Revelesõn
7 Ãlikin men in, iar lo emãn enjel̦ rej jutak ilo kona ko emãn ilo lal̦, im rej dãpij kõto ko emãn an lal̦ kõnke en ejjel̦o̦k kõto ej buñut ioon lal̦ ak ioon lo̦meto ak ioon jabdewõt wõjke. 2 Im iar lo bar juon enjel̦ ej wanlõñtak jãn ijo al̦ ej tak ie,* im epãd ippãn kein jiil̦ eo an Anij emour; im ej ikkũrl̦o̦k kõn juon ainikien el̦ap ñan enjel̦ ro emãn kar kamãlim er ñan ko̦kkure lal̦ im lo̦meto, 3 im ej ba: “Kom̦win jab ko̦kkure lal̦ ak lo̦meto ak wõjke ko m̦ae iien em̦õj am jiil̦i dem̦an ri-karejar ro an ad Anij.”
4 Im iar roñ oran ro em̦õj jiil̦i er, oraer ej 144,000, rein kar jiil̦i er rej jãn bwij otemjej an ro nejin Israel:
5 Jãn bwijjin Juda kar jiil̦i 12,000;
jãn bwijjin Ruben 12,000;
jãn bwijjin Gad 12,000;
6 jãn bwijjin Aser 12,000;
jãn bwijjin Naptelai 12,000;
jãn bwijjin Menassa 12,000;
7 jãn bwijjin Simeon 12,000;
jãn bwijjin Livai 12,000;
jãn bwijjin Issakar 12,000;
8 jãn bwijjin Zebulun 12,000;
jãn bwijjin Josep 12,000
im jãn bwijjin Benjamin 12,000.
9 Ãlikin men in, iar reilo̦k im lo juon jar el̦ap ejjel̦o̦k en̦ emaroñ bwine er, im rej itok jãn aolep aelõñ, bwij, im kajin* otemjej kab armej otemjej, im rej jutak im̦aan tũroon eo im im̦aan L̦aam̦ eo, im rej nuknuk mouj im ewõr kimej in ni palm ilo peier. 10 Im ejjab bõjrak aer lam̦õj ilo juon ainikien el̦ap im ba: “Ad lo̦mo̦o̦r ej itok jãn ad Anij, eo ej jijet ioon tũroon eo, im jãn L̦aam̦ eo.”
11 Aolep enjel̦ ro rej jutak im kaapool̦e tũroon eo kab elder ro im enjel̦ ro emãn, im rej buñpedo im̦aan tũroon eo im kabuñ ñan Anij 12 im ba: “Amen! Wũjtak im aiboojoj im mãlõtlõt im kam̦m̦oolol im nõbar im kajoor im maroñ rej an adwõj Anij ñan indeeo im indeeo. Amen.”
13 Innem, juon iaan elder ro ear kajjitõk ippa im ba: “Wõn rein rej nuknuk mouj, im rej itok jãn ia?” 14 Ilo iien eo wõt, iar ba ñane: “Aõ irooj, kwe eo kwõjel̦ã.” Im ear ba ñan eõ: “Errein ro rar el̦l̦ã jãn eñtaan eo el̦ap, im rar kwal̦i nuknuk ko aer im kõmouji kõn bõtõktõkin L̦aam̦ eo. 15 Eñin unin rej pãd im̦aan tũroon eo an Anij, im rej kabuñ ñane raan im boñ ilo tampel̦ eo an; im Eo ej jijet ioon tũroon eo enaaj erl̦o̦ke im̦õn kõppãd eo an ioer. 16 Rejjãmin bar kwõle ak maro, im reban bar eñtaan jãn kajoorin al̦ im jãn an lukkuun bwil, 17 kõnke L̦aam̦ eo, eo ej pãd iturin* tũroon eo, enaaj juon jabõt ñan er im enaaj tõle l̦o̦k er ñan unin dãn ko dãnnin mour. Im Anij enaaj kõm̦õrãik jãn mejãer dãnnin kõmjaal̦al̦ otemjej.”