Jerbal
28 Ke kõmar tõparl̦o̦k ãne, kõmij kab jel̦ã bwe etan ãneo in Malta. 2 Armej in ãneo* rar lukkuun jouj ñan kõm.* Rar kõjo̦ juon kijeek im kũrl̦o̦k kõm kõn an kar wõt im kõn an l̦ap m̦õl̦o. 3 Bõtab ke Paul ear ae al̦al̦ im likũti ilo kijeek eo, juon jineik vaiper ear kãnabõjtak kõn an okmããn̦ãn̦ im po̦uti pein Paul. 4 Ke armej in ãneo* rar loe an menninmour eo ebaijin ettoto ilo pein, rar jino aer kõnnaan ippãn doon im ba: “Alikkar ke l̦ein ej juon ri-uror, im meñe ear el̦l̦ã im mour jãn lo̦jet, ak Ekajet Jim̦we* ejjab kõtl̦o̦k bwe en mour m̦aanl̦o̦k wõt.” 5 Bõtab ear ko̦wõtlo̦k jineik eo ñan ioon kijeek eo, im ejjel̦o̦k jorrããn ear wal̦o̦k ñane. 6 Rar kõtmãne bwe enaaj ebbõj pein ak jidimkij an okjak im mej. Ãlikin aer kõttar ium̦win juon iien eaetok im lo bwe ejjel̦o̦k men en̦ ear wal̦o̦k ñane, rar ukot aer l̦õmn̦ak im jino ba bwe Paul ej juon anij.
7 Ear wõr jet wãto repaake ijin im rej an Põbliõs, em̦m̦aan eo eutiejtata ilo ãneo. L̦ein ear karwaineneik kõm im lale kõm ium̦win jilu raan. 8 Ilo tõre in, jemãn Põbliõs ear babu ilo men eo kinien kõn an piba im wõr juon an nañinmej in lo̦je elukkuun kõmmetak,* im Paul ear etal ñan ippãn im jar, im ear likũt pein ioon im kõmouri. 9 Ãlikin an kar men in wal̦o̦k, ri-nañinmej ro jet ilo ãneo rar jino itok ñan ippãn bwe en kõmour er. 10 Bareinwõt, rar letok elõñ menin letok ñan kõm, im ke kõmar pojakin jerak rar kannetok wa eo kõn jabdewõt men kõmij aikuji.
11 Ãlikin ammim kar pãd ilo ãneo ium̦win jilu allõñ, kõmar jerak ilo juon wa ewõr annañin bõran “L̦õm̦aro Nejin Zeus” ie. Wa eo ear itok jãn Alexandria im kõl̦o̦k iien añõneañ ilo ãneo. 12 Kõmar tõparl̦o̦k Sirekus im pãd ie ium̦win jilu raan, 13 innem kõmar jerakl̦o̦k wõt jãn ijo im pol̦o̦k ilo Rijiõm. Raan eo tok juon, kõto eo ear itok jãn rõk, im kõmar pol̦o̦k Putioli ilo raan eo kein karuo. 14 Kõmar ellolo rũttõmak ijo im rar akwel̦ap bwe kõmin pãd ippãer ium̦win jimjuon raan, innem kõmar etal wõt ñan Rom. 15 Ke rũttõmak ro ilo Rom rar roñ ennaan eo kõn kõm, rar itok ñan Jikin Wia eo ilo Appiõs im ijo etan Jilu Im̦õn Jokwe bwe ren iioon kõm. Ke Paul ear lo er, ear kam̦m̦oolol Anij im ear peranl̦o̦k. 16 Innem ke kõmar del̦o̦ñl̦o̦k ilo Rom, rar kõtl̦o̦k an Paul jokwe ippãn make, im ewõr juon rũttarin̦ae ear waje.
17 Ãlikin jilu raan, ear kũrtok em̦m̦aan ro reutiej an ri-Ju ro. Ke rar kweilo̦kl̦o̦k, ear ba ñan er: “Em̦m̦aan ran̦ jeiũ im jatũ, meñe iar jab kõm̦m̦ane jabdewõt men n̦ae armej ro ak n̦ae m̦anit ko an ro jim̦m̦aad, rar kalbuuj eõ ilo Jerusalem im lel̦o̦k eõ n̦a ium̦win pein ri-Rom. 18 Im ãlikin aer etale eõ, rar kõn̦aan karõl̦o̦k eõ kõnke ejjel̦o̦k men en̦ iar kõm̦m̦ane im ej tõllo̦kũn mej. 19 Ak ke ri-Ju ro rar jum̦ae men in, iar aikuj kajjitõk bwe Sizar en ekajete eõ, bõtab ejjab kõnke ewõr men en̦ ij ilen kinaakl̦o̦k aelõñ eo aõ kake. 20 Unin aõ kũrtok kom̦ ej bwe in lo kom̦ im kõnnaan ippemi kõnke unin aer lukwõj ña kõn jeen ej kõn wõt kõjatdikdik eo an armej in Israel.” 21 Innem rar ba ñane: “Ejjañin lõñtok lõta kõn kwe jãn Judia, im ejjel̦o̦k juon iaan ro jeim im jatim me rar itok jãn ijen̦ enañin kwal̦o̦k jabdewõt naan ak mel̦el̦e ko renana n̦ae kwe. 22 Bõtab ekkar bwe kõmin roñjake eok bwe kõmin jel̦ã ta l̦õmn̦ak kan̦e am̦, kõnke kõm jel̦ã bwe armej in jikin otemjej rej kõnono n̦ae kumi n̦e kwõj pãd ie.”
23 Rar karõk juon raan bwe ren bar itok ñan ippãn, im ear lõñl̦o̦k wõt uwaaer ke rar itok ñan m̦weo ej jokwe ie. Innem jãn jibboñ ñan jota, ear kõmel̦el̦eik er ilo an kar lõt an kwal̦o̦k ñan er kõn Aelõñ eo an Anij.* Ear kõjerbal Kien Moses im naan ko an ri-Kanaan ro ñan kajjioñ kareel er kõn Jesus. 24 Jet rar jino tõmak men ko ear ba, bõtab ro jet rar jab tõmak. 25 Kõn aer kar jab errã ippãn doon, rar jino aer etal, im Paul ear kwal̦o̦k naan kein:
“Ejim̦we wõt an kar jetõb kwõjarjar* kõnono ñan ro jim̦m̦ami ikijjeen ri-kanaan Aiseia 26 im ba, ‘Kwõn ilo̦k ñan ippãn armej ro im ba: “Kom̦ naaj roñ ak kom̦ ban mel̦el̦e ñan jidik, kom̦ naaj reito reitak bõtab ejjel̦o̦k men en̦ kom̦ naaj loe ñan jidik. 27 Epen bũruon armej rein. Rej roñ kõn lo̦jilñier ak rejjab l̦oori, im em̦õj aer kiil mejãer bwe ren jab lo jabdewõt men kõn mejãer im roñ kõn lo̦jilñier im mel̦el̦e kõn bũrueer im oktaktok ñan ña bwe in kõmour er.”’ 28 Kõn men in, kom̦win jel̦ã bwe em̦õj kwal̦o̦k kõn lo̦mo̦o̦r in jãn Anij ñan ri-aelõñ ko, im renaaj lukkuun roñjake.” 29 *——
30 Innem Paul ear pãdwõt ijo ium̦win ruo iiõ ilo juon em̦ me ear kõl̦l̦ãik on̦ããn an jokwe ie. Ekõn karwaineneik aolep ro rej lotok e 31 im kwal̦o̦k kõn Aelõñ eo an Anij ñan er im katakin er kõn Irooj Jesus Christ, im ear kõnono ilo peran im ejjel̦o̦k en̦ ear bõbraiki.