Matu
4 Innem jetõb kwõjarjar* ear tõl Jesus ñan ãne jem̦aden, im Tepil̦ ear itok im kajjioñ kapoiki. 2 Ãlikin an kar Jesus jitlo̦k ium̦win 40 raan im 40 boñ, ear kanooj kwõle, 3 im ri-Kapo eo ear itok ñan ippãn im ba ñane: “El̦aññe kwe nejin Anij, kwõn ba ñan dekã kein bwe ren erom bũreet.” 4 Ak Jesus euwaake im ba: “Em̦õj je: ‘Armej rejjab maroñ mour wõt kõn bũreet, ak rej mour kõn naan ko otemjej rej wal̦o̦ktok jãn lo̦ñiin Jeova.’”*
5 Innem Tepil̦ ear ãñinl̦o̦k Jesus ñan jikin eo eokkwõjarjar,* im bõke ñan ijo eutiejtata ilo tampel̦ eo 6 im ear ba ñane: “Ñe kwe nejin Anij, kwõn kãlal̦l̦o̦k bwe em̦õj je: ‘Enaaj ba ñan enjel̦ ro an kõn kwe bwe ren kõjparok eok,’ im, ‘Renaaj kotak eok kõn peier bwe en jab itaak neem̦ ilo dekã.’” 7 Ak Jesus eba ñane: “Kar bar je: ‘Kwõn jab mãlejjoñe Jeova* am̦ Anij.’”
8 Innem Tepil̦ ear ãñin Jesus ñan juon tol̦ ekanooj utiej im kaalooje kõn aolep aelõñ ko ilo lal̦ in im aer aiboojoj. 9 Im ear ba ñane: “El̦aññe kwõnaaj buñpedo im kabuñ ñan ña juon wõt alen, inaaj lewaj aolep men kein ñan kwe.” 10 Innem Jesus eba ñane: “Kwõn ilo̦k Setan! Bwe em̦õj je: ‘Kwõn kabuñ ñan Jeova* am̦ Anij, im e wõt kwõn karejar ñane.’”* 11 Kõn men in Tepil̦ ear ilo̦k jãne, im enjel̦ ro rar itok im jipañe.
12 Ke Jesus ear roñ bwe em̦õj kalbuuji Jon, ear ilo̦k ñan Galili. 13 Innem ke ear ilo̦k jãn Nazeret, ear etal im jokwe ilo Kaperneum, juon bukwõn iturin lo̦jet ilo ijoko jikin Zebulun im Naptelai 14 bwe en kajejjet kũtien men eo ri-kanaan Aiseia ear kanaan kake, ke ear ba: 15 “Kom̦ armej in jikin ko ilo Zebulun im Naptelai, ro rej jokwe ilo ial̦ eo ñan lom̦al̦o eo iturilikin Reba Jordan ilo Galili, jikin eo eobrak kõn ri-aelõñ ko! 16 Ro rej pãd ilo marok renaaj lo juon meram el̦ap, im armej ro rej pãd ilo lurin mej, meram enaaj rome er.” 17 Im jãn iien eo m̦aanl̦o̦k, Jesus ear jino an kwal̦o̦k naan im ba: “Kom̦win ukel̦o̦k, bwe Aelõñin lañ* epaaktok.”
18 Ke Jesus ear etal iturinl̦o̦k Lom̦al̦o in Galili,* ear lo ruo jemjein jemjati ri-eo̦ñõd rej doorlal̦l̦o̦k juon ok n̦a ilo̦jet. Etaer ej Saimõn, ãt eo juon etan ej Piter, im l̦eo juon ej Andru. 19 Im eba ñan erro: “Kom̦win l̦oor eõ, im inaaj kõm̦m̦an bwe kom̦win ri-eo̦ñõd armej.” 20 Im em̦õkaj aerro likũt ok ko aerro im l̦oore.* 21 Ke ear etal jãn ijo, ear lo bar ruo jemjein jemjati etaer Jemes im Jon. Erro ear pãd ioon juon wa ippãn jemãer etan Zebedi im to̦uk* ok ko aer, im ear kũrl̦o̦k er. 22 Im em̦õkaj aerro etal jãn ippãn jemãer im wa eo, im l̦oore.
23 Im Jesus ear deblo̦ke aolep jikin ko ilo Galili. Innem ear katakin ilo im̦õn kabuñ ko im kwal̦o̦k naan kõn ennaan eo em̦m̦an kõn Aelõñ eo.* Bareinwõt, ear kõmour armej ro jãn jabdewõt nañinmej. 24 Im ennaan eo kõn e ear ajeededl̦o̦k ñan aolepen Siria. Kõn men in, rar bõktok ñan ippãn ro im el̦ap aer eñtaan kõn elõñ kain nañinmej, ro em̦õj an jetõb ko rettoon mo̦k* ilo ãnbwinnier,* ro ewõr aer nañinmej in dibũbbũb, im ro rejaje m̦akũtkũt, im ear kõmour er. 25 Kõn men in, elõñ armej rar itok jãn Galili, Dekapolis, Jerusalem, Judia, im jãn rearin Reba Jordan im l̦oore.