Revelesõn
16 Im iar roñ juon ainikien el̦ap jãn jikin eo eokkwõjarjar* ej ba ñan enjel̦ ro jimjuon: “Kom̦win ilo̦k im lutõkl̦o̦k bowl ko jimjuon n̦a ioon lal̦, bowl in illu an Anij.”
2 Eo kein kajuon ear ilo̦k im lutõkl̦o̦k bowl eo ippãn n̦a ioon lal̦. Innem kinej ko rekauwõtata im nana rar wal̦o̦k ippãn armej ro im kaeñtaane er, ro ewõr ippãer kõkal̦l̦e eo an menninmour awiia eo im rej kabuñ ñan ekjabin menninmour in.
3 Eo kein karuo ear lutõkl̦o̦k bowl eo ippãn ñan lo̦meto, innem ear erom bõtõktõk ãinwõt bõtõktõkin juon eo em̦õj m̦ane, im menninmour otemjej ilo̦jet rar mej.
4 Eo kein kajilu ear lutõkl̦o̦k bowl eo ippãn ñan reba ko im unin dãn ko, innem rar erom bõtõktõk. 5 Im iar roñ an enjel̦ eo ewõr an maroñ ioon dãn ko ba men in: “Kwowãnõk, kwe Eo ej kiiõ, Eo ej m̦okta, im Eo etiljek, bwe kwaar kwal̦o̦k ekajet ilo wãween kein, 6 kõnke rar kato̦o̦rl̦o̦k bõtõktõkin ro rekkwõjarjar im ri-kanaan ro, im kwaar lel̦o̦k ñan er bõtõktõk bwe ren ilimi; men in ej tõllo̦kier.” 7 Im iar roñ juon ainikien jãn lokatok eo, ej ba: “Aet, Jeova* Anij, eo Ekajoor Bõtata, em̦ool im jim̦we ekajet ko am̦.”*
8 Eo kein kãmen ear lutõkl̦o̦k bowl eo ippãn n̦a ioon al̦, innem al̦ ear bõk an maroñ ñan an tile armej ro kõn kajoorin an bwil. 9 Im armej ro rar bwil kõn kajoorin al̦, bõtab rar kõnono n̦ae etan Anij, eo ewõr an maroñ ioon menin kaeñtaan kein, im rar jab ukel̦o̦k im lel̦o̦k aiboojoj ñane.
10 Eo kein kal̦alem ear lutõkl̦o̦k bowl eo ippãn n̦a ioon tũroon eo an menninmour eo eawiia. Innem aelõñ eo an ear marok, im armej ro rar jino kij loer kõn aer eñtaan, 11 im rar kõnono n̦ae Anij in lañ, kõn wõt aer metak im kõn kinej ko aer, im rar jab ukel̦o̦k jãn kõm̦m̦an ko aer.
12 Eo kein kajiljino ear lutõkl̦o̦k bowl eo ippãn ñan reba eo el̦ap etan Upretis, innem dãn ko ie rar m̦õrã bwe en pojak ial̦an kiiñ ro rej itok jãn takin al̦.*
13 Im iar lo jilu ennaan* rettoon ãinwõt frog ko im rej diwõjl̦o̦k jãn lo̦ñiin dragon eo, im jãn lo̦ñiin menninmour awiia eo kab ri-kanaan eo eriab. 14 Ilo m̦ool, mel̦el̦e kein rej jãn jetõb ko rettoon* im rej kõm̦m̦ani menin bwilõñ* ko, im rej ilo̦k ñan ippãn kiiñ ro iaolepen lal̦ ñan kakobaiktok er ippãn doon ñan tarin̦ae eo ilo raan eo el̦ap an Anij, eo Ekajoor Bõtata.
15 “Roñjake m̦õk! Ij iwõj ãinwõt juon ri-ko̦o̦t. Em̦õn̦õn̦õ eo ej ekkõl wõt im kõjparok nuknuk ko an bwe en jab etetal im keelwaan im armej rej lo an jook.”
16 Im rar ko̦kweilo̦ktok er ippãn doon ñan jikin eo n̦aetan ilo kajin Hibru, Armagedon.*
17 Eo kein kajimjuon ear lutõke bowl eo ippãn n̦a imejatoto. Innem juon ainikien el̦ap ear wal̦o̦ktok jãn jikin eo eokkwõjarjar* ilo tũroon eo, im ej ba: “Ededel̦o̦k!” 18 Im ear ejjaromrom im wal̦o̦k ainikien ko im jourur, im ear wal̦o̦k juon m̦akũtkũt lal̦, joñan an l̦ap im kajoor ejjab ãinwõt m̦akũtkũt lal̦ ko rar wal̦o̦k jãn jinoin an wõr armej ioon lal̦. 19 Im jikin eo el̦ap ear jepell̦o̦k ñan jilu m̦õttan, im jikin ko rel̦l̦ap ilo aelõñ ko rar buñ; im Anij ear keememej Babil̦on El̦ap, bwe en lel̦o̦k ñane cup in wain in illu eo An el̦ap. 20 Bareinwõt ãne otemjej rar ko, im ekar jako tol̦ ko. 21 Innem ear wõtlo̦k jãn lañ aij ko rekkillep n̦a ioon armej ro, im eddon kajjojo aij kein enañin juon tal̦õn.* Kõn men in, armej ro rar kõnono n̦ae Anij kõn wõt jorrããn eo ej wal̦o̦k jãn aij ko rekkillep, im kõn an lukkuun l̦ap jorrããn in.