Hibru
3 Kõn men in, kom̦ ro jeiũ im jatũ rekkwõjarjar im em̦õj kũr er ñan lañ, kom̦win kõl̦mãnl̦o̦kjen̦ kõn rijjilõk in im bũrij l̦apl̦ap eo jej kile—Jesus. 2 Ear tiljek ñan Eo ear jitõñe, ãinwõt an kar bar Moses tiljek ilo men otemjej ilo m̦weo im̦õn Anij. 3 Em̦õj watõk e* bwe ej juon eo el̦apl̦o̦k an bõk aiboojoj jãn Moses, kõnke eo ej kalõk juon em̦ el̦apl̦o̦k an bõk nõbar jãn m̦weo ear kalõke. 4 Em̦ool bwe kajjojo em̦ ewõr juon eo ear kalõke, bõtab eo ear kalõk men otemjej ej Anij. 5 Moses ear tiljek ãinwõt juon eo ear ri-lale men otemjej ilo m̦weo im̦õn Anij. Jerbal in an ear jitõñl̦o̦k ñan* men ko naaj kõnono kaki tokãlik. 6 Ak Christ, eo ej Nejin, ear tiljek ilo an bõk eddon m̦weo im̦õn Anij. Jej m̦weo Im̦õn, el̦aññe jej dãpij wõt ñan jem̦l̦o̦kin ad kõnono ilo peran im kõjatdikdik eo jej kõmjãje kake.
7 Kõn men in, ãinwõt an kar jetõb kwõjarjar* ba, “Rainin el̦aññe kom̦ij roñjake ainikiõ, 8 kom̦win jab kakijñeñeik bũruomi ãinwõt ilo iien eo kar kõm̦m̦an aõ lukkuun illu, aet, ilo raan eo ke kar mãlejjoñe eõ ilo ãne jem̦aden, 9 ijo ro jim̦m̦ami rar mãlejjoñe eõ ie meñe rar lo jerbal ko aõ ium̦win 40 iiõ. 10 Eñin unin iar illu ippãn epepen in im ba: ‘Aolep iien bũrueer ej el̦l̦o̦k jãn eõ im rejjañin jel̦ã ial̦ ko aõ.’ 11 Innem iar illu im kallim̦ur im ba: ‘Reban del̦o̦ñ ilo kakkije eo aõ.’”
12 Ro jeiũ im jatũ, kom̦win kõjparok wõt kõnke ikkõl ñe ejino wal̦o̦k ippemi juon bõro enana im ejjel̦o̦k an tõmak kõn ami el̦l̦o̦k jãn Anij eo emour; 13 bõtab kom̦win wõnm̦aanl̦o̦k wõt im rõjañ doon kajjojo raan toon wõt ad mour ilo raan in n̦aetan “Rainin,” bwe en ejjel̦o̦k juon iaami en kakijñeñeik bũruon kõn etao ko an kajoorin jerawiwi. 14 Jej lukkuun ri-jolõt ippãn Christ el̦aññe jej kanooj dãpij wõt ñan jem̦l̦o̦kin men eo jaar tõmake jãn jinoin. 15 Em̦õj kar ba men in, “Rainin el̦aññe kom̦ij roñjake ainikiõ, kom̦win jab kakijñeñeik bũruomi ãinwõt ilo iien eo kar kõm̦m̦an aõ lukkuun illu.”
16 Bwe wõn ro rar roñjake ak rar wõnm̦aanl̦o̦k wõt im lukkuun kalluuki? Ejjab ke aolep ro rar diwõjl̦o̦k jãn Ijipt im rar pãd ium̦win tõl eo an Moses? 17 Bareinwõt, wõn ro Anij ear illu ippãer ium̦win 40 iiõ? Ejjab ke ro rar jerawiwi im rar mej ilo ãne jem̦aden? 18 Im wõn ro ear kallim̦ur bwe reban del̦o̦ñ ilo kakkije eo an? Ejjab ke ro rar jab pokake? 19 Kõn men in, jej lo bwe rein rar jab maroñ in del̦o̦ñe kõn wõt an ejjel̦o̦k aer tõmak.