Rom
4 El̦aññe ãindein, ta eo jenaaj ba kõn Ebream, eo jim̦m̦aad im jaar itok jãne? 2 Ñan waanjoñak, el̦aññe kar kõwãnõk Ebream kõn wõt jerbal ko an, enaaj kar wõr unin an kõmjãje, bõtab ejjel̦o̦k unin an kõmjãje im̦aan mejãn Anij. 3 Bwe ta ko Jeje ko rej ba? “Ebream ear likũt an tõmak ilo Jeova,* kõn men in, kar kõwãnõke.” 4 Ñe juon armej ej jerbal, enaaj bõk on̦ããn kõnke rej aikuj kõl̦l̦ãiki,* ejjab kõnke rej kwal̦o̦k jouj ñane. 5 Bõtab, ñe juon armej ejjab jerbal ijoke ej likũt an tõmak ilo Eo im ej kõwãnõk rijjerawiwi ro, eokwe naaj watõke ewãnõk kõn wõt an tõmak. 6 Devid ear kõnono kõn an juon armej m̦õn̦õn̦õ el̦aññe Anij ej watõke bwe ewãnõk, bõtab ejjab kõn jerbal ko an. Ear ba: 7 “Em̦õn̦õn̦õ ro em̦õj jol̦o̦k aer bõd meñe rar kõm̦m̦ani men ko renana im ro em̦õj kalbubu* jerawiwi ko aer. 8 Em̦õn̦õn̦õ armej eo me Jeova* eban keememej jerawiwi ko an.”
9 Innem, m̦õn̦õn̦õ in ej ke ñan ro wõt em̦õj aer m̦wijm̦wij? Ta ejjab bar ñan ro rejjab m̦wijm̦wij ke? Men eo jekar ba in: “Kar kõwãnõk Ebream kõn wõt tõmak eo an.” 10 Ñããt eo kar watõke bwe ewãnõk? Ilo iien eo em̦õj an m̦wijm̦wij ke ak ilo iien eo ejjañin kar m̦wijm̦wij? Ej ilo iien eo ejjañin kar m̦wijm̦wij. 11 Ke Anij ear jiroñe bwe en m̦wijm̦wij, men in ear ãinwõt juon kõkal̦l̦e ñan kam̦ool* bwe ear wãnõk kõn wõt tõmak eo an ilo iien eo ejjañin kar m̦wijm̦wij. Ilo wãween in, en maroñ erom jemãn aolep ro ewõr aer tõmak meñe rejjab m̦wijm̦wij, bwe Anij en maroñ watõk er rewãnõk. 12 Bareinwõt, bwe en maroñ erom jemãn ro rej m̦wijm̦wij, im ejjab ro wõt rej l̦oore kien eo kõn m̦wijm̦wij, ak bar jemãn ro rej lukkuun anõke wãween an kar jemãd Ebream kwal̦o̦k an tõmak ilo iien eo ejjañin kar m̦wijm̦wij.
13 Ebream ak ro nejin* rar bõk kallim̦ur eo bwe Ebream enaaj jolõte juon lal̦,* ijoke ejjab ikijjeen an pokake kien eo. Bõtab ear bõk kallim̦ur in kõnke kar watõke ewãnõk kõn wõt tõmak eo an. 14 El̦aññe ro rej pokake kien eo rej ri-jolõt, eokwe ejjel̦o̦k tokjãn tõmak im ejako kallim̦ur eo. 15 Ilo m̦ool, Kien Moses ej kwal̦o̦k illu eo an Anij, bõtab ñe ejjel̦o̦k kien, enaaj ejjel̦o̦k ri-ko̦kkure kien.
16 Eñin unin ikijjeen tõmak, enaaj lukkuun jejjet kũtien kallim̦ur eo ñan aolep ro nejin,* ekkar ñan jouj eo el̦ap an Anij. Eban ñan ro wõt rej l̦oore Kien eo, ak enaaj bareinwõt ñan ro rej anõke tõmak eo an Ebream, eo ej jemãdwõj aolep. 17 (Bwe Jeje ko rej ba: “Iar kããlõt eok bwe kwõn jemãn elõñ aelõñ.”) Men in ear wal̦o̦k im̦aan Anij, eo Ebream ear likũt an tõmak ilo E, im eo ej kõmour ro remej im ej kõnnaan kõn men ko rejjañin wal̦o̦k ãinwõt ñe em̦õj kadede aer wal̦o̦k. 18 Meñe ekar ejjel̦o̦k pedpedin an kõjatdikdik, bõtab ear kõjatdikdik wõt im tõmak bwe enaaj erom jemãn elõñ aelõñ, ekkar ñan men eo kar ba ñane: “Enaaj lõñin dein ro nejũm̦.”* 19 Im meñe tõmak eo an ear jab m̦õjn̦o̦l̦o̦k, ak ear watõk ãnbwinnin bwe emej (kõnke epaak an 100 an iiõ), im ear watõke Sera juon eo ejjab maroñ wõr nejin. 20 Ak kõn wõt kallim̦ur eo an Anij, ear jab jako an tõmak, ijoke ear kajoorl̦o̦k wõt tõmak eo an im ear nõbar Anij, 21 im ear lukkuun tõmak bwe Anij enaaj kajejjete kallim̦ur eo an ñane. 22 Kõn men in, “kar kõwãnõke.”
23 Bõtab, naan kein, “kar watõke,” kar jab jei ñan e wõt, 24 ak kar bar jei ñan kõj, ro naaj watõk er bwe rewãnõk kõnke jej tõmak ilo Eo ear kõjerkakpejeik Jesus, ad Irooj. 25 Kar letok bwe en mej kõn jerawiwi ko ad, im kar kõjerkakpejeiki ñan an Anij maroñ watõk kõj ro rewãnõk.