Galetia
2 Ãlikin 14 iiõ, iar bar jepl̦aak ñan Jerusalem. Barnebas ear itok ippatok im iar bar bõk Taitõs ippal̦o̦k. 2 Iar etal kõnke kar kwal̦o̦k ñan ña bwe in ilo̦k, im iar kwal̦o̦k ñan er kõn ennaan eo em̦m̦an ij kwal̦o̦k kake ibwiljin ri-aelõñ ko. Bõtab iar kwal̦o̦k men in ñan em̦m̦aan ro wõt el̦ap an armej kautiej er, bwe in jel̦ã el̦aññe ejim̦we aõ kõm̦m̦ane jerbal eo ij kõm̦m̦ane,* kõnke ñe ejjab innem enaaj kar ejjel̦o̦k tokjãn. 3 Meñe Taitõs ej juon ri-Grik im ear pãd ippa, bõtab ejjel̦o̦k juon ear iuuni bwe en m̦wijm̦wij.* 4 Ak unin an kar wanlõñtak men in, ej kõn wõt ro rej riabin rũttõmak me rar del̦o̦ñtok ilo ittino. Rar del̦o̦ñtok ãinwõt ro rej ri-iaroñroñ im rej pukot kilen aer ko̦kkure anemkwõj eo ewõr ippãd, kõj ro rej juon wõt ippãn Christ Jesus, bwe ren lukkuun kõm̦m̦an bwe jen ri-kõm̦akoko ñan Kien eo. 5 Bõtab kõmar jab kõttãik kõm ñan rein ñan jidik kõnke m̦ool eo kõn ennaan eo em̦m̦an en pãdwõt ippemi.
6 Ak ikijjeen ro armej rej watõk er raorõk—jekdo̦o̦n ewi joñan aer kar utiej, ak ejjel̦o̦k oktakier ippa kõnke Anij ejjab lale paotokin armej—rein el̦ap an armej kautiej er, ejjel̦o̦k mel̦el̦e kããl iar bõk jãn er. 7 Bõtab ke rar lo bwe kar kappeik eõ ñan kwal̦o̦k kõn ennaan eo em̦m̦an ñan ro rejjab m̦wijm̦wij, ãinwõt an kar Piter bõk jerbal eo ñan kwal̦o̦k ennaan eo em̦m̦an ñan ro em̦õj aer m̦wijm̦wij— 8 ilo m̦ool, eo ear kõmaroñ Piter bwe en rijjilõk ñan ro em̦õj aer m̦wijm̦wij, ear bareinwõt kõmaroñ eõ bwe in rijjilõk ñan ri-aelõñ ko— 9 im ke rar kile bwe kar kwal̦o̦k jouj eo el̦ap ñan ña, Jemes, Sipas,* im Jon, ro rej jurõn eklejia eo, rar idik peim̦ro Barnebas. Men in ej juon kõkal̦l̦e bwe kõmij jerbal ippãn doon, bwe kõm̦ro en ilo̦k ñan ippãn ri-aelõñ ko ak er rej ilo̦k ñan ippãn ro em̦õj aer m̦wijm̦wij. 10 Men eo wõt rar kajjitõk bwe kõmin kõm̦m̦ane ej bwe kõmin jab mel̦o̦kl̦o̦k ro rejeram̦õl, im men in iar bareinwõt kõn̦aan kate eõ ñan kõm̦m̦ane.
11 Ak ke Sipas* ear itok ñan Antiok, iar kajju kõnnaan ñane* kõnke elukkuun alikkar bwe ebõd.* 12 Unin ej kõnke m̦oktal̦o̦k jãn an kar jet em̦m̦aan itok jãn ippãn Jemes, ekõn m̦õñã ippãn armej ro jãn aelõñ ko, bõtab ke rein rar tõkeaktok, ear bõjrak an kõm̦m̦ane men in im ear kõjenolo̦k e make kõn an mijak ro rej rejetake m̦wijm̦wij. 13 Aolep ri-Ju ro jet rar bareinwõt kobal̦o̦k ippãn ilo wãween in etao,* im joñan Barnebas ear bar kobal̦o̦k ippãer ilo wãween in. 14 Ke iar lo bwe rejjab etetal ekkar ñan m̦ool eo kõn ennaan eo em̦m̦an, iar kõnnaan ñan Sipas* im̦aan mejãer wõj aolep im ba: “El̦aññe kwe juon ri-Ju ak kwõj mour ãinwõt ri-aelõñ ko im jab ãinwõt juon ri-Ju, innem etke kwõj kareel armej in aelõñ ko bwe ren mour ekkar ñan m̦anit ko an ri-Ju?”
15 Kõj ri-Ju jãn ke jaar l̦otak im jejjab ãinwõt rijjerawiwi ro jãn aelõñ ko, 16 im jejel̦ã bwe naaj kõwãnõk juon armej kõn wõt an tõmak ilo Jesus Christ im jab kõn an l̦oore kien eo. Kõn men in, jaar likũt ad tõmak ilo Christ Jesus bwe Anij en maroñ kõwãnõk kõj kõn wõt ad tõmak ilo Christ im jab kõn ad l̦oore kien eo, unin ej kõnke ejjel̦o̦k juon* enaaj wãnõk ilo an kõm̦m̦ani men ko kien eo ej ba. 17 Kiiõ, el̦aññe kar watõk bwe kõj rijjerawiwi meñe jej pukot kilen bwe jen wãnõk ikijjeen Christ, mel̦el̦ein ke bwe Christ ej ri-jerbal ñan jerawiwi? Ejjab ñan jidik! 18 El̦aññe ij bar kalõki men ko iar rupi m̦okta, innem ij kaalikkar bwe ña juon ri-ko̦kkure kien. 19 Kõn wõt kien eo, em̦õj aõ anemkwõj* jãne bwe in maroñ mour ñan Anij. 20 Em̦õj dilaik eõ ilo jurõn al̦al̦ ippãn Christ. Kiiõ ejako aõ mour ñan ña make, bõtab ñan Christ eo ej mour ilo ña im ej juon wõt ippa. Ilo m̦ool, mour eo aõ ilo kanniõk, ij mour kake ikijjeen aõ tõmak ilo Nejin Anij, eo ear yokwe eõ im ajel̦o̦k mour eo an kõn ña. 21 Ijjab kajejtokjãn* jouj eo el̦ap an Anij, kõnke el̦aññe wãnõk ear wal̦o̦k ikijjeen kien eo, innem enaaj kar ejjel̦o̦k tokjãn an Christ mej.