Jon
8 12 Innem Jesus ear bar kõnono ñan er im ba: “Ña ij meram eo an lal̦. Jabdewõt eo ej l̦oor eõ, ejjãmin etetal ilo marok, bõtab enaaj bõk meramin mour.” 13 Kõn men in, Parisi ro rar ba ñane: “Kõn am̦ kwal̦o̦k kõn kwe make, men ko kwõj ba rejjab m̦ool.” 14 Im Jesus ear uwaak er im ba: “Meñe ij kwal̦o̦k kõn ña make, ak men ko ij ba rem̦ool kõnke ijel̦ã ia eo iar itok jãne im ia eo ij ilo̦k ñane. Bõtab kom̦ jaje ia eo iar itok jãne im ia eo ij ilo̦k ñane. 15 Kom̦ij ekajet ekkar ñan l̦õmn̦ak ko an armej, ak ña ijjab ekajete jabdewõt armej. 16 Bõtab ñe ij ekajet, ij ekajet ilo m̦ool kõnke ijjab make iaõ im ekajet. Jema, eo ear jilkintok eõ, ej pãd ippa. 17 Bareinwõt, Kien* eo ami ej ba: ‘El̦aññe ruo ri-kam̦ool rej kwal̦o̦k juon wõt mel̦el̦e, men eo rej ba em̦ool.’ 18 Ij kwal̦o̦k kõn ña make, im Jema, eo ear jilkintok eõ, ej bar kwal̦o̦k kõn ña.” 19 Innem rar ba ñane: “Bwe ewi Jem̦am̦?” Im Jesus ear uwaak: “Kom̦ jaje kajjieõ im kom̦ jaje kajjien Jema. Ñe kom̦win kar jel̦ã kajjieõ, kom̦ naaj kar bar jel̦ã kajjien Jema.” 20 Ear kwal̦o̦k naan kein ke ear pãd ilo jikin jããn eo ilo tampel̦ eo im katakin ie. Bõtab ejjel̦o̦k juon ear jibwe kõnke ejjañin jejjet iien eo an.
21 Innem ear bar ba ñan er: “Ij pojakin etal im kom̦ naaj kappukot eõ, ak kom̦ naaj mej ilo ami jerawiwi. Kom̦ij jab maroñ itok ñan ijo ij ilo̦k ñane.” 22 Im ri-Ju ro rar ba: “Etke ej ba, ‘Kom̦ij jab maroñ itok ñan ijo ij ilo̦k ñane?’ Ta ej l̦õmn̦ak in m̦an e make ke?” 23 Ear wõnm̦aanl̦o̦k wõt im ba ñan er: “Kom̦ij jãn lal̦ in, ak ña ij jãn lañ. Kom̦ij jãn jukjukun pãd in an armej, ak ña ijjab. 24 Eñin unin iar ba ñan kom̦: Kom̦ naaj mej ilo ami jerawiwi. El̦aññe kom̦ij jab tõmak bwe ña armej in, kom̦ naaj mej ilo ami jerawiwi.” 25 Innem rar ba ñane: “Bwe wõn kwe?” Im Jesus ear uwaak im ba: “Etke ij jol̦o̦k iien kã aõ im kõnnaan ippemi? 26 Elõñ men ij aikuj kwal̦o̦ki kõn kom̦ im elõñ men ij aikuj ekajeti. Bõtab, ij kwal̦o̦k wõt men ko iar roñ jãn Eo ear jilkintok eõ ñan lal̦ in, im aolep iien em̦ool.” 27 Ak rar jab mel̦el̦e bwe ej kõnnaan kõn Jemãn. 28 Im Jesus ear ba: “Ãlikin ami naaj lelõñl̦o̦k* Nejin armej,* innem kom̦ naaj jel̦ã bwe ña armej in im bwe ejjel̦o̦k men en̦ ij kõm̦m̦ane kõn ankilaõ make. Ij kwal̦o̦k ejja men ko wõt Jema ear katakin eõ kaki. 29 Eo ear jilkintok eõ ej pãd ippa, im ear jab etal jãn ña bwe in make iaõ kõnke aolep iien ij kõm̦m̦ani men ko ebuñbũruon kaki.” 30 Ke ear ba men kein, elõñ rar likũt aer tõmak ilo e.
31 Innem Jesus ear wõnm̦aanl̦o̦k wõt im kõnnaan ñan ri-Ju ro rar tõmake im ba: “El̦aññe kom̦ naaj pokake wõt naan* ko aõ, kom̦ij lukkuun ri-kal̦oora 32 im kom̦ naaj jel̦ã m̦ool eo, im m̦ool eo enaaj kanemkwõj kom̦.” 33 Ak ro jet rar ba ñane: “Ta mel̦el̦ein am̦ ba, ‘Kom̦ naaj anemkwõj’? Kõm nejin Ebream im kõmij jañin kar ri-kõm̦akoko ñan jabdewõt.” 34 Im Jesus ear ba: “Ij ba ñan kom̦ men in bwe aolep ro rej kõm̦m̦an jerawiwi rej ri-kõm̦akoko ñan jerawiwi. 35 Bareinwõt, ri-kõm̦akoko eo eban pãdwõt ilo m̦weo im̦õn irooj eo an ñan indeeo, bõtab l̦eo nejin irooj eo enaaj pãdwõt ie ñan indeeo. 36 Kõn men in, el̦aññe Nejin Anij ej kanemkwõj kom̦, kom̦ naaj lukkuun anemkwõj. 37 Ijel̦ã bwe kom̦ nejin Ebream, bõtab kom̦ij kajjioñ in m̦an eõ kõnke kom̦ij jab tõmaki naan* ko aõ. 38 Ij kõnnaan kõn men ko iar loi ke iar pãd ippãn Jema, ak kom̦ij kõm̦m̦ani men ko kom̦ar roñ jãn jememi.” 39 Im rar ba ñane: “Ebream ej jememmim.” Ak Jesus ear ba ñan er: “El̦aññe kom̦ nejin Ebream, kom̦win kar l̦oore joñak eo an Ebream. 40 Ak kiiõ kom̦ij kajjioñ in m̦an eõ, meñe ña eo iar kwal̦o̦k ñan kom̦ m̦ool eo iar roñ jãn Anij. Ebream eban kar kõm̦m̦ane men in. 41 Kom̦ij kõm̦m̦ani jerbal ko an jememi.” Ak rar ba ñane: “Juon wõt Jememmim, Anij, im kõmij lukkuun ajri ro nejin.”*
42 Jesus ear ba ñan er: “El̦aññe Anij en kar Jememi, kom̦win kar yokwe eõ kõnke ij itok jãn ippãn Anij im ij pãd ijin kõn wõt e. Iar jab itok kõn ankilaõ make, ak E eo ear jilkintok eõ. 43 Etke kom̦ij jab mel̦el̦e men ko ij ba? Unin ej kõnke kom̦ij jab pokake naan* ko aõ. 44 Kom̦ jãn jememi Tepil̦ eo, im kom̦ kõn̦aan l̦oor kõn̦aan ko an jememi. E juon ri-uror jãn kar jinoin, im ear jab pãdwõt ilo m̦ool eo kõnke ejjel̦o̦k m̦ool ilo e. Ej riab kõnke ãinden̦e e, kõnke e ri-riab im jemãn aolep ri-riab. 45 Ak ña, ij kwal̦o̦k ñan kom̦ m̦ool eo bõtab kom̦ij jab tõmak eõ. 46 Wõn iaami emaroñ kam̦ool bwe elõñ men en̦ iar jerawiwi kake? El̦aññe ij kõnono ilo m̦ool, etke kom̦ij jab tõmak eõ? 47 Eo ej jãn Anij, ej roñjake naan ko an Anij. Unin ami jab roñjake ej kõnke kom̦ij jab jãn Anij.”
48 Innem ri-Ju ro rar ba ñane: “Ejim̦we wõt ammim kar ba, ‘Kwe ri-Sameria im euwe jetõb ettoon ippam̦.’” 49 Im Jesus ear ba: “Ejjel̦o̦k jetõb ettoon ippa! Ij kautiej Jema ak kom̦ij kwal̦o̦k ami jab kautiej eõ. 50 Ijjab kappok nõbar ñan ña make, bõtab ewõr juon Eo ekõn̦aan letok men in ñan ña im E eo ej ekajet. 51 Ij ba ñan kom̦ bwe jabdewõt eo ej pokake naan* ko aõ, ejjãmin mej.” 52 Innem ri-Ju ro rar ba ñane: “Kiiõ kõm lukkuun jel̦ã bwe euwe jetõb ettoon ippam̦. Ebream emej im ri-kanaan ro rebar mej, ak kwõj ba, ‘Jabdewõt eo ej pokake naan* ko aõ, ejjãmin mej.’ 53 Jemem Ebream ear mej, ta kwõutiejl̦o̦k jãne ke? Ri-kanaan ro rar bar mej. Ak wõn kwe?” 54 Jesus ear uwaak: “El̦aññe ij kautiej eõ make, enaaj ejjel̦o̦k tokjãn aõ utiej. Jema eo ej kautiej eõ, eo me kom̦ij ba bwe ej ami Anij. 55 Bõtab kom̦ jaje kajjien, ak ña ijel̦ã kajjien. El̦aññe ij ba bwe ijaje kajjien, eokwe enaaj kar ña ri-riab, ãinwõt kom̦. Bõtab ijel̦ã kajjien im ij pokake naan ko an. 56 Jememi Ebream ear kanooj reim̦aanl̦o̦k ñan iien eo inaaj kar itok, im ear loe im kanooj m̦õn̦õn̦õ.” 57 Innem ri-Ju ro rar ba ñane: “Ta ejjañin de 50 am̦ iiõ ak em̦õj am̦ lo Ebream ke?” 58 Im Jesus ear ba ñan er: “Ij ba ñan kom̦ men in em̦ool bwe m̦okta jãn an kar Ebream l̦otak, ikar pãd im mour.” 59 Kõn men in, rar ebbõk dekã bwe ren kade Jesus, ak ear tilekek im ilo̦k jãn tampel̦ eo.