Hibru
8 Innem eñin men eo eaorõk kõmij kajjioñ in ba: Ewõr juon ad bũrij l̦apl̦ap ãinwõt in, im ej jijet ituanbwijmaroñin tũroon eo an eo Eutiejtata ijoko ilañ, 2 ej juon ri-jerbal* ilo jikin eo eokkwõjarjar im ilo im̦õn kõppãd eo em̦ool, eo Jeova* ear kajutake im jab armej. 3 Bwe kajjojo bũrij l̦apl̦ap kar jitõñ er ñan bõk eddon ajel̦o̦k menin lel̦o̦k ko kab menin katok ko. Eñin unin, kar menin aikuj ñan an armej in bareinwõt ajel̦o̦k juon menin katok. 4 Ñe en kar pãd ioon lal̦ in, eban kar juon bũrij, kõnke ewõr kadede em̦m̦aan ro em̦õj jitõñ er ñan ajil̦o̦k menin lel̦o̦k ko ekkar ñan Kien eo. 5 Em̦m̦aan rein rej kõm̦m̦ane jerbal in eokkwõjarjar ilo juon wãween ej pijaikl̦o̦k im annañel̦o̦k men ko ilañ, ãinwõt kar bar Moses, ke ear itõn kõm̦m̦ane im̦õn kõppãd eo kar lel̦o̦k kakien in an Anij ñane: Bwe Ear ba: “Kwõn lukkuun lale bwe kwõn kõm̦m̦ani aolep men ko ekkar ñan joñak eo kar kwal̦o̦k ñan kwe ioon tol̦ eo.” 6 Ak kiiõ em̦õj an Jesus bõk juon jerbal ekanooj in em̦m̦anl̦o̦k kõnke e ej bar juon ri-kõllaajrak ñan bujen eo em̦m̦anl̦o̦k, eo em̦õj kapene kõn kallim̦ur ko rem̦m̦anl̦o̦k.
7 El̦aññe en kar ejjel̦o̦k likjab ilo bujen eo m̦okta, innem enaaj kar ejjel̦o̦k unin ñan bar kõm̦m̦ane juon bujen. 8 Bwe ear lo ruõn armej ro ke ear ba: “‘Lo, ej itok wõt raan ko,’ Jeova* ej ba, ‘ñe inaaj kõm̦m̦ane juon bujen ekããl ippãn ro ilo m̦weo im̦õn Israel im ro ilo m̦weo im̦õn Juda. 9 Eban ãinwõt bujen eo iar kõm̦m̦ane ippãn ro jim̦m̦aer ilo raan eo iar jibwe peier im tõll̦o̦k er jãn Ijipt. Unin ej kõnke rar jab pãdwõt ilo bujen eo aõ, im ear bõjrak aõ lale er,’ Jeova* ej ba.
10 “‘Eñin bujen eo inaaj kõm̦m̦ane ippãn ro ilo m̦weo im̦õn Israel ãlikin raan ko,’ Jeova* ej ba. ‘Inaaj likũt kien ko aõ ilo l̦õmn̦ak ko aer im inaaj jei ilo bũrueer, im inaaj erom aer Anij im renaaj erom armej ro aõ.
11 “‘Im reban bar katakin bar juon armej jãn ejja aelõñ eo wõt aer make ak katakin juon jeier im jatier im ba: “Kwõn jel̦ã kajjien Jeova!”* Kõnke er aolep renaaj jel̦ã kajjieõ, jãn eo ettãtata ñan eo eutiejtata iaaer. 12 Inaaj kwal̦o̦k tũriam̦o kõn jerbal ko aer rejjab wãnõk, im ijjãmin bar keememejtok jerawiwi ko aer.’”
13 Ke ear ba “juon bujen ekããl,” ear kõm̦m̦an bwe bujen eo m̦okta en jako an jerbal. Kiiõ juon men eo ejako an jerbal im em̦orl̦o̦k, ej etal ñan an lukkuun jako.