwe en wõr yokwe, eo ej itok jãn juon bõro erreo im juon bõklõkõt em̦m̦an im jãn tõmak eo ejjel̦o̦k m̦on̦ ie. 6 Kõn an jet oktakl̦o̦k jãn men kein, rar bõk kun̦aaer ilo kõnono ko rewaan. 7 Rekõn̦aan bwe ren ri-katakin kõn kien, ak rejjab mel̦el̦e kõn men ko rej ba im men ko el̦ap aer peran in katakin ro jet kaki.
8 Kiiõ, jejel̦ã bwe Kien* eo em̦m̦an el̦aññe ejim̦we an juon l̦oore, 9 im ñe ej mel̦el̦e bwe unin kar kõm̦m̦an kien, ejjab ñan juon eo ewãnõk, bõtab ej ñan ro rej ruprup kien, ro ri-jum̦ae, ro ejjel̦o̦k aer kautiej Anij, ro rijjerawiwi, ro rejjab tiljek,* ro rej kõjekdo̦o̦n kwõjarjar, im ro rej m̦an jemãer im jineer, im ro ri-uror, 10 ro ri-l̦õñ,* em̦m̦aan ro rej babu ippãn em̦m̦aan, ro rej ko̦o̦t armej, ro ri-riab, ro ejjab m̦ool aer kallim̦ur,* im jabdewõt men ko jet rej jum̦ae katak ko rejim̦we.* 11 Katak in ej pedped ioon ennaan eo em̦m̦an me eaiboojoj, eo kar kappeik eõ kake im ej jãn Anij in m̦õn̦õn̦õ.
12 El̦ap aõ kam̦m̦oolol Christ Jesus ad Irooj, eo ear kõkajoor eõ kõnke ear watõk eõ juon eo etiljek ilo an kar kããlõt eõ ñan jerbal eo an, 13 meñe ikõn kar juon eo ear kõnono n̦ae Anij im kaeñtaan armej ro an im juon eo ejãjjãj. Meñe ãindein, ak kar kwal̦o̦k tũriam̦o ñan ña kõnke iar jab mel̦el̦e im ear ejjel̦o̦k tõmak ippa. 14 Bõtab ad Irooj ear kwal̦o̦k ñan eõ jouj eo ekanooj l̦ap im ear letok tõmak im yokwe, eo ej jãn Christ Jesus. 15 Jemaroñ lukkuun lõke im tõmak naan kein: Christ Jesus ear itok ñan lal̦ in bwe en lo̦mo̦o̦ren ro rijjerawiwi, im ña eo el̦aptata aõ jerawiwi iaan rein. 16 Ijoke, kar kwal̦o̦k tũriam̦o ñan ña, kõnke ikijjeen ña, eo im el̦aptata an jerawiwi, Christ Jesus en maroñ kwal̦o̦k joñan an lukkuun meanwõd, im kõjerbal ña ãinwõt juon waanjoñak ñan ro renaaj likũt aer tõmak ilo e bwe ren bõk mour indeeo.
17 Kiiõ, ñan eo ej Kiiñ indeeo, eo ejjãmin jako, eo jejjab maroñ loe, im e wõt Anij, nõbar im aiboojoj en ilo̦k ñane ñan indeeo im indeeo. Amen.
18 Naanin jiroñ* in ij lewaj ñan kwe, nejũ Timote, ej ekkejel ippãn kanaan ko kar kwal̦o̦k kaki kõn kwe, bwe men kein renaaj jipañ eok ñan wõnm̦aanl̦o̦k wõt im tarin̦ae ilo tarin̦ae eo em̦m̦an, 19 dãpij wõt am̦ tõmak im dãpij wõt juon bõklõkõt em̦m̦an, eo jet armej rar kõjekdo̦o̦ne, im kõn men in, ear jorrããn tõmak eo aer ãinwõt an waan ejjerakrõk ko rup im jorrããn. 20 Jet iaaer ej Haimeniõs im Alexander, im iar lel̦o̦k er ñan Setan bwe ren katak ñan jab bar kõnono n̦ae Anij.