Matu

10 Innem Jesus ear kũrtok ri-kal̦oor ro an 12 im lel̦o̦k aer maroñ bwe ren kadiwõjl̦o̦k jetõb ko rettoon* im kõmour armej ro jãn jabdewõt nañinmej.

2 Eñin ej ãt ko etan rijjilõk ro 12: Saimõn, ãt eo juon ej Piter, im l̦eo jatin* etan Andru, l̦õm̦aro ruo nejin Zebedi etaer Jemes im Jon, 3 Pilip im Bartolomu,* Tomas im ri-tõltõl eowõj eo etan Matu,* Jemes nejin Alpiõs, im Tadiõs,* 4 Saimõn, eo im el̦ap an kijejeto, im Judas Iskariõt, eo ear ketake Jesus tokãlik.

5 Jesus ear jilkinl̦o̦k rijjilõk rein 12 im jiroñl̦o̦k er naan kein: “Kom̦win jab ilo̦k ñan ãne ko ãneen ri-aelõñ ko jet, im jab ilo̦k ñan jabdewõt iaan ijoko jikin ri-Sameria ro. 6 Ak kom̦win ilo̦k im pukot wõt jiip ko rejebwãbwe an aelõñin Israel. 7 Kom̦win kwal̦o̦k naan ilo ial̦ eo ami l̦o̦k, im kom̦win ba: “Aelõñin lañ* ej epaaktok.” 8 Kom̦win kõmour ro renañinmej, kejerkak ro remej, karreoiki ro relõba, im kadiwõjl̦o̦k jetõb ko rettoon.* Kar lewaj ñan kom̦ ilo ejjel̦o̦k on̦ããn, kõn men in kom̦win lel̦o̦k ilo ejjel̦o̦k on̦ããn. 9 Kom̦win jab ebbõk jelba ak gold ak kõba ilo kañũr in jããn ko ami. 10 Im jab ebbõk nien m̦õñã ñe kom̦ij ilo̦k kõnke ekkar bwe armej ren naajdik juon ri-jerbal. Kom̦win jab bõk bar juon nuknuk, bar juon juuj, im bar juon jokon̦.

11 “Jabdewõt jikin ak bukwõn kom̦ij del̦o̦ñl̦o̦k ie, kom̦win pukot jabdewõt eo enaaj karwaineneik kom̦, im kom̦win jokwe ippãn m̦ae iien kom̦ij ilo̦k jãn jikin eo. 12 Ñe kom̦ij del̦o̦ñl̦o̦k ilo juon em̦, kom̦win yokyokwe* armej ro ie. 13 Im ñe rej karwaineneik kom̦, ami aenõm̦m̦an en pãd ippãer, ak ñe rejjab karwaineneik kom̦, ami aenõm̦m̦an en pãdwõt ippemi. 14 Jabdewõt jikin armej ro rejjab karwaineneik kom̦ ak roñjake kom̦ ie, kom̦win pikpikũri neemi im jol̦o̦k jãn bũñalin ñe kom̦ij etal jãn m̦weo ak jãn jikin eo. 15 Ij ba ñan kom̦ bwe ilo naaj Raanin Ekajet en̦, enaaj l̦apl̦o̦k an armej in jikin in bõk kaje jãn armej in Sodom im Gomorra.

16 “Ij jilkinl̦o̦k kom̦ ãinwõt jiip ko ibwiljin ol̦ip ko. Kõn men in, kom̦win ekkõl ãinwõt jineik im ineem̦m̦an ãinwõt m̦ul̦e. 17 Kom̦win kõjparok kom̦ jãn armej kõnke renaaj liaakel̦o̦k kom̦ ñan im̦õn ekajet ko im m̦an kom̦ ilo im̦õn kabuñ ko aer. 18 Bareinwõt renaaj bõkl̦o̦k kom̦ ñan im̦aan kom̦ja* ro im kiiñ ro kõn wõt ña, im kom̦ naaj kwal̦o̦k kõn ña ñan er im ñan ri-aelõñ ko. 19 Bõtab ñe renaaj liaakel̦o̦k kom̦, kom̦win jab inepata kõn ta ko kom̦ naaj ba, ak kõn wãween ami naaj kõnono, kõnke naaj kwal̦o̦k ñan kom̦ ta ko kom̦win ba ilo iien eo wõt. 20 Kom̦ ban make iaami ñe kom̦ij kõnono, bõtab jetõb kwõjarjar* eo an Jememiwõj ilañ enaaj jipañ kom̦ kõnono. 21 Bareinwõt, armej renaaj liaakel̦o̦k l̦õm̦aro jeier im jatier ñan mej, enaaj ãindein em̦m̦aan ro ñan ro nejier, im ajri ro renaaj jum̦aik jineer im jemãer im liaakel̦o̦k er ñan mej. 22 Armej otemjej renaaj dike kom̦ kõn wõt eta, bõtab eo ej kijenmej ñan jem̦l̦o̦kin enaaj bõk lo̦mo̦o̦r. 23 Ñe rej kaeñtaan kom̦ ilo juon jikin, innem kom̦win ko ñan bar juon jikin. Ij ba ñan kom̦ bwe m̦okta jãn ami naaj kadedel̦o̦k ami kwal̦o̦k naan ilo aolepen jikin ko im bukwõn ko ilo Israel, Nejin armej* enaaj itok.

24 “Juon rũkkatak eban utiejl̦o̦k jãn ri-kaki eo an, im juon ri-karejar* eban utiejl̦o̦k jãn irooj eo an. 25 Rũkkatak eo en kõtmãne bwe armej renaaj kõm̦m̦an ñane ãinwõt aer kõm̦m̦an ñan ri-kaki eo an, im ri-karejar eo en kõtmãne bwe armej renaaj kõm̦m̦an ñane ãinwõt aer kõm̦m̦an ñan irooj eo an.* El̦aññe armej rej n̦aetan eo ej bõran juon baam̦le Beelzebub,* innem ejjel̦o̦k pere bwe ãindein aer naaj bar n̦aetan ro ilo m̦weo im̦õn. 26 Kõn men in, kom̦win jab mijak er bwe jabdewõt men ko ren̦ojak renaaj wal̦o̦k, im jabdewõt men ko rettino renaaj alikkar. 27 Men ko ij kwal̦o̦ki ñan kom̦ ilo marok, kom̦win kõnnaan kaki ilo meram. Im men ko ij wũnojidikdik waj ñan kom̦ kaki, kom̦win kwal̦o̦ki jãn iraan m̦õko. 28 Kom̦win jab mijak ro remaroñ m̦an kom̦ ñan mej bõtab rejjab maroñ bõbrae ami bar mour ilju im jekl̦aj. Ak em̦m̦anl̦o̦k kom̦win mijak eo ewõr an maroñ ñan ko̦kkure kom̦ ilo Kena.* 29 Armej rej wiakake ruo bao sparrow kõn juon jããn jiddik,* ejjab ke? Meñe ãindein ak Jememiwõj ilañ ejel̦ã ñe juon iaan bao kein rej wõtlo̦k ñan lal̦. 30 Anij ebar jel̦ã kõn oran aolep kool̦ ko ilo bõrami. 31 Kõn men in, kom̦win jab mijak, el̦apl̦o̦k ami aorõk jãn bao sparrow ko.

32 “Jabdewõt eo ej kile eõ im̦aan mejãn armej, inaaj bar kwal̦o̦k aõ kile im̦aan mejãn Jema, eo ej pãd ilañ. 33 Bõtab, jabdewõt eo ej kaarmejjeteik eõ im̦aan mejãn armej, inaaj bar kaarmejjeteik e im̦aan mejãn Jema, eo ej pãd ilañ. 34 Kom̦win jab l̦õmn̦ak bwe iar itok bwe in bõktok aenõm̦m̦an ñan lal̦ in. Iar jab itõn bõktok aenõm̦m̦an, ak iar itõn bõktok jãje. 35 Iar itok bwe in kõjepel ro uwaan baam̦le ko. L̦õm̦aro renaaj jum̦aik ro jemãer, lim̦aro renaaj jum̦aik ro jineer, im lim̦aro renaaj jum̦aik jinen l̦õm̦aro pãleer. 36 Ro renaaj kõjdate juon armej ej ro ilo baam̦le eo an make. 37 Jabdewõt eo el̦apl̦o̦k an yokwe jemãn ak jinen jãn ña, ejekkar bwe en ri-kal̦oora. Im jabdewõt eo el̦apl̦o̦k an yokwe l̦adik eo nejin ak ledik eo nejin jãn ña, ejekkar bwe en ri-kal̦oora. 38 Jabdewõt eo ejjab ineek al̦al̦ in eñtaan* eo an im l̦oor eõ, ejekkar bwe en ri-kal̦oora. 39 Jabdewõt eo ej kajjioñ in kõjparok mour eo an, enaaj mej. Bõtab, jabdewõt eo enaaj mej kõn wõt ña, enaaj bar mour.

40 “Jabdewõt eo ej karwaineneik kom̦ ej bar karwaineneik eõ, im jabdewõt eo ej karwaineneik eõ ej bar karwaineneik Eo ear jilkintok eõ. 41 Jabdewõt eo ej kwal̦o̦k karwainene ñan juon armej kõnke armej eo ej juon ri-kanaan, enaaj bõk jeraam̦m̦an ko ri-kanaan ro rej bũki. Jabdewõt eo ej kwal̦o̦k karwainene ñan juon armej kõnke armej eo ej juon ri-wãnõk, enaaj bõk jeraam̦m̦an ko ro rewãnõk rej bũki. 42 Im jabdewõt eo ej lel̦o̦k limen juon iaan rein reddik me rej ri-kal̦oora aebõj, ij ba ñan kom̦ bwe armej in enaaj jeraam̦m̦an.”