Luk

16 Ear bar ba ñan ri-kal̦oor ro an im ba: “Ewõr juon em̦m̦aan em̦weiie im rar kinaakl̦o̦k ri-karejar eo an* ñane kõn an jerwaane men ko m̦weien. 2 Kõn men in, ear kũrtok ri-karejar eo an im ba, ‘Ta kein ij roñ aer ba kaki kõn kwe? Kwõn je aolep men ko kwaar kõjerbal jããn ko aõ ñani bwe ejem̦l̦o̦k am̦ bõk eddon m̦wiin im̦õ.’ 3 Innem ri-karejar eo ear ba ilo bũruon im ba, ‘Kiiõ inaaj ita ke irooj en̦ aõ ej pojakin jol̦o̦k aõ jerbal ippãn? Ijjab kajoor ñan aõ jerbal ilo jikin kallib ko, kab ijook in owar. 4 Ijel̦ã ta eo in kõm̦m̦ane bwe armej ren karwaineneik eõ ñan m̦õko im̦weer ñe ejol̦o̦k aõ jerbal ñane.’ 5 Innem ear kũrtok armej ro rõm̦uri ippãn irooj eo an, juon illo̦k juon. Im ear kajjitõk ippãn eo m̦oktata im ba, ‘Jete am̦ m̦uri ippãn irooj en̦ aõ?’ 6 Im eba, ‘600 kõl̦an* in olive weil̦.’ Im eba ñane, ‘Kwõn bõk peba in m̦uri n̦e am̦, im kwõn kaiur im jijet im je im ba 300.’ 7 Tokãlik, ear kajjitõk ippãn eo juon, ‘Ak kwe, jete am̦ m̦uri ippãn irooj en̦ aõ?’ Im eba, ‘100 iep* in wiit.’ Im eba ñane, ‘Kwõn bõk peba in m̦uri n̦e am̦, im kwõn je im ba 80.’ 8 Meñe ri-karejar eo ejjab em̦m̦an ak irooj eo an ekar nõbare kõn an kar kwal̦o̦k an mãlõtlõt. Ñe ej itok ñan jerbal ippãn ro jet, armej in jukjukun pãd* in remãlõtlõtl̦o̦k jãn armej ro rej pãd ilo meram.

9 “Bareinwõt ij ba ñan kom̦ men in: Kom̦win kõjerbal m̦weiuk ko an lal̦ in* ñan kõm̦m̦an bwe en wõr m̦õttami kõnke ñe emaat m̦weiuk kein, rein m̦õttami renaaj karwaineneik kom̦ ñan jikin jokwe ko rej ñan indeeo. 10 Eo ej tiljek kõn men ko reddik, ej bar tiljek kõn men ko rel̦l̦ap, im eo ejjab tiljek kõn men ko reddik, ejjab bar tiljek kõn men ko rel̦l̦ap. 11 Kõn men in, el̦aññe kom̦ij jab kwal̦o̦k ami tiljek kõn wãween ami kõjerbali m̦weiuk ko an lal̦ in, innem wõn enaaj kappeik kom̦ bwe kom̦win bõk eddon m̦weiuk ko rem̦ool? 12 Im el̦aññe kom̦ij jab tiljek kõn men ko m̦weien ro jet, wõn enaaj lewaj m̦weiemi? 13 Ejjel̦o̦k en̦ emaroñ karejar ñan ruo irooj kõnke enaaj yokwe juon im dike eo juon, im enaaj tiljek ñan juon im kõjdate eo juon. Kom̦ij jab maroñ karejar ñan Anij im ilo ejja iien eo wõt karejar ñan M̦weiuk.”*

14 Parisi ro rar roñjake aolep men kein ear ba im rar jino kõrraate kõnke el̦ap aer arõk* jããn. 15 Kõn men in, ear jiroñl̦o̦k er im ba: “Kom̦ij make kõwãnõk kom̦ im̦aan mejãn armej, bõtab Anij ejel̦ã kobban bũruomi. Men ko armej rej watõki bwe raorõk, rekajjõjõ im̦aan mejãn Anij.

16 “Kien Moses im naan ko an ri-Kanaan ro rej ñan tõre ko m̦aantak m̦ae iien ko an Jon. Innem jãn kar tõre in m̦aanl̦o̦k, kar kwal̦o̦k kõn ennaan eo em̦m̦an kõn Aelõñ eo an Anij,* im aolep kain armej rej kate er bwe ren maroñ del̦o̦ñe. 17 Meñe lañ im lal̦ remaroñ jako, ak ejjel̦o̦k juon iaan naan ko* ilo Kien eo enaaj jako m̦ae iien enaaj jejjet kũtien.

18 “Jabdewõt eo ej jepel jãn lio pãleen im m̦areik bar juon ej lejãn,* im jabdewõt eo ej m̦areik juon kõrã me ear jepel jãn l̦eo pãleen ej lejãn.

19 “Ewõr juon em̦m̦aan em̦weiie ekõn ekkõn̦ak nuknuk piolõt ko rel̦l̦ap on̦ãer, im aolep raan ej lañlõñ kõn an em̦m̦an kõjeiien im an lõñ m̦weien. 20 Bareinwõt, ewõr juon em̦m̦aan ejeram̦õl* etan Lazerõs im ebakke aolepen ãnbwinnin. Rekõn bõkl̦o̦k l̦ein im likũti im̦aan kõjãmin wõrwõr eo an ri-m̦weiie eo, 21 im kidu ko rekõn itok im dam̦wiji bakke ko ilo ãnbwinnin. L̦ein ear kõn̦aan attũkokoik bũrar ko rej wõtlo̦k jãn tebõl̦ eo an ri-m̦weiie eo. 22 Tokãlik, em̦m̦aan eo ejeram̦õl ear mej im enjel̦ ro rar bõkl̦o̦ke ñan iturin Ebream.*

“Ri-m̦weiie eo ear bar mej im rar kalibwini. 23 Ear eñtaan ilo iien eo ear pãd ilowaan Lõb,* im ear reilõñl̦o̦k jãn ijo ettol̦o̦k im lo Ebream im lo an Lazerõs pãd iturin.* 24 Kõn men in, ear ikkũrl̦o̦k im ba, ‘Jema Ebream, kwõn tũriam̦okake eõ. Kwõn jilkintok Lazerõs bwe en katulo̦k m̦aan addiin pein ilo dãn im kam̦õl̦oiki loõ kõnke ilukkuun eñtaan ilo kijeek e.’ 25 Bõtab Ebream ear ba, ‘Nejũ, keememej bwe ke kwaar mour elukkuun kar lõñ men ko m̦weiõm̦ im kwaar m̦õn̦õn̦õ kaki, ak Lazerõs ear lukkuun eñtaan. Bõtab kiiõ ej aenõm̦m̦an ijin, ak kwe kwõj eñtaan. 26 Im ejjab men kein wõt ak ewõr juon kõk ekilep im em̦wilal̦ em̦õj likũti ikõtaammim im ikõtaami bwe ro rekõn̦aan iwõj jãn ije ñan ippemi ren jab maroñ iwõj, im ro ijen̦e ren jab maroñ itok ñan ije ippemmim.’ 27 Innem eba, ‘Jema, el̦aññe ãindein, eokwe ij kajjitõk bwe kwõn jilkinl̦o̦k Lazerõs ñan m̦weo im̦õn jema, 28 kõnke ewõr l̦alem jeiũ im jatũ em̦m̦aan, im en etal im kakkõl er bwe ren jab itok ñan ijin el̦ap eñtaan ie.’ 29 Bõtab Ebream ear ba, ‘Naan ko Moses ear je kab naan ko an ri-Kanaan ro repãd ippãer, kõtl̦o̦k bwe ren make pokake naan kein.’ 30 Innem eba, ‘Jema Ebream reban pokaki naan kein, bõtab ñe juon enaaj jerkak jãn mej im jãdel̦o̦k ñan ippãer, innem rej kab naaj ukel̦o̦k.’ 31 Bõtab eba ñane, ‘El̦aññe rejjab pokake naan ko Moses ear je im naan ko an ri-Kanaan ro, innem rejjãmin bar pokake naan ko an juon eo ej jerkak jãn mej.’”