Mark

10 Innem Jesus ear etal jãn ijo im kijoone Reba Jordan im etal ñan jikin ko itõrerein Judia. Elõñ armej rar bar itok ñan ippãn, im ear jino an katakin er ãinwõt an kõn kõm̦m̦ane aolep iien. 2 Innem Parisi ro rar itok ñan ippãn bwe ren mãlejjoñe. Rar kajjitõk ippãn el̦aññe emãlim an juon em̦m̦aan jepel jãn lio pãleen. 3 Im ear uwaake er im ba: “Ta eo Moses ear kakien kom̦ bwe kom̦win kõm̦m̦ane?” 4 Im reba: “Moses ear kõtl̦o̦k an em̦m̦aan ro jepel jãn lim̦aro pãleer ñe em̦õj aer kõm̦m̦an aer peba in jepel.” 5 Ak Jesus ear ba ñan er: “Moses ear je kien in ñan kom̦ kõn ami penawiia. 6 Bõtab jãn kar jinoin kõm̦anm̦an, ‘Ear kõm̦m̦an bwe en wõr em̦m̦aan im kõrã. 7 Kõn men in, l̦eo enaaj em̦m̦akũt jãn jinen im jemãn, 8 im erro kõrã eo naaj juon wõt kanniõk.’ Ejako an ruo armej kõnke erro ej kiiõ juon wõt kanniõk. 9 Kõn men in, ejjel̦o̦k juon en kõjepele ro em̦õj an Anij kobaik er.” 10 Innem ke rar pãd ilo juon em̦, ri-kal̦oor ro rar kajjitõk ippãn kõn men in. 11 Im ear ba ñan er: “Ñe juon em̦m̦aan ej jepel jãn lio pãleen im ej m̦areik bar juon, em̦m̦aan in ej lejãn* im ear jab m̦ool ñan kõrã eo ippãn. 12 Bareinwõt, ñe juon kõrã ej jepel jãn l̦eo pãleen im m̦areik bar juon, kõrã in ej lejãn.”

13 Armej ro rar bõktok ajri ro ñan ippãn bwe en likũt pein ioer,* ak ri-kal̦oor ro rar luuki armej ro. 14 Ke Jesus ear lo men in, ear illu im ear ba ñan ri-kal̦oor ro: “Kom̦win kõtl̦o̦k an ajri ran̦e itok ñan ippa. Jab kabõjrak er kõnke ro rej ãinwõt ajri rein renaaj jolõt Aelõñ eo an Anij.* 15 Ij ba ñan kom̦ bwe el̦aññe jabdewõt armej ejjab kaorõk Aelõñ eo an Anij ãinwõt juon ajri, armej in eban del̦o̦ñe Aelõñ in ñan jidik.” 16 Innem ear jiburlepe ajri ro, im likũt pein ioer, im jar kõn er.

17 Ke ear etal ilo ial̦ eo an l̦o̦k, juon em̦m̦aan ear ettõrl̦o̦k ñan ippãn im bukwelõlõ im̦aan mejãn im kajjitõk im ba: “Ri-Kaki Em̦m̦an, ta eo ij aikuj kõm̦m̦ane bwe in maroñ jolõt mour indeeo?” 18 Im Jesus ear ba: “Etke kwõj ba bwe ña juon eo em̦m̦an? Ejjel̦o̦k juon en̦ em̦m̦an, Anij wõt. 19 Kwõjel̦ã kõn kien kein: ‘Kwõn jab uror, kwõn jab lejãn, kwõn jab ko̦o̦t, kwõn jab riab n̦ae bar juon, kwõn jab m̦on̦e ro jet, im kwõn kautiej jem̦am̦ im jinõm̦.’” 20 Im em̦m̦aan eo ear ba: “Ri-Kaki, iar pokake aolep kien kan̦e jãn ke iar dik.” 21 Jesus ear kalimjek em̦m̦aan eo, im kõn an yokwe ear ba, “Ewõr juon men kwõjjañin kõm̦m̦ane. Kwõn ilo̦k im wiakake aolep men kan̦ m̦weiõm̦, im lil̦o̦k jããn kan̦ ñan ro rejeram̦õl im kwõnaaj m̦weiie ilañ. Innem kwõn itok im l̦oor eõ.”* 22 Ke em̦m̦aan eo ej roñ men in, ear ilo̦k ilo an bũrom̦õj kõnke ear kanooj in m̦weiie.

23 Innem ãlikin an Jesus reilo̦k ñan armej ro, ear ba ñan ri-kal̦oor ro an im ba: “Enaaj kanooj in pen an ro rem̦weiie del̦o̦ñ ilo Aelõñ eo an Anij!” 24 Ri-kal̦oor ro rar bwilõñ ke rar roñ men in. Kõn men in, Jesus ear ba: “Ajri ran̦, ekanooj in pen ñan del̦o̦ñ ilo Aelõñ eo an Anij! 25 Epidodol̦o̦k an juon kamel̦ del̦o̦ñ ilo ro̦ñin juon nitõl̦ jãn an juon ri-m̦weiie del̦o̦ñ ilo Aelõñ eo an Anij.” 26 Ri-kal̦oor ro rar bwilõñ l̦o̦k wõt ke rej roñ an ba men in, im rar ba ñane:* “Ñe ãindein, wõn emaroñ mour?” 27 Jesus ear reilo̦k ñan er im ear ba: “Armej rebane men in, bõtab ejjab ãindein Anij kõnke emaroñe men otemjej.” 28 Innem Piter ear ba ñane: “Kõmar ilo̦k jãn men otemjej im l̦oor eok.”* 29 Im Jesus ear ba: “Ij ba ñan kom̦ bwe jabdewõt eo ear ilo̦k jãn m̦weo im̦õn ak ro jein ak ro jatin, jinen ak jemãn, ak ro nejin, ak wãto eo an kõn wõt ña im ennaan eo em̦m̦an, 30 100 alen an naaj l̦apl̦o̦k jeraam̦m̦an ko ej bũki kiiõ. Enaaj lõñl̦o̦k im̦õn, ro jein im jatin, jinen, nejin, im an wãto. Bõtab ilo ejja iien eo wõt, enaaj iioon eñtaan. Innem ilo jukjukun pãd* eo ej itok wõt, armej in enaaj bõk mour indeeo. 31 Elõñ ro rej pãd m̦oktata, renaaj oktak im pãd ãliktata. Im elõñ ro rej pãd ãliktata, renaaj oktak im pãd m̦oktata.”

32 Kiiõ rar etal ilo ial̦ eo aer l̦o̦k ñan Jerusalem. Jesus ear ilo̦k im̦aaerl̦o̦k, im ri-kal̦oor ro rar bwilõñ, bõtab armej ro jet me rar l̦oore er rar mijak. Innem ear bar bõk rijjilõk ro 12, im ear jino kwal̦o̦k ñan er kõn men ko rej pojakin wal̦o̦k ñane. Ear ba: 33 “Jej ilo̦k ñan Jerusalem im armej ro renaaj lel̦o̦k Nejin armej* ñan bũrij ro reutiej im skraib ro, im renaaj liaakel̦o̦ke ñan mej. Bareinwõt renaaj liaakel̦o̦ke ñan armej in aelõñ ko, 34 im armej rein renaaj kõm̦m̦an kõjak kake, kaplouki, deñl̦o̦ke, im m̦ane. Bõtab jilu raan tokãlik, enaaj bar mour.”

35 Innem Jemes im Jon, l̦õm̦aro nejin Zebedi, rar itok ñan ippãn im ba: “Ri-Kaki, kõm̦ro kõn̦aan bwe kwõn katõprake jabdewõt men kõm̦ro ej kajjitõk kake.” 36 Im ear ba: “Ewõr ta komiro kõn̦aan bwe in kõm̦m̦ane?” 37 Rar uwaak im ba: “Kwõn kõtl̦o̦k am̦ro jijet iturum̦ ñe kwõnaaj tõl ilo aelõñ eo am̦, juon ituanbwijmaroñin peim̦ im eo juon ituanmiiñ.” 38 Bõtab Jesus eba: “Komiro ejjab mel̦el̦e kõn men eo komiro ej kajjitõk kake. Komiro maroñ ke idaak jãn cup* eo ij idaak jãne, ak peptaij ilo wãween eo ij peptaij ie?” 39 Erro ar uwaak im ba: “Aet, kõm̦ro maroñ.” Innem Jesus ear ba: “Komiro naaj idaak jãn cup eo ij idaak jãne, im komiro naaj peptaij ilo wãween eo ij peptaij ie. 40 Bõtab, ejjel̦o̦k aõ maroñ ñan kããlõt wõn ro renaaj jijet ituanbwijmaroñin peiũ ak ituanmiiñũ kõnke jikin kein rej an ro em̦õj kõpooji ñan er.”

41 Ke rijjilõk ro joñoul rar roñ kõn men in, rar illu ippãn Jemes im Jon. 42 Bõtab Jesus ear kũrtok er im ba ñan er: “Kom̦ jel̦ã bwe ri-tõl ro an aelõñ ko rej tõl armej ekkar ñan kõn̦aan ko aer, im enana an ri-utiej ro kõm̦m̦an ñan armej ro rej pãd ium̦win maroñ ko aer. 43 Bõtab kom̦win jab ãinwõt er. El̦aññe jabdewõt iaami ekõn̦aan bwe en utiej, ej aikuj ri-jerbal ñan kom̦. 44 Im el̦aññe jabdewõt iaami ekõn̦aan bwe en m̦oktata, ej aikuj jerbal ñan aolep ãinwõt juon ri-karejar.* 45 Ãindein Nejin armej, ear jab itok bwe ro jet ren jerbal ñane, ak ear itok bwe en jerbal ñan er. Bareinwõt, ear itok bwe en kõl̦l̦ã kõn mour eo an ñan lo̦mo̦o̦ren elõñ armej.”

46 Innem rar tõparl̦o̦k Jeriko. Ke Jesus im ri-kal̦oor ro an kab juon jarlepju in armej rar diwõjl̦o̦k jãn Jeriko, ekar wõr juon em̦m̦aan epilo im ekkã an owar etan Bartimeõs, (nejin Timiõs) im ear jijet iturin ial̦ eo. 47 Ke ear roñ bwe Jesus ri-Nazeret ear itok ilo ial̦ eo tok, ear jino an lam̦õj im ba: “Jesus, nejin Devid,* kwõn tũriam̦okake eõ!” 48 Ak armej ro rar luuki im ba bwe en jab keroro, bõtab ear kõl̦l̦aajl̦o̦k wõt ainikien im ba: “Nejin Devid, kwõn tũriam̦okake eõ!” 49 Kõn men in, Jesus ear bõjrak im ba: “Kom̦win kũrtok em̦m̦aan en̦ ñan ippa.” Innem rar kũrtok em̦m̦aan eo im rar ba ñane: “Kwõn peran!* Kwõn jutak im etal bwe ej kũr eok.” 50 Em̦m̦aan eo ear jol̦o̦ke kopã eo an im ear kaiur im jutak im etal ñan ippãn Jesus. 51 Innem Jesus ear kajjitõk ippãn im ba: “Ewõr ta imaroñ kõm̦m̦ane ñan kwe?” Im em̦m̦aan eo epilo ear uwaak im ba: “Rabbonai,* kwõn kõm̦m̦an bwe in bar lol̦o̦kjen̦.” 52 Im Jesus ear ba ñane: “Kwõmaroñ ilo̦k kiiõ. Am̦ tõmak ear kõmour eok.” Im ilo iien eo wõt, em̦m̦aan eo ear bar lol̦o̦kjen̦, im ear jino l̦oore Jesus ilo ial̦ eo an l̦o̦k.