Hibru

12 Kõn men in, kõn an lõñ ad ri-kam̦ool rej ãinwõt juon kõdo̦ el̦ap ej kaapool̦e kõj, jen bareinwõt jol̦o̦k aolep men ko reddo im jerawiwi eo ej kapañ kõj, im jen kijenmej ke jej ettõr ilo iãekwõj in jepãd ie, 2 ilo ad lukkuun reilo̦k wõt ñan ri-Tõl eo El̦ap im ej ri-Kõweeppãn ad tõmak, Jesus. Bwe kõn wõt lañlõñ eo em̦õj likũti im̦aan, ear kijenmej ilo al̦al̦ in eñtaan* eo jekdo̦o̦n ñe men in ear menin kajjookok, im ear jijet ituanbwijmaroñin tũroon eo an Anij. 3 Bwe kom̦win jab m̦õk im ebbeer, kom̦win kanooj kal̦apl̦o̦k wõt ami kõl̦mãnl̦o̦kjen̦ kõn eo ear kijenmej ium̦win naanin jum̦ae ko jãn ro rijjerawiwi, ro kõn wõt aer kar ãindein rar bõktok jorrããn ñan er make.

4 Kom̦ij lukkuun eñtaan ilo ami jum̦ae jerawiwi, ijoke kom̦ij jañin kar eñtaan ñan joñan eo ej to̦o̦rl̦o̦k bõtõktõkimi. 5 Im em̦õj ami lukkuun mel̦o̦kl̦o̦k naanin rõjañ in Anij ear lewaj ñan kom̦ ãinwõt ro nejin: “Nejũ, jab kajejtokjãn an Jeova* lewaj kauwe im jab ebbeer ñe ej kajim̦we eok, 6 bwe ro Jeova* ej yokwe er ej kauweik er, ilo m̦ool, jabdewõt eo ej bõke bwe en nejin, ej kajeiki.”*

7 Kom̦win watõk bwe ami kijenmej ej m̦õttan wãween ami bõk katak.* Anij ej kõm̦m̦an ñan kom̦ ãinwõt ro nejin. Bwe ewõr ke en̦ ejjab bõk kauwe jãn jemãn? 8 El̦aññe kom̦ aolep kom̦ij jab bõk kauwe rot in, innem kom̦ij jab lukkuun ro nejin ak kom̦ij nejin bar jet. 9 Bareinwõt, ro jemãd ilo kanniõk rekõn kauwe kõj im jaar kautiej er. Innem, bwe jen mour, en kar ke lukkuun l̦apl̦o̦k ad kwal̦o̦k ad kõttãik kõj ñan eo Jemãd me ear jitõñ kõj ikijjeen jetõb kwõjarjar?* 10 Rar kauweik kõj ium̦win jidik wõt iien, im rar kõm̦m̦ane men in ekkar ñan men ko rej l̦õmn̦ak bwe rem̦m̦an, bõtab Anij ej kauweik kõj ñan tokjãn eo ad kõnke jen maroñ kwõjarjar ãinwõt an kwõjarjar. 11 Em̦ool bwe ñe juon ej bõk kauwe, ejjab menin lañlõñ ilo iien eo, bõtab ej juon men ekõmmetak,* ijoke tokãlik enaaj jebar leen aenõm̦m̦an, aet kõm̦m̦an ko rewãnõk ñan ro rar bõk kamminene ilo men in.

12 Kõn men in, kom̦win kõkajoor pã ko rem̦õjn̦o̦ im bukwien ne ko rem̦õjn̦o̦, 13 im kom̦win kõm̦m̦an bwe en jim̦we wõt ial̦ ko ami kõnke ijo ejorrããn ilo neemi en jab jorrããnl̦o̦k wõt, ak en mo. 14 Kom̦win lukkuun kate kom̦ bwe kom̦win aenõm̦m̦an ippãn armej otemjej im kate kom̦ bwe kom̦win kwõjarjar, kõnke ñe ejjel̦o̦k men in ippãn juon innem eban lo Irooj. 15 Kom̦win lukkuun kõjparok bwe en ejjel̦o̦k juon ej likjab jãn an bõk jouj eo el̦ap an Anij, kõnke en ejjel̦o̦k okar ko rebaijin rej eddek im kõm̦m̦an an wõr apañ innem elõñ reoktak im ettoon kake; 16 im lale bwe en ejjel̦o̦k ri-l̦õñ* ibwiljimi im en bar ejjel̦o̦k jabdewõt en̦ ejjab kaorõk men ko rekkwõjarjar ãinwõt kar Iso, eo ear aje jeraam̦m̦an eo an ãinwõt juon m̦aanje kõn wõt juon m̦õñã. 17 Kom̦ jel̦ã bwe tokãlik ke ear kõn̦aan jolõt jeraam̦m̦an eo, ear jab bõke. Jekdo̦o̦n ñe ear jañ bwe en kajjioñ in ukot l̦õmn̦ak eo an jemãn, ak ear jab lo tõprak.

18 Kom̦ij jañin kar kepaake juon tol̦, eo eurur kõn kijeek, ekilmeej kõdo̦ eo ie, emarok jilõñlõñ, im el̦ap an ekkõtoto im wõt, 19 im ejañ jilel im ewõr juon ainikien ej kõnnaan, eo ke armej ro rar roñ ainikien rar akwel̦ap bwe en bõjrak an kõnono ñan er, 20 bwe rar mijake kakien in: “Jekdo̦o̦n juon menninmour elãj ak el̦aññe ej uñũri tol̦ eo, rej aikuj kade ñan mej.” 21 Bareinwõt, men ko rar wal̦o̦k relukkuun kaamijak, joñan Moses ear ba: “El̦ap aõ mijak im wũdiddid.” 22 Ak kõn kom̦, em̦õj ami kepaake Tol̦ Zaion, im jikin eo ej an Anij eo emour, Jerusalem eo ilañ, im elõñ to̦ujin enjel̦ ro 23 rej kweilo̦ktok ippãn doon, im eklejia in ro rej m̦aanje im em̦õj je etaer ilañ, im kab Anij, eo ej ri-Ekajet armej otemjej ekoba mour eo an ro ri-wãnõk, ro em̦õj kããlõt er ikijjeen jetõb kwõjarjar* im em̦õj kõweeppãn er, 24 im Jesus, eo ej ri-kõllaajrak ñan bujen eo ekããl, im bõtõktõk eo kar kabbũtũktũk kake, eo ej kõnono ilo wãween eo em̦m̦anl̦o̦k jãn bõtõktõkin Ebel.

25 Kom̦win lale bwe kom̦win jab m̦akoko in roñjake* eo ej kõnono. Ro rar m̦akoko in roñjake eo ear lel̦o̦k naanin kakkõl ko an Anij ñan ro ilo lal̦ in, rar jab el̦l̦ã jãn kaje. El̦aññe rein rar jab el̦l̦ã, innem el̦apl̦o̦k ad jab maroñ el̦l̦ã el̦aññe jej el̦l̦o̦k jãn eo ej kõnono jãn lañ! 26 Ilo iien eo, ainikien ear kõm̦m̦an an lal̦ m̦akũtkũt, ak kiiõ ear kallim̦ur im ba: “Inaaj kõm̦akũtkũt lal̦ bar juon alen, ijoke inaaj bareinwõt kõm̦akũtkũt lañ.” 27 Kiiõ naan kein “bar juon alen” rej kaalikkar an naaj julo̦k men kein ej kõm̦akũtkũti, aet men ko em̦õj kõm̦m̦ani, kõnke men ko ear jab kõm̦akũtkũti ren maroñ pãdwõt. 28 Innem, kõnke jenaaj bõk juon Aelõñ eo* eban m̦akũtkũt, jen wõnm̦aanl̦o̦k wõt im bõk tokjãn jãn jouj eo el̦ap, eo ej kõmaroñ kõj bwe Anij en buñbũruon kõn jerbal eo eokkwõjarjar jej kõm̦m̦ane ñane kõn mijak im nõbar. 29 Bwe Anij eo ad ej juon kijeek in ko̦kkure.