Revelesõn
17 Juon iaan enjel̦ ro jimjuon ewõr jimjuon bowl ippãer, ear itok im ba ñan ña: “Itok, inaaj kwal̦o̦k kõn wãween naaj ekajete kõrã eo ekijoñ im ebuñbuñ im ej jijet ioon elõñ dãn ko, 2 eo kiiñ ro an lal̦ rar l̦õñ* ippãn, im ro rej jokwe ioon lal̦ rar kadek kõn wain in l̦õñ* eo an.”
3 Im ear bõkl̦o̦k ña ikijjeen kajoorin jetõb kwõjarjar* ñan juon ãne jem̦aden. Im iar lo juon kõrã ej jijet ioon juon menninmour awiia ebũrõrõ im eobrak kõn ãt ko rej kõnono n̦ae Anij, im ewõr jimjuon bõran im joñoul an doon. 4 Im kõrã eo ej nuknuk piolõt im bũrõrõ, im ear lõtlõt kõn gold, pearl, im dekã ko raorõk, im ear jibwe juon cup gold eobrak kõn men ko rekajjõjõ, im kõn men ko rettoon itok wõt jãn an l̦õñ.* 5 Im ioon dem̦an kõrã in em̦õj je ãt in ettino mel̦el̦ein: “Babil̦on El̦ap, jinen ro rekijoñ im men ko rekajjõjõ an lal̦.” 6 Im iar lo bwe kõrã eo ekadek kõn bõtõktõkin ro rekkwõjarjar im ro rar kwal̦o̦k kõn Jesus.
Im ke iar loe, iar kanooj in bwilõñ. 7 Innem enjel̦ eo ear ba ñan ña: “Etke kwõj bwilõñ? Inaaj kwal̦o̦k ñan eok men eo ettino kõn kõrã eo im kõn menninmour awiia eo kõrã in ej jijet ioon me ewõr jimjuon bõran im joñoul an doon: 8 Menninmour awiia eo kwaar loe ear pãd m̦okta, ak kiiõ ejako, im m̦õttan jidik enaaj wanlõñtak jãn abyss* eo, im enaaj etal ñan an jeepepl̦o̦k. Im ro rej jokwe ioon lal̦—ro kar jab je etaer jãn kar jinoin lal̦* ilo bokin mour eo—renaaj bwilõñ ñe renaaj lo bwe menninmour awiia eo ear pãd m̦okta, ak tokãlik ear jako, ijoke enaaj bar wal̦o̦k.
9 “Innem emenin aikuj bwe en wõr mãlõtlõt* ñan mel̦el̦e kõn men in: Bar ko jimjuon rej mel̦el̦ein jimjuon tol̦, ijo kõrã eo ej jijet ioer. 10 Im rej mel̦el̦ein jimjuon kiiñ: L̦alem em̦õj aer buñ, juon ej pãd, im eo juon ejjañin itok; bõtab ñe enaaj itok, enaaj aikuj pãd ium̦win jidik wõt iien. 11 Im menninmour awiia eo ear pãd m̦okta ak tokãlik ear jako, ej bareinwõt kiiñ eo kein karalitõk, im ej wal̦o̦ktok jãn kiiñ ro jimjuon, im ej etal ñan an jeepepl̦o̦k.
12 “Doon ko joñoul kwaar loi rej mel̦el̦ein joñoul kiiñ ro rejjañin jino tõl, bõtab rej bõk aer maroñ ñan kiiñ ium̦win juon awa ippãn menninmour eo eawiia. 13 Juon wõt an rein l̦õmn̦ak, im rej lel̦o̦k kajoor im maroñ eo aer ñan menninmour eo eawiia. 14 Rein renaaj tarin̦aeik L̦aam̦ eo, bõtab kõnke ej Irooj ioon irooj ro im Kiiñ ioon kiiñ ro, L̦aam̦ in enaaj anjo̦ ioer. Bareinwõt, ro retiljek rej pãd ippãn im kar kũr er im kããlõt er, renaaj bareinwõt bõk anjo̦.”
15 Im ear ba ñan eõ: “Dãn ko kwaar loi kõrã eo ekijoñ ej jijet ioer ej mel̦el̦ein armej ro, jarlepju ko, ri-aelõñ ko im kajin* ko. 16 Bareinwõt, doon ko joñoul im menninmour awiia eo kwaar loe, renaaj dike kõrã eo ekijoñ im renaaj rakimi im kõm̦m̦an an keelwaan, im renaaj kañ kanniõkin im lukkuun tile kõn kijeek. 17 Bwe Anij ear likũt ilo bũrueer ñan aer kajejjete l̦õmn̦ak eo an, aet, bwe ren kajejjete l̦õmn̦ak eo aer jim̦or ñan lel̦o̦k maroñ in irooj eo aer ñan menninmour eo eawiia, m̦ae iien enaaj lukkuun jejjet kũtien naan ko an Anij. 18 Im kõrã eo kwaar loe ej mel̦el̦ein jikin eo el̦ap im ewõr an maroñ ioon kiiñ ro an lal̦.”