2 Korint

11 Ij kõjatdikdik bwe kom̦ naaj kijenmej ippa kõn an wal̦o̦k jidik aõ jajel̦o̦kjen̦. Ijoke ilo m̦ool, kom̦ij kijenmej ippa! 2 Ij kam̦o kake kom̦ ãinwõt an Anij bar kam̦o kake kom̦,* kõnke ña make iar kallim̦ur bwe inaaj ajel̦o̦k kom̦ bwe kom̦win pãleen Christ, im ikõn̦aan ajel̦o̦k kom̦ ñane ãinwõt juon bõjin erreo. 3 Bõtab ãinwõt an kar jedpãnit eo kapo Iv ilo an kar m̦on̦e, ikkõl ñe juon enaaj iwõj im ko̦kkure l̦õmn̦ak ko ami bwe en jako ami m̦ool im erreo ñan Christ. 4 Unin aõ ba ej kõnke ñe jabdewõt ej iwõj im kwal̦o̦k kõn bar juon Jesus ijello̦kun Jesus eo kõmij kwal̦o̦k kake, ak el̦aññe kom̦ij bar bõk juon kain jetõb eoktak jãn jetõb* eo kom̦ar bõke, ak el̦aññe kom̦ij roñjake juon ennaan em̦m̦an me eoktak jãn ennaan eo kom̦ar tõmake, kom̦ij kajju tõmake armej in. 5 Ilo aõ baj l̦õmn̦ak, ejjel̦o̦k men en̦ ej kam̦ool bwe ittãl̦o̦k jãn rijjilõk em̦m̦anm̦õn ran̦e ami ilo jabdewõt wãween. 6 Meñe imaroñ jab wãjepdik ilo kõnnaan, bõtab ejjab ãindein ñe ej itok ñan jel̦ãl̦o̦kjen̦. Ilo m̦ool, kõmar kam̦oole men in ñan kom̦ ilo wãween otemjej im men otemjej.

7 Ak ke iar kõttãik eõ make bwe kom̦win utiej ilo aõ kar m̦õn̦õn̦õ in kwal̦o̦k kõn ennaan eo em̦m̦an an Anij ñan kom̦ ilo ejjel̦o̦k on̦ããn, ta kar jerawiwi men in ke? 8 Ke iar bõk jipañ jãn eklejia ko jet bwe in maroñ jipañ kom̦, men in ej ãinwõt ñe iar ko̦o̦te er. 9 Bõtab ke iar pãd ippemi im pãd ilo aikuj, iar jab kõm̦m̦an bwe jabdewõt iaami en eddodo kake eõ, kõnke ro jeid im jatid me rar itok jãn Masedonia rar lukkuun kabwe aolep aikuj ko aõ. Ilo jabdewõt wãween, iar lukkuun kõjparok bwe kom̦win jab eddodo kake ña, im inaaj kate eõ bwe en ãindein m̦aanl̦o̦k wõt. 10 Bõtab toon wõt an m̦ool eo kõn Christ pãd ilo ña, iban bõjrak jãn aõ kõmjãje ilo jikin ko ilo Akeia. 11 Etke iar kõm̦m̦ane men in? Kõn aõ jab yokwe kom̦ ke? Anij ejel̦ã bwe ij yokwe kom̦.

12 Inaaj wõnm̦aanl̦o̦k ilo aõ kõm̦m̦ani men ko ij kõm̦m̦ani kiiõ, kõnke armej ran̦e me rekõn̦aan bwe ren joñan wõt juon ippemmim ilo men kein,* en ejjel̦o̦k pedpedin aer kõmjãje. 13 Em̦m̦aan ran̦e rej riabin rijjilõk, rej ri-jerbal etao, im rej ukot m̦õraer bwe en ãinwõt ñe er rijjilõk an Christ. 14 Ejjab menin bwilõñ men in, kõnke Setan ej make ukot m̦õran bwe en ãinwõt ñe e juon enjel̦ in meram. 15 Kõn men in, jejjab bwilõñ ñe ri-karejar ro an rej bar ukot m̦õraer im ãinwõt ñe rej kõm̦m̦ani men ko rem̦m̦an. Ijoke ilo jem̦l̦o̦kin, renaaj bõk leen jerbal ko aer.

16 Bar juon alen, ij ba men in: Ejjel̦o̦k juon en l̦õmn̦ak bwe ña juon eo ejajel̦o̦kjen̦. Bõtab el̦aññe kom̦ij l̦õmn̦ak rot in, kom̦win kõtl̦o̦k bwe in kõnnaan ãinwõt juon eo ejajel̦o̦kjen̦ bwe in maroñ kõmjãje jidik. 17 Men eo ij ba kiiõ, ijjab ba ãinwõt juon eo ej l̦oore joñak eo an Irooj, bõtab ij ba ãinwõt an juon eo ejajel̦o̦kjen̦ naaj kar ba ilo an kõmjãje im lõke e make. 18 Ãinwõt ke elõñ rej kõmjãje kõn men ko an lal̦ in,* ña bareinwõt inaaj kõmjãje. 19 Ke kom̦ij ba “kõm rimmãlõtlõt,” innem etke kom̦ij m̦õn̦õn̦õ in anlo̦ke ro rejajel̦o̦kjen̦? 20 Ilo m̦ool, kom̦ij anlo̦ke jabdewõt eo ej kõm̦akokoik kom̦, jabdewõt eo ej bõk men ko m̦weiemi im men ko ewõr ippemi, jabdewõt eo ej kautiej e make ioomi, im jabdewõt eo ej jeptake kom̦.

21 Men in ij ba ekajjookok ñan kõm, kõnke jet iaami remaroñ kar l̦õmn̦ak bwe kõm lukkuun m̦õjn̦o̦.

Bõtab el̦aññe jet rej peran ilo aer kõmjãje⁠—ña ij kõnnaan ãinwõt juon ri-jajel̦o̦kjen̦⁠—ña bareinwõt inaaj peran ilo aõ kõmjãje. 22 Er ke ri-Hibru? Bar ña ri-Hibru. Er ke ri-Israel? Bar ña ri-Israel. Er ke nejin* Ebream? Eokwe bar ña. 23 Er ke ri-jerbal an Christ? Inaaj uwaak ãinwõt juon eo eanniabeab, ña ij juon ri-jerbal eo em̦m̦anl̦o̦k: Elõñl̦o̦k jerbal ko iar kõm̦m̦ani, elõñl̦o̦k alen aõ kar kalbuuj, elukkuun lõñ alen aer kar m̦an eõ, im elõñ alen ibaj wõt mej. 24 L̦alem alen an kar ri-Ju ro deñl̦o̦k eõ kõn 39 deñdeñ, 25 jilu alen an kar armej m̦an eõ kõn al̦al̦, juon alen aer kar kad eõ, jilu alen an kar rup wa ko iar ejjerakrõk ie, im juon raan im juon boñ in aõ kar pel̦o̦k ilo lom̦al̦o. 26 Eokkutkut aõ kar itoitak im iioon kauwõtata. Iar iioon kauwõtata ilo reba ko, jãn ri-ko̦o̦t ro, jãn armej ro aõ, im jãn ri-aelõñ ko. Bareinwõt, iar pãd ilo kauwõtata ke iar pãd ilo jikin ko rel̦l̦ap, ilo ãne jem̦aden, ilo lom̦al̦o, im ke iar pãd ibwiljin rũttõmak ro rewaan. 27 Ear l̦ap aõ jerbal im eñtaan, emmakijkij aõ jab kiki in boñ, ikõn kwõle im maro, im emmakijkij an ejjel̦o̦k kijõ, aõ pio̦, im an jabwe ballũ.*

28 Ijello̦kun men kein, ebar wõr juon men ij eñtaan kake jãn raan ñan raan:* ej ilo aõ inepata kõn aolep eklejia ko. 29 Ñe juon em̦õjn̦o̦, ta ijjab bar m̦õjn̦o̦ ke? Ñe juon ej buñ jãn tõmak, ta ijjab lukkuun inepata ke?

30 El̦aññe ej menin aikuj bwe in kõmjãje, inaaj kõmjãje kõn men ko rej kwal̦o̦k aõ m̦õjn̦o̦. 31 Anij, eo ej Jemãn Irooj Jesus, im Eo jej aikuj nõbare ñan indeeo, ejel̦ã bwe ijjab riab. 32 Kom̦ja* eo ilo Damaskõs im ej pãd ium̦win Kiiñ Aritas ear illik ri-waj ilo Damaskõs bwe ren kajjioñ jibwe eõ, 33 bõtab ikar deor jãne kõnke kar doorlal̦l̦o̦k ña ilowaan juon iep jãn juon wũntõ ilo wõrwõrin jikin in.