Rom
14 Kom̦win karwaineneik eo em̦õjn̦o̦ ilo tõmak, bõtab jab ekajete kõn an oktak l̦õmn̦ak ko an.* 2 Juon eo ekajoor tõmak eo an ej m̦õñã jabdewõt kain m̦õñã, bõtab eo em̦õjn̦o̦ tõmak eo an ej m̦õñã wõt jãn leen keinikkan ko. 3 Eo ej m̦õñã en jab reilal̦l̦o̦k ñan eo ejjab m̦õñã, im eo ejjab m̦õñã en jab ekajete eo ej m̦õñã, kõnke Anij ear karwaineneiki. 4 Wõn kwe bwe kwõn ekajete eo karejeran bar juon? Ej an irooj eo an pepe ñan kwal̦o̦k el̦aññe ebõd ak ejim̦we men eo armej in ear kõm̦m̦ane. Ilo m̦ool, kõnke Jeova* eo ej jipañ armej in, innem enaaj buñbũruon ippãn.
5 Juon armej emaroñ kõjenolo̦k juon raan im l̦õmn̦ak bwe eaorõkl̦o̦k jãn raan ko jet. Bar juon emaroñ l̦õmn̦ak bwe aolep raan rej joñaer wõt juon. Kajjojo armej en lõke bwe men ko ej tõmaki rejim̦we. 6 Eo ej kautiej juon raan, ej kõm̦m̦ane men in kõn wõt Jeova.* Bareinwõt, eo ej m̦õñã, ej kõm̦m̦ane men in kõn wõt Jeova,* im ej kam̦m̦oolol Anij. Im eo ejjab m̦õñã, ej kõm̦m̦ane men in kõn wõt Jeova,* ijoke armej in ej bar kam̦m̦oolol Anij. 7 Ilo m̦ool, ejjel̦o̦k juon iaad ej mour ñan e make im ejjel̦o̦k juon ej mej ñan e make. 8 Kõnke ñe jej mour, jej mour ñan Jeova,* im ñe jej mej, jej mej ñan Jeova.* Innem jekdo̦o̦n ñe jej mour ak jej mej, jej doon Jeova.* 9 Bwe Christ ear mej im bar mour bwe en maroñ Irooj ioon ro remej im ro remour jim̦or.
10 Kõn men in, etke kwõj ekajete eo jeim̦ ak jatũm̦? Ak etke kwõj reilal̦l̦o̦k ñan eo jeim̦ ak jatũm̦? Kõj aolep jenaaj jutak im̦aan jea in ekajet eo an Anij. 11 Bwe em̦õj je: “‘Ãinwõt ke ij mour,’ Jeova* ej ba, ‘ãindein armej otemjej renaaj bukwelõlõ im lo otemjej renaaj kwal̦o̦k bwe ña ij Anij.’” 12 Innem kajjojo iaad enaaj uwaak kõn e make ñan Anij kõn kõm̦m̦an ko an.
13 Kõn men in, jen bõjrak jãn ad ekajete doon, ak jen jek ilo bũruod bwe jen jab kõm̦m̦an menin an eo jeid ak jatid l̦õkatip ak tipñõl. 14 Ijel̦ã im ij lukkuun tõmak ikijjeen Irooj Jesus bwe ejjel̦o̦k jabdewõt men ej pãd im make ettoon. Ijoke, ñe juon armej ej watõke juon men bwe ettoon, innem men eo enaaj oktak im ettoon ippãn. 15 El̦aññe eo jeim̦ ak jatũm̦ ej l̦õkatip kõn wõt m̦õñã, innem alikkar bwe ejako am̦ jerbal kõn yokwe. Jab kõtl̦o̦k bwe m̦õñã ko kijõm̦ ren ko̦kkure* armej in Christ ear mej kake. 16 Kõn men in, jab kõm̦m̦an menin an armej kõnanaik men ko rem̦m̦an kwõj kõm̦m̦ani. 17 Aelõñ eo an Anij* ejjab kõn m̦õñã im idaak, bõtab ej kõn wãnõk im aenõm̦m̦an im lañlõñ ikijjeen jetõb kwõjarjar.* 18 Jabdewõt eo ej ri-kõm̦akoko ñan Christ ilo wãween in ej kabuñbũruon Anij im armej renaaj kautieje.
19 Innem jen jibadek men ko rej kõm̦m̦an aenõm̦m̦an im men ko rej jipañ kõj ñan kõkajoor doon. 20 Kom̦win bõjrak jãn ami ko̦kkuri jerbal ko an Anij kõn wõt m̦õñã. M̦ool bwe men otemjej rerreo, bõtab ekauwõtata* ñan an juon armej m̦õñã el̦aññe men in enaaj kõm̦m̦an an ro jet l̦õkatip. 21 Em̦m̦antata jab m̦õñã kanniõk ak idaak wain ak kõm̦m̦ane jabdewõt men eo jeim̦ ak jatũm̦ enaaj l̦õkatip kake. 22 Innem kwõn kõm̦m̦an bwe tõmak n̦e am̦ en ikõtaam̦ im Anij wõt. Em̦õn̦õn̦õ armej eo ejjab ekajete e make ekkar ñan men ko ej watõki bwe rem̦m̦an. 23 Bõtab el̦aññe ewõr pere ippãn ak ej wõnm̦aanl̦o̦k wõt im m̦õñã, innem ej liaakel̦o̦k e make kõnke an kõm̦m̦ane men in ejjab pedped ioon tõmak. Ilo m̦ool, aolep men ko rejjab pedped ioon tõmak rej jerawiwi.