2 Tessalonika
2 Bõtab ro jeiũ im jatũ, ilo iien eo ad Irooj Jesus Christ enaaj pãd im ad naaj kobal̦o̦k ippãn, kõmij kajjitõk ippemi 2 bwe en jab m̦õkaj an pok ami l̦õmn̦ak ak bwe kom̦win jab inepata ñe kom̦ij roñ aer ba bwe raan eo an Jeova* em̦õj an moottok, jekdo̦o̦n ñe ej naanin kanaan* ak rej kõnono ippemi kake ak rej jejewaj lõta kake im ãinwõt ñe ej jãn kõm.
3 Jab kõtl̦o̦k bwe jabdewõt en kõjebwãbweik* kom̦ ilo jabdewõt wãween, kõnke raan eo eban itok m̦ae iien enaaj wal̦o̦k m̦okta jum̦ae im alikkar armej eo ej ko̦kkure kien, eo nejin jeepepl̦o̦k. 4 E ej juon ri-jum̦ae im ej kautiej e make ilõñin aolep men ko armej rej watõki bwe rej anij ak men ko rej kabuñ ñani,* bwe en jijet ilo tampel̦ eo an Anij im make kwal̦o̦k im̦aan mejãn armej bwe e ej juon anij. 5 Ta kom̦ij jab keememej aõ kõn jiroñwaj kom̦ kõn men kein ilo iien eo iar pãd ippemi ke?
6 Kiiõ kom̦ jel̦ã ta eo ej bõbraik an wal̦o̦k, unin ej kõnke armej in en wal̦o̦k ilo iien eo an make. 7 Em̦ool bwe men in enana im en̦ojak me armej in ej kõm̦m̦ane em̦õj an jino jerbal, bõtab eban lukkuun alikkar m̦ae iien ejako eo ej bõbraiki ilo tõre in. 8 Innem enaaj kiiõ lukkuun alikkar armej eo ej ko̦kkure kien, eo Irooj Jesus enaaj ko̦kkure ikijjeen kajoor* eo ej diwõjtok jãn lo̦ñiin, im enaaj jol̦o̦ke ilo iien eo enaaj alikkar an Jesus pãd. 9 Bõtab armej eo ej ko̦kkure kien ej pãd kõn wõt kajoor eo an Setan im kõn aolep jerbal ko rekajoor im kõkal̦l̦e ko reriab im menin kabwilõñlõñ ko, 10 im kõn etao otemjej rej wal̦o̦ktok jãn jab wãnõk. Men kein rej tõlpilouk armej ro renaaj jako, eñin kaje eo aer kõn wõt aer kar jab tõmak im yokwe m̦ool eo bwe ren maroñ bõk lo̦mo̦o̦r. 11 Eñin unin Anij ej kõtl̦o̦k bwe menin m̦on̦ ko ren kõjebwãbweik er ñan kõm̦m̦an aer tõmak men eo eriab, 12 bwe ren aolep bõk ekajet kõnke rar jab tõmak m̦ool eo, bõtab rar m̦õn̦õn̦õ kõn men ko rejjab wãnõk.
13 Ijoke, kom̦ ro jeiũ im jatũ me Jeova* ej yokwe er, ej ammim eddo aolep iien ñan kam̦m̦oolol Anij kõn kom̦ kõnke jãn jinoin, Anij ear kããlõt kom̦ ñan bõk lo̦mo̦o̦r. Ear kõm̦m̦ane men in ilo an kar kokkwõjarjar kom̦ kõn jetõb kwõjarjar* eo an im kõn ami tõmak ilo m̦ool eo. 14 Ear kũr kom̦ ñan men in ikijjeen ennaan eo em̦m̦an kõmij kwal̦o̦k kake, kõnke kom̦win maroñ bõk aiboojoj eo an Jesus Christ ad Irooj. 15 Kõn men in, ro jeiũ im jatũ, kom̦win jutak pen im dãpij wõt m̦anit ko kõmar katakin kom̦ kaki, ikijjeen am kar kõnono ippemi ak ilo am kar jejewaj lõta. 16 Bareinwõt, ad Irooj Jesus Christ make kab Anij, eo Jemãdwõj me ej yokwe kõj im ej letok aenõm̦m̦an eo ej ñan indeeo, im kõjatdikdik eo elukkuun em̦m̦an ikijjeen jouj eo an el̦ap, 17 ren kaenõm̦m̦an bũruomi im kõm̦m̦an bwe kom̦win pen* ilo aolep jerbal im naan ko rem̦m̦an.