Rom
13 Armej otemjej ren kõttãik er ñan ri-utiej ro,* kõnke unin aer pãd ej kõn Anij. Anij ear likũti ri-utiej ro ilo ijoko jikier. 2 Kõn men in, jabdewõt eo ej jum̦ae ri-utiej ro, ej jum̦ae karõk eo an Anij, im ro rej jum̦ae karõk eo an Anij, rej liaakel̦o̦k er make ñan ekajet. 3 Unin an ro rej tõl pãd ejjab ñan kõm̦m̦an bwe ro rej kõm̦m̦ani men ko rem̦m̦an ren mijak, bõtab ej bwe ro rej kõm̦m̦ani men ko renana ren mijak. Kokõn̦aan ke bwe en jako am̦ mijak ri-utiej ro? Innem wõnm̦aanl̦o̦k wõt im kõm̦m̦ani men ko rem̦m̦an im kwõnaaj bõk nõbar jãn er, 4 kõnke rej ri-jerbal ñan Anij ñan em̦m̦an eo ami. Bõtab el̦aññe kwõj kõm̦m̦ani men ko renana, innem kwõn mijak kõnke ewõr aer maroñ ñan kajeik eok kõn jãje. Rein rej ri-jerbal ñan Anij, im rej idenon̦e ñan kwal̦o̦k illu* eo an Anij n̦ae ro rej kõm̦m̦ani men ko renana.
5 Kõn men in, elukkuun wõr unin ami aikuj kõttãik kom̦, ejjab kõn wõt illu eo an Anij bõtab ej bareinwõt kõn bõklõkõt ko ami. 6 Eñin unin kom̦ij bar kõl̦l̦ã eowõj, kõnke rej ri-jerbal ñan Anij ilo aer jerbal ñan aolep armej im rej kajejjet eddo in aer. 7 Kom̦win lel̦o̦k men ko kun̦aami ñan ro tõllo̦kier: kom̦win kõl̦l̦ã eowõj ñan eo ej tõltõl eowõj; kom̦win kõl̦l̦ãl̦o̦k ñan eo ej tõllo̦kũn bõk kõl̦l̦ã; kom̦win mijake eo ej tõllo̦kũn bwe kom̦win mijake; kom̦win kwal̦o̦k kautiej ñan eo ej tõllo̦kũn bwe kom̦win kautieje.
8 En ejjel̦o̦k ami m̦uri ippãn jabdewõt armej, m̦uri eo ami dein ñan doon ej yokwe doon; bwe ro rej kwal̦o̦k yokwe ñan doon rej kajejjet kũtien kien eo. 9 Kien eo ej ba, “Kwõn jab lejãn,* kwõn jab uror, kwõn jab ko̦o̦t, kwõn jab an̦okn̦ak.” Kien kein ekoba kien ko jet rej kobain juon wõt kakien, eñin: “Kwõn yokwe ri-turum̦* ãinwõt am̦ yokwe eok make.” 10 Eo ewõr yokwe ippãn eban kõm̦m̦ani men ko renana ñan ro ri-turin. Yokwe ej kajejjet aolepen kien eo.
11 Kom̦win bareinwõt kõm̦m̦ane men kein kõnke kom̦ jel̦ã kõn iien rot in jej pãd ie. Ej iien ami ruj jãn ami kiki, kõnke epaaktok iien ad bõk lo̦mo̦o̦r jãn kar iien eo jaar erom rũttõmak. 12 Epaak an jem̦l̦o̦k an boñ, im m̦õttan jidik eraan. Kõn men in, jen julo̦k jerbal ko an marok im kõn̦ak kein tarin̦ae ko an meram. 13 Jen etetal ilo jim̦we ãinwõt ro rej etetal ilo raan. Jen jab bõk kun̦aad ilo iien iiãio ko robrak kõn m̦anit nana. Bareinwõt, jen jab kadek, mourin l̦õñ, peran in kõm̦m̦ani men ko renana,* ebbanban, im bõk kun̦aad ilo poktak ko. 14 Bõtab jen anõke Irooj Jesus Christ, im jab pepel̦o̦k im̦aan ñan katõprak kõn̦aan ko an kanniõk.