Rom

15 Bõtab kõj ro jekajoor, jen jipañ ro rejjab kajoor kõn m̦õjn̦o̦ ko aer, im jen jab l̦õmn̦ak wõt kõn kõn̦aan ko ad make. 2 Kajjojo iaad en kõm̦m̦ani men ko rem̦m̦an ñan eo ri-turin,* bwe en kõkajoore. 3 Christ ear jab l̦õmn̦ak kõn kõn̦aan ko an make, ãinwõt an Jeje ko ba: “Naan ko armej rar ba ñan kajook eok, rar bar kõjerbali ñan kajook eõ.” 4 Aolep men ko kar jei m̦oktal̦o̦k kar jei ñan katakin kõj, kõnke en maroñ wõr ad kõjatdikdik ikijjeen ad kijenmej im ikijjeen naanin kaenõm̦m̦an ko jãn Jeje ko. 5 Im Anij, eo ej jipañ kõj ñan kijenmej im ej letok aenõm̦m̦an, en kõm̦m̦an bwe kom̦win aolep bõk ejja l̦õmn̦ak eo wõt an Christ Jesus, 6 bwe kom̦win maroñ bõrokuk ippãn doon, im kõn juon wõt ainikien,* kom̦win maroñ kaiboojoj Anij, eo ej Jemãn ad Irooj Jesus Christ.

7 Kõn men in, kom̦win karwaineneik doon ãinwõt an kar Christ karwaineneik kom̦, ilo wãween in jej lel̦o̦k aiboojoj ñan Anij. 8 Ij ba ñan kom̦ bwe Christ ear erom ri-jerbal ñan aolep ro rej m̦wijm̦wij ñan kwal̦o̦k bwe aolep iien Anij ej kõnono ilo m̦ool im ñan kam̦ool bwe kallim̦ur ko An ñan ro jim̦m̦aer rem̦ool, 9 im bwe armej in aelõñ ko ren kaiboojoj Anij kõn an tũriam̦o. Jeje ko rej ba: “Eñin unin inaaj kwal̦o̦k kõn kwe ibwiljin ri-aelõñ ko, im inaaj al ñan nõbar ãt eo etam̦.” 10 Bareinwõt ej ba: “Ri-aelõñ ko, kom̦win m̦õn̦õn̦õ ippãn armej ro an.” 11 Ej bar ba: “Kom̦ ri-aelõñ ko, kom̦win aolep nõbar Jeova,* im aolep armej ren nõbare.” 12 Aiseia ear ba: “Enaaj wal̦o̦k okran* Jesse, eo im enaaj tõl aelõñ ko, im aelõñ ko renaaj likũt aer kõjatdikdik ilo e.” 13 Innem Anij, eo ej letok kõjatdikdik en koobrak kom̦ kõn el̦ap lañlõñ im aenõm̦m̦an kõn ami lõke e, bwe kom̦win maroñ obrak* kõn kõjatdikdik ikijjeen kajoor eo an jetõb kwõjarjar.*

14 Ro jeiũ im jatũ, ij lukkuun tõmak bwe kom̦ bareinwõt obrak kõn em̦m̦an, im kõn jel̦ãl̦o̦kjen̦ otemjej, im bwe kom̦ maroñ kajim̦we* doon. 15 Bõtab, ilo aõ jeje ñan kom̦, ewõr jet mel̦el̦e ko el̦apl̦o̦k aõ peran in jejewaj kaki kõnke in maroñ bar kakeememej kom̦, ij kõm̦m̦ane men in kõnke Anij ear kwal̦o̦k jouj eo an el̦ap ñan ña 16 bwe in maroñ ri-jerbal ñan Christ Jesus im kwal̦o̦k kõn ennaan eo em̦m̦an an Anij ñan aolep ri-aelõñ ko. Ij kõm̦m̦ane jerbal in eokkwõjarjar bwe ri-aelõñ ko ren oktak im juon menin joortak em̦m̦an im em̦õj an jetõb kwõjarjar* kokkwõjarjare.

17 Kõn men in, ewõr unin aõ m̦õn̦õn̦õ ãinwõt juon eo ej ri-kal̦ooran Christ Jesus im ej kõm̦m̦ane jerbal eo Anij ear letok. 18 Iban kõnnaan kõn jabdewõt men ijello̦kun wõt men ko Christ ear kõm̦m̦ani ilo an kõjerbal eõ bwe armej in aelõñ ko ren maroñ pokake. Ear kõm̦m̦ane men in ikijjeen naan im kõm̦m̦an ko aõ, 19 kõn kõkal̦l̦e ko im menin bwilõñ ko, im kõn jetõb kwõjarjar,* bwe en lukkuun lõt aõ kwal̦o̦k ennaan eo em̦m̦an kõn Christ jãn Jerusalem l̦o̦k ñan Illirikõm. 20 Ilo m̦ool, em̦õj aõ jek ilo bũruõ bwe in jab kwal̦o̦k kõn ennaan eo em̦m̦an ilo jikin ko em̦õj kadede an armej ro roñ kõn etan Christ, kõnke in jab ekkal ioon pedped eo bar juon ear kõm̦m̦ane. 21 Jeje ko rej ba: “Ro ejjel̦o̦k en̦ ear kõnnaanek er kõn e, renaaj lo e, im ro rejjañin kar roñ kõn e, renaaj mel̦el̦e.”

22 Eñin unin elõñ alen aõ kar jab maroñ iwõj ñan ippemi. 23 Ak kiiõ em̦õj aõ kadedel̦o̦k aolep jikin kã ij kwal̦o̦k naan ie. Bareinwõt, elõñ iiõ* in aõ kõn̦aan lowaj kom̦. 24 Kõn men in, ilo ial̦ eo aõ l̦o̦k ñan Jipein, ij kõjatdikdik bwe inaaj lo kom̦. Innem ãlikin ad naaj ippãn doon ium̦win jidik iien, ikõn̦aan bwe kom̦win itok ippatok ilo jidikin ial̦ eo aõ l̦o̦k ñan ijen̦. 25 Bõtab kiiõ ij etal ñan Jerusalem bwe in jipañ* ro rekkwõjarjar ijen̦. 26 Ro ilo Masedonia im Akeia rar m̦õn̦õn̦õ in ajeji men ko m̦weieer ãinwõt kein jabawõt ñan jipañl̦o̦k ro rejeram̦õl ibwiljin ro rekkwõjarjar ilo Jerusalem. 27 Em̦ool bwe rar m̦õn̦õn̦õ in kõm̦m̦ane men in, bõtab m̦ool eo in ej bwe rein rõm̦uri ñan er, kõnke rein rekkwõjarjar rar ajeji men ko m̦weieer jãn Anij ippãn ri-aelõñ ko. Kõn men in, rej aikuj in jipañ er kõn men ko m̦weieer. 28 Innem, ñe ededel̦o̦k aõ kõm̦m̦ane men in im lel̦o̦k aolepen jaba kein aer, inaaj lowaj kom̦ ilo ial̦ eo aõ l̦o̦k ñan Jipein. 29 Bareinwõt, ijel̦ã bwe ñe inaaj iwõj ñan ippemi, inaaj bõkwaj elõñ jeraam̦m̦an ko jãn Christ.

30 Ro jeiũ im jatũ, ij rõjañ kom̦ ilo etan Irooj Jesus Christ im ikijjeen yokwe eo jetõb kwõjarjar* ej letoke, bwe kom̦win koba ippa im lukkuun jar ñan Anij kõn ña, 31 bwe en kõjparok eõ jãn ro rejjab rũttõmak ilo Judia, im bwe ro rekkwõjarjar ilo Jerusalem ren m̦õn̦õn̦õ in bõk jipañ jãn ña. 32 Ilo wãween in, el̦aññe ej ankilaan Anij bwe in iwõj, inaaj iwõj ilo lañlõñ, im jenaaj kõkajoor doon. 33 Anij, eo ej letok aenõm̦m̦an ñan kõj, en pãd ippemi aolep. Amen.