Jon

6 Ãlikin men in, Jesus ear jerakl̦o̦k ñan ijo turãjet ilo Lom̦al̦o in Galili,* ak Taibiriõs. 2 Juon jarlepju el̦ap ear l̦oorel̦o̦k kõnke rar lo an kõm̦m̦an menin bwilõñ ke ear kõmour ro renañinmej. 3 Innem Jesus im ri-kal̦oor ro an rar wanlõñl̦o̦k ñan juon tol̦, im rar jijet. 4 Ak kiiõ ear epaaktok iien Kwõjkwõjin Kijoone eo, kwõjkwõj eo an ri-Ju ro. 5 Ke Jesus ear reilo̦k im lo an jarlepju eo itok ñan ippãn, ear ba ñan Pilip: “Jenaaj wia ia pilawã bwe armej rein ren m̦õñã?” 6 Jesus ejel̦ã kadede ta eo enaaj kõm̦m̦ane, bõtab ear ba men in ñan mãlejjoñe Pilip. 7 Innem Pilip ear uwaak im ba: “Jekdo̦o̦n ñe jenaaj wia pilawã kõn tarrin 200 denarii* ak eban bwe ñan an aolep kajjidikdik.” 8 Im juon iaan ri-kal̦oor ro an etan Andru, l̦eo jatin* Saimõn Piter, ear ba ñane: 9 “Juon iõ l̦addik ewõr l̦alem pilawã* im ruo ek ippãn. Ak ewõr ke tokjãn men kein ñan armej rein rellõñ?”

10 Innem Jesus ear ba: “Kom̦win kajijet armej ran̦e.” Innem rar jijet ijo kõnke elukkuun ujooje. Ibwiljin jarlepju eo, ear wõr enañin 5,000 em̦m̦aan. 11 Jesus ear bõk pilawã ko im ãlikin an kam̦m̦oolol Anij, ear ajeji ñan ro rar jijet ijo. Ear bar kõm̦m̦ane men in ñan ek jiddik ko im erwõj ar m̦õñã ñan aer kõn̦aan. 12 Ke rar mat, ear jiroñl̦o̦k ri-kal̦oor ro an im ba: “Aini bween pilawã kan̦e bwe jen jab ko̦kkuri.” 13 Innem ke rar aini bween pilawã ko, ear obrak 12 iep jãn kar bween pilawã ko l̦alem armej ro rar m̦õñã jãni.

14 Ke armej ro rar lo menin kabwilõñlõñ* in ear kõm̦m̦ane, rar ba: “Lukkuun m̦ool ke ri-Kanaan eo in kar kanaan bwe enaaj itok ñan lal̦ in.” 15 Innem ke Jesus ear jel̦ã bwe rej itõn bõke im kõm̦m̦an bwe en kiiñ, ear bar ilo̦k ñan tol̦ eo im make iaan ie.

16 Ke ear jota, ri-kal̦oor ro an rar wanlal̦l̦o̦k ñan lom̦al̦o eo 17 im rar uwe ilo juon wa im jerakl̦o̦k ñan Kaperneum, ijo turãjetin lom̦al̦o eo. Ilo tõre in, em̦õj an jok marok ak Jesus ejjañin itok ñan ippãer. 18 Bareinwõt, ear jino nana lo̦jet kõnke ebuñ juon kõto el̦ap. 19 Bõtab ãlikin aer kar aõn̦õn̦ ium̦win jilu ak emãn m̦ail̦, rar lo an Jesus etetal ioon dãn im kõttõparl̦o̦k wa eo, im rar lukkuun mijak. 20 Ak ear ba ñan er: “Kom̦win jab mijak bwe ña e!” 21 Kõn men in, rar m̦õn̦õn̦õ in ektake ilo wa eo, im ear m̦õkaj an wa eo tõparl̦o̦k ãneo rar jibadekl̦o̦k.

22 Raan eo tok juon, jarlepju eo me ear pãd iturãjetin lom̦al̦o eo ear kile bwe ekar ejjel̦o̦k wa ijo ijello̦kun wõt kar juon wa jidikdik. Rar bar kile bwe ri-kal̦oor ro rar jerak kake wa eo ak ejako Jesus ippãer. 23 Jet wa jãn Taibiriõs rar pol̦o̦k iturin jikin eo armej ro rar m̦õñã pilawã ie ãlikin an kar Irooj kam̦m̦oolol Anij. 24 Kõn men in, ke jarlepju eo ear jab loe Jesus ak ri-kal̦oor ro an ijo, rar uwe ilo wa kein im etal ñan Kaperneum bwe ren pukot Jesus.

25 Innem ke rar loe ilo jikin eo iturãjetin lom̦al̦o eo, rar kajjitõk ippãn im ba: “Rabbai,* kwaar itok ñããt ñan ijin?” 26 Jesus ear uwaake er im ba: “Ij ba ñan kom̦ bwe unin ami pukot eõ ej kõnke kom̦ar m̦õñã jãn pilawã ko im mat, im ejjab kõn menin kabwilõñlõñ* ko kom̦ar loi. 27 Kom̦win jab jerbal kõn m̦õñã ko renaaj kõt, ak kom̦win jerbal kõn m̦õñã ko reban kõt im rej letok mour indeeo, ko Nejin armej* enaaj liwaj. Eñin ej eo im em̦õj an Anij, Jemãdwõj ilañ, kaalikkar* bwe ebuñbũruon ippãn.”

28 Innem rar ba ñane: “Ta eo kõmij aikuj kõm̦m̦ane bwe Anij en buñbũruon ippem?” 29 Innem Jesus ear uwaak er: “Eñin men eo Anij ekõn̦aan bwe kom̦win kõm̦m̦ane, bwe kom̦win kwal̦o̦k ami tõmak ilo eo ear jilkintok.” 30 Im rar ba ñane: “Ta kõkal̦l̦e n̦e kwõnaaj kõm̦m̦ane bwe kõmin loe im tõmak eok? Ta kan̦e kwõnaaj kõm̦m̦ani? 31 Ro jim̦m̦aad rar m̦õñã manna ilo ãne jem̦aden, ãinwõt an kar Jeje ko ba: ‘Ear lel̦o̦k ñan er bũreet jãn lañ bwe ren m̦õñã.’” 32 Innem Jesus ear ba ñan er: “Ij ba ñan kom̦ bwe Moses ear jab lewaj ñan kom̦ bũreet eo jãn lañ, ak rainin, Jema ej lewaj ñan kom̦ bũreet eo em̦ool jãn lañ. 33 Bũreet eo jãn Anij ej eo me ear wanlal̦tak jãn lañ im lel̦o̦k mour ñan armej ro ilo lal̦ in.” 34 Innem rar ba ñane: “Irooj, iien otemjej kwõn letok bũreet in ñan kõm.”

35 Im Jesus eba ñan er: “Ña bũreet in mour. Jabdewõt eo ej itok ñan ippa, ejjãmin kwõle im jabdewõt eo ej kwal̦o̦k an tõmak ilo ña, ejjãmin maro. 36 Bõtab ãinwõt aõ kar ba, meñe kom̦ar lo eõ ak kom̦ij jab tõmak. 37 Aolep ro Jema ej letok ñan eõ renaaj itok ñan ippa, im ijjãmin ubaakel̦o̦k eo ej itok ñan ippa. 38 Iar wanlal̦tak jãn lañ bwe in kõm̦anm̦an ankilaan eo ear jilkintok eõ im jab ankilaõ. 39 Ej ankilaan eo ear jilkintok eõ bwe en jab jako jãn ña jabdewõt iaan ro ear letok ñan eõ, ak bwe in kõjerkakpejeik aolepeer ilo raan eo ãliktata. 40 Ej ankilaan Jema bwe jabdewõt eo ej kile Nejin im kwal̦o̦k an tõmak ilo e en bõk mour indeeo, innem inaaj kõjerkakpejeiki ilo raan eo ãliktata.”

41 Innem ri-Ju ro rar jino aer ellotaane kõn an kar ba: “Ña bũreet eo ear wanlal̦tak jãn lañ.” 42 Im rar jino ba: “Ejjab Jesus eo nejin Josep in ke? Jejel̦ã kajjien jemãn im jinen, ak kiiõ etke ejaam̦ ba, ‘Iar wanlal̦tak jãn lañ’?” 43 Innem Jesus ear ba ñan er: “Kom̦win bõjrak jãn ami ellotaan. 44 Ejjel̦o̦k en̦ emaroñ itok ñan ippa el̦aññe Jema, eo ear jilkintok eõ, ejjab karuwaaktok ñan ippa, im inaaj kõjerkakpejeiki ilo raan eo ãliktata. 45 Ri-kanaan ro rar je: ‘Jeova* enaaj katakin aolep armej ro.’ Jabdewõt eo ej roñjake Jema im katak jãne ej itok ñan ippa. 46 Ejjel̦o̦k jabdewõt armej en̦ em̦õj an loe Jema, ak ña wõt, eo im ear itok jãn Anij. Ña wõt em̦õj aõ lo Jema. 47 Em̦ool ij ba ñan kom̦ bwe jabdewõt eo ej tõmak ilo ña, enaaj bõk mour indeeo.

48 “Ña bũreet in mour. 49 Ro jim̦m̦ami rar m̦õñã manna ilo ãne jem̦aden, ak rar mej. 50 Bõtab jabdewõt eo ej m̦õñã jãn bũreet eo em̦ool me ear wanlal̦tak jãn lañ, eban mej. 51 Ña bũreet in mour eo ear wanlal̦tak jãn lañ. El̦aññe jabdewõt ej m̦õñã jãn bũreet in, enaaj mour ñan indeeo. Ilo m̦ool, kanniõkũ ej bũreet eo inaaj lel̦o̦k bwe armej ro ilo lal̦ in ren maroñ mour.”

52 Kõn men in, ri-Ju ro rar jino akwããle doon im ba: “Ewi wãween an em̦m̦aan in maroñ letok kanniõkin bwe jen kañe?” 53 Bõtab Jesus ear ba ñan er: “Ij ba ñan kom̦ bwe el̦aññe kom̦ij jab m̦õñã kanniõkin Nejin armej im idaak bõtõktõkin, kom̦ jãmin bõk mour.* 54 Jabdewõt eo ej m̦õñã kanniõkũ im idaak bõtõktõkũ enaaj bõk mour indeeo, im inaaj kõjerkakpejeiki ilo raan eo ãliktata. 55 Kanniõkũ ej m̦õñã eo em̦ool, im bõtõktõkũ ej dãnnin idaak eo em̦ool. 56 Jabdewõt eo ej m̦õñã kanniõkũ im idaak bõtõktõkũ ej bõro wõt juon ippa, im ij bõro wõt juon ippãn. 57 Jema, eo emour, ear jilkintok eõ im ij mour kõn wõt Jema. Ãindein jabdewõt eo ej m̦õñã kanniõkũ, enaaj mour kõn wõt ña. 58 Eñin bũreet eo ear wanlal̦tak jãn lañ. Ejjab ãinwõt bũreet eo ro jim̦m̦ami rar m̦õñã, ro im tokãlik rar mej. Jabdewõt eo ej m̦õñã jãn bũreet in enaaj mour ñan indeeo.” 59 Ear ba men kein ke ear katakin armej ro ilo juon im̦õn kabuñ ilo Kaperneum.

60 Ke rar roñ an ba men kein, elõñ iaan ri-kal̦oor ro an rar ba: “Elukkuun kallulu naan ko ej ba! Wõn em̦õn̦õn̦õ in roñjake?” 61 Bõtab Jesus ear jel̦ã bwe ri-kal̦oor ro an rar ellotaan kake men in, innem ear ba ñan er: “Kom̦ l̦õkatip kõn men in ke? 62 Ak ta el̦aññe kom̦ naaj lo an Nejin armej wanlõñl̦o̦k ñan ijo ear pãd ie m̦okta? 63 Jetõb kwõjarjar* ej letok mour, ejjel̦o̦k tokjãn men ko armej rej kõm̦m̦ani. Naan ko iar ba rej itok jãn jetõb kwõjarjar* im rej letok mour. 64 Bõtab ewõr jet iaami rejjab tõmak.” Jesus ear jel̦ã wõt jãn jinoin kõn wõn ro rar jab tõmak im wõn eo enaaj ketake. 65 Innem ear wõnm̦aanl̦o̦k wõt im ba: “Eñin unin aõ kar ba ñan kom̦ bwe ejjel̦o̦k armej emaroñ itok ñan ippa el̦aññe Jema ejjab kamãlimi.”

66 Jãn wõt men in, elõñ iaan ri-kal̦oor ro an rar bõjrak jãn aer l̦oore im rar bar ro̦o̦l ñan men ko rekõn kõm̦m̦ani m̦okta. 67 Innem Jesus ear ba ñan rijjilõk ro 12 im ba: “Kom̦ kõn̦aan bar etal ke?” 68 Im Saimõn Piter ear uwaak im ba: “Irooj, wõn eo kõm naaj etal ñan ippãn? Naan ko am̦ rej tõll̦o̦k ñan mour indeeo. 69 Kõmar tõmak im jel̦ã bwe kwe ri-Karejar eo Eokkwõjarjar an Anij.” 70 Im Jesus ear ba ñan er: “Iar kããlõt kom̦ 12, bõtab juon iaami ej juon ri-ruruwe.” 71 Ear kõnono kõn Judas, l̦eo nejin Saimõn Iskariõt, kõnke meñe Judas ekar juon iaan rijjilõk ro 12, ak enaaj ketake.