Ro Re Inea Ilo Lõl

ELAÑE juõn armij e ar iwõj ñõn iturõm im aitokin armij in kar joñan wõt borwoj in mweo imõm, enaj kar ewi wãwen am lemnõk? Armij in ej juõn eo jej ba e inea! Juõn ien e ar lukkun wor ro re inea ion lõl. Baibel eo ej kwalok bwe jemen rein kar enjel ro jen lõñ. Ak ekijkan an maroñ eindrein?

Kememij, enjel eo enana etan Setan e ar kõmõn abañ. Joñan, e ar kajeoñ karel enjel ro an Anij bwe ren oktak im nana. Elikin jet ien, jet ian enjel rein r’ar jino eoroñ Setan. R’ar jolok jerbal eo me Anij e ar lelok ñõn ir bwe ren kõmõne i lõñ. Im r’ar wonlõltok ñõn lõl im bõk enbwinin armij ñõn ir mõke. Kwo jela ke ta unin?

Baibel eo ej ba bwe kar kinke lõmarein nejin Anij r’ar lo kõra ro re dreo ion lõl im kõnan jokwe ibeir. Inem r’ar wonlõltok ñõn lõl im mareik limarein. Baibel eo ej ba bwe e ar bwir men in, kinke Anij e ar kõmõnmõn enjel ro bwe ren jokwe i lõñ.

Ke enjel ro im limaro beleir r’ar keutak nejiir, rein nejiir r’ar oktak. Bwelen jinoin r’ar jab oktak ilo ar lale. Ak r’ar ridtolok im aitoklok, im bar aitoklok im kajurlok, ñõn ien eo r’ar erõm ro re inea.

Rein re inea r’ar nana. Im kinke r’ar lukkun aitok im kajur, rekõn kokkure armij ro. R’ar kajeoñ jiber aolep ro jet bwe ren nana einwõt ir.

E mij Inok ilo ien in, ak e ar wor juõn eman ion lõl im e ar emõn. Etan lein kar Noa. Aolep ien e ar kõmõn men eo Anij e ar kõnan bwe en kõmõne.

Juõn ran Anij e ar jiroñ Noa bwe e mottok ien eo bwe En kokkure aolep armij ro re nana. Bõtap Anij ear lomoren Noa, famili eo an im elõñ ian men in mour ko. Jen lale kiõ wãwen Anij e ar kõmõn menin.