Matu

25 “Aelõñin lañ* ej ãinwõt joñoul bõjin me rar bõk l̦aam̦ ko aer ippãerl̦o̦k im ilen wõnm̦ae juon em̦m̦aan ej pojakin m̦are. 2 L̦alem iaan bõjin rein rejajel̦o̦kjen̦, ak l̦alem iaaer remãlõtlõt. 3 Bõjin ro rejajel̦o̦kjen̦ rar bõk l̦aam̦ ko aer ippãerl̦o̦k, ak rar jab ebbõk aer weil̦ ñan m̦aanjãppopo. 4 Bõtab bõjin ro remãlõtlõt rar bõk l̦aam̦ ko aer ippãerl̦o̦k im rar bar ebbõk aer weil̦ ilo nien kaan ko aer. 5 Ke ear rum̦wijtok l̦eo ej pojakin m̦are, bõjin ro joñoul rar jino mejki im rar kiki. 6 Ke ear lukwõn boñ, kar lam̦õj im ba: ‘Emoottok l̦eo ej pojakin m̦are! Kom̦win diwõjtok im wõnm̦aiki.’ 7 Kõn men in, aolep bõjin ro rar jerkak im kõpooji l̦aam̦ ko aer. 8 Bõjin ro rejajel̦o̦kjen̦ rar ba ñan bõjin ro remãlõtlõt im ba, ‘Kom̦win letok jidik ammim weil̦ jãn ippemi bwe m̦õttan jidik ekun l̦aam̦ kã ammim.’ 9 Im bõjin ro remãlõtlõt reba: ‘Ñe kõm lewaj, emaroñ jabwe ñan kõj aolep. Em̦m̦anl̦o̦k kom̦win etal im wia weil̦ ñan l̦aam̦ kan̦e ami.’ 10 Ilo iien eo bõjin ro rejajel̦o̦kjen̦ rar etal im wia, ear jãdetok l̦eo, im bõjin ro rar pojak rar del̦o̦ñl̦o̦k ippãn l̦eo ñan ijo rej kõm̦m̦ane kõjota in m̦are eo ie. Innem ear kilõk kõjãm eo. 11 Tokãlik, bõjin ro jet rar jãdetok im ba: ‘Jouj im kõpel̦l̦o̦k kõjãm e ñan kõm!’ 12 Im l̦eo ear uwaak im ba, ‘Ij kwal̦o̦k m̦ool ñan kom̦ ke ijaje wõn kom̦.’

13 “Kõn men in, kom̦win ekkõl wõt kõnke kom̦ jaje raan eo im awa eo.

14 “Bareinwõt, Aelõñin lañ ej ãinwõt juon em̦m̦aan me ej pojakin etal ñan jikin ko rettol̦o̦k. M̦okta jãn an etal, ear kũrtok ri-karejar* ro an im lel̦o̦k men ko m̦weien bwe ren bõk eddoier. 15 Em̦m̦aan eo ear jel̦ã kõn joñan maroñ ko an ri-karejar rein. Kõn men in, ear lel̦o̦k l̦alem tal̦õn* ñan juon iaaer, ruo tal̦õn ñan bar juon, im juon tal̦õn ñan eo juon. Ãlikin an kõm̦m̦ane men in ear ilo̦k. 16 Ilo m̦õkaj, ri-karejar eo ear bõk l̦alem tal̦õn ear ilo̦k im pukot kilen an koorl̦o̦k jããn ko ippãn. Kõn men in, jããn ko ippãn rar orl̦o̦k im ewal̦o̦k bar l̦alem tal̦õn. 17 Ri-karejar eo ear bõk ruo tal̦õn ear kõm̦m̦ane ejja men in wõt. Kõn men in, jããn ko ippãn rar orl̦o̦k im ewal̦o̦k bar ruo tal̦õn. 18 Ak ri-karejar eo ear bõk juon wõt tal̦õn ear ilo̦k im kalibwini jããn* ko an irooj eo an.

19 “Ãlikin juon iien aetok, irooj eo ear jepl̦aaktok im lale ta eo ri-karejar ro an rar kõm̦m̦ane kõn jããn ko an. 20 Ri-karejar eo kar lel̦o̦k l̦alem tal̦õn ñane ear jãdetok im bõktok orl̦o̦kin jããn ko ear bõk eddoier, im ear ba, ‘Irooj, kwaar letok l̦alem tal̦õn ñan ña bwe in lali, ak lale m̦õk, em̦õj aõ koorl̦o̦ki bwe en bar wal̦o̦k l̦alem tal̦õn.’ 21 Irooj eo an ear ba ñane: ‘Kwe juon ri-karejar eo em̦m̦an im etiljek! Elukkuun em̦m̦an men eo kwaar kõm̦m̦ane. Kõn am̦ kar tiljek ilo am̦ lali men kein reiet, inaaj jitõñ eok bwe kwõn bõk eddon men ko rellõñl̦o̦k. Kwõn itok im lañlõñ ippa, eo ej am̦ irooj.’ 22 Tokãlik, ri-karejar eo kar lel̦o̦k ruo tal̦õn ñane ear jãdetok im bõktok orl̦o̦kin jããn ko ear bõk eddoier, im ear ba, ‘Irooj, kwaar letok ruo tal̦õn ñan ña bwe in lali, ak lale m̦õk, em̦õj aõ koorl̦o̦ki bwe en bar wal̦o̦k ruo tal̦õn.’ 23 Irooj eo an ear ba ñane: ‘Kwe juon ri-karejar eo em̦m̦an im etiljek! Elukkuun em̦m̦an men eo kwaar kõm̦m̦ane. Kõn am̦ kar tiljek ilo am̦ lali men kein reiet, inaaj jitõñ eok bwe kwõn bõk eddon men ko rellõñl̦o̦k. Kwõn itok im lañlõñ ippa, eo ej am̦ irooj.’

24 Ãliktata, ri-karejar eo kar lel̦o̦k juon tal̦õn ñane ear jãdetok im ba: ‘Irooj, ijel̦ã bwe kwõj juon eo epen kien ko an. Kwõj m̦adm̦õd jãn men ko kwaar jab kalibwini im ae wiit jãn men ko kwaar jab eñtaan kaki. 25 Kõn men in iar mijak, innem iar etal im kalibwini tal̦õn eo ibul̦õn bwidej. Errein jããn ko am̦, ij karo̦o̦liwaj.’ 26 Innem irooj eo an ear ba: ‘Kwe juon ri-karejar eo enana im ejowan. El̦aññe kwõj ba bwe ij m̦adm̦õd jãn men ko iar jab kalibwini im ae wiit jãn men ko iar jab eñtaan kaki, 27 innem etke kwaar jab kadel̦o̦ñ jããn* ko aõ ilo im̦õn kakkon̦ jããn bwe in l̦ak ro̦o̦ltok, ewõr orl̦o̦kier?

28 “‘Kom̦win bõk tal̦õn n̦e jãn l̦õn̦e im lel̦o̦k ñan ri-karejar eo ewõr joñoul tal̦õn ippãn. 29 Jabdewõt eo ewõr an eddo, naaj lel̦o̦k elõñl̦o̦k eddo ko ñane, im enaaj lukkuun lõñ an eddo. Bõtab eo ejjel̦o̦k an eddo, meñe enaaj wõr jidik an eddo ak naaj bõk jãne. 30 Innem kom̦win jol̦o̦k ri-karejar in ejejtokjãn inabõj ilo ijo emarok. Eñin ijo enaaj jañ im kij dekein ñiin ie.’

31 “Ñe Nejin armej enaaj itok kõn aiboojoj eo an im aolep enjel̦ ro rej itok ippãntok, innem enaaj jijet ioon tũroon eo an eaiboojoj. 32 Aelõñ ko otemjej renaaj kobatok im̦aan, im enaaj kõjenolo̦k armej ro jãn doon ãinwõt an juon jabõt kõjepel jiip ko jãn koot ko. 33 Enaaj likũt jiip ko ituanbwijmaroñin pein, ak enaaj likũt koot ko ituanmiiñin.

34 “Innem Kiiñ eo enaaj ba ñan ro rej pãd ituanbwijmaroñin im ba: ‘Kom̦win itok, kom̦ ro Jema ej kõjeraam̦m̦an er. Kom̦win itok im jolõte Aelõñ eo* kar kõpooje ñan kom̦, m̦okta jãn jinoin lal̦.* 35 Ke iar kwõle, kom̦ar naajdik eõ, im ke iar maro, kom̦ar kaidaak eõ. Im meñe iar juon ruwamãejet, ak kom̦ar karwaineneik eõ. 36 Ke ear ejjel̦o̦k aõ nuknuk, kom̦ar letok aõ nuknuk, im ke iar nañinmej, kom̦ar lale eõ. Bareinwõt ke iar kalbuuj, kom̦ar lotok eõ.’ 37 Innem ro rewãnõk renaaj ba: ‘Irooj, ñããt eo kwaar kwõle im kõmar naajdik eok? Im ñããt eo kwaar maro im kõmar kaidaak eok? 38 Ñããt eo kwaar juon ruwamãejet im kõmar karwaineneik eok? Im ñããt eo ear ejjel̦o̦k am̦ nuknuk im kõmar lewaj am̦ nuknuk? 39 Ñããt eo kwaar nañinmej ak kalbuuj im kõmar lowaj eok?’ 40 Im Kiiñ eo enaaj uwaak er im ba, ‘Ij ba ñan kom̦ bwe ke kom̦ar kõm̦m̦ani men kein ñan juon iaan rein jatũ rettãtata, ej ãinwõt ñe kom̦ar kõm̦m̦ani ñan ña.’

41 “Innem enaaj ba ñan ro rej pãd ituanmiiñin im ba: ‘Kom̦win etal jãn ippa, kom̦ ro em̦õj liaakel̦o̦k er ñan kijeek eo ej ñan indeeo, eo kar kõpooje ñan Tepil̦ eo im enjel̦ ro an. 42 Ke iar kwõle, kom̦ar jab naajdik eõ, im ke iar maro, kom̦ar jab kaidaak eõ. 43 Iar juon ruwamãejet ak kom̦ar jab karwaineneik eõ, im ear ejjel̦o̦k aõ nuknuk ak kom̦ar jab letok aõ nuknuk. Bareinwõt, iar nañinmej im kalbuuj ak kom̦ar jab lale eõ.’ 44 Im er bareinwõt renaaj ba: ‘Irooj, ñããt eo ear ejjel̦o̦k am̦ nuknuk, im kwaar kwõle im maro, im ruwamãejet, im nañinmej im kalbuuj ak kõmar jab jipañ eok?’ 45 Innem enaaj uwaak er im ba: ‘Ij ba ñan kom̦ bwe ke kom̦ar jab jipañ juon iaan rein jatũ rettãtata, ej ãinwõt ñe kom̦ar jab jipañ eõ.’ 46 Rein renaaj mej ñan indeeo,* bõtab ro rewãnõk renaaj mour ñan indeeo.”