Epesõs
2 Bareinwõt, meñe kom̦ar mej kõn wõt bõd ko ami im kõn ami jerawiwi, ak Anij ear kõmour kom̦. 2 M̦oktal̦o̦k kom̦ kõn etetal ekkar ñan wãween ko an jukjukun pãd* in ilo lal̦ in, ekkar ñan ri-tõl eo ewõr an maroñ ioon kajoor in mejatoto, kajoor* eo ej jerbal ippãn ro nejin kipiliia. 3 Aet, kõj aolep jekõn kõm̦m̦ani men kein ekkar ñan kõn̦aan ko ad ilo kanniõk, ilo ad katõprak kõn̦aan ko an kanniõk im l̦õmn̦ak ko ad. Bareinwõt, jãn ke jaar l̦otak, jekar ajri ro rej pãd ium̦win illu eo an Anij ãinwõt ro jet. 4 Bõtab Anij ekanooj obrak kõn tũriam̦o, im kõn an l̦ap an yokwe kõj, 5 ear kõmour kõj ippãn Christ meñe jaar mej kõn wõt bõd ko ad—em̦õj lo̦mo̦o̦ren kom̦ ikijjeen jouj eo an el̦ap. 6 Bareinwõt, kõn ad juon wõt ippãn Christ Jesus, Anij ear kõmour kõj im kajijet kõj ijoko ilañ ippãn Christ, 7 kõnke ilo jukjukun pãd* eo ej itok wõt, en maroñ kwal̦o̦k kõn jouj eo an ekanooj in l̦ap ilo an kõm̦m̦an em̦m̦an ñan kõj,* ro rej juon wõt ippãn Christ Jesus.
8 Kõn jouj in an el̦ap, kom̦ij bõk lo̦mo̦o̦r ikijjeen ami tõmak, im men in ejjab wal̦o̦k jãn kõm̦m̦an ko ami make, ak ej menin letok jãn Anij. 9 Aet, ejjab leen jerbal ko ami, innem ejjel̦o̦k unin an juon kõmjãje. 10 Jej kõm̦anm̦an in pein Anij* im kar kõm̦anm̦an kõj bwe jen juon wõt ippãn Christ Jesus ñan kõm̦m̦ani jerbal ko rem̦m̦an, ko Anij ear pepel̦o̦k im̦aan kaki bwe jen kõm̦m̦ani.
11 Innem kom̦, ro rej armej in aelõñ ko jãn ke kom̦ar l̦otak, kom̦win keememej bwe m̦oktal̦o̦k, ro “rej m̦wijm̦wij,”* juon men kõm̦m̦anin pein armej, rekõn ãñinñin kom̦ “ro rejjab m̦wijm̦wij.” 12 Ilo iien eo kom̦ar jaje kõn Christ, kom̦ar jenolo̦k jãn aelõñin Israel, im kom̦ar jab m̦õttan bujen ko kõn kallim̦ur eo, im ekar ejjel̦o̦k ami kõjatdikdik im kom̦ar jaje kõn Anij ilo lal̦ in. 13 Meñe kom̦ar ettol̦o̦k, ak kiiõ ke kom̦ij juon wõt ippãn Christ Jesus, kom̦ij pãd epaake Anij kõn wõt bõtõktõkin Christ. 14 Jej aenõm̦m̦an kõn e, im e eo ear kakobaik ruo kumi bwe ren juon wõt, im ear rupe wõrwõr eo ear kõjepel er jãn doon. 15 Ikijjeen ãnbwinnin,* ear jol̦o̦k men eo ear kõm̦m̦an kõjdat, Kien* eo me ej ejaakin kakien ko im naanin jiroñ ko. Ear kõm̦m̦ane men in bwe kumi kein ruo ren juon wõt ippãn im erom juon armej ekããl, im bwe en kõm̦m̦an aenõm̦m̦an, 16 im ñan kõm̦m̦an bwe rein jim̦or ren erom juon wõt ãnbwin ilo aer lukkuun aenõm̦m̦an ippãn Anij ikijjeen al̦al̦ in eñtaan* eo, kõnke ikijjeen ãnbwinnin, ear jol̦o̦k men eo ej kõm̦m̦an kõjdat. 17 Ear itok im kwal̦o̦k ennaan eo em̦m̦an kõn aenõm̦m̦an ñan kom̦, ro rar ettol̦o̦k jãn Anij, im kwal̦o̦k aenõm̦m̦an ñan ro rej epaake, 18 bwe kõn e, jen aolep jim̦or maroñ kepaake Jemãd jabdewõt iien, kõn ejja jetõb kwõjarjar* eo wõt.
19 Innem ejako ami armej in aelõñ ko jet im ami ruwamãejet, ak kom̦ij uwaan juon wõt aelõñ* ippãn ro rekkwõjarjar im kom̦ij uwaan ro ilo m̦weo im̦õn Anij, 20 im pedped eo kar kalõk kom̦ ioon ej rijjilõk ro im ri-kanaan ro, bõtab Christ Jesus ej dekã eo eaorõktata ilo pedped eo. 21 Ilo ad juon wõt ippãn, aolepen m̦weo ej ejaak ñan juon tampel̦ eokkwõjarjar an Jeova,* ilo an aolepen m̦õttan ko ie koba ippãn doon ilo bõrokuk. 22 Innem ilo ami juon wõt ippãn Christ, Anij ej kalõk kom̦ ippãn doon bwe kom̦win erom juon jikin an kõppãd ikijjeen jetõb kwõjarjar.*