Leo E Kajur Tata

KWO jela ke etan leo e kajur tata im e ar ion lõl? Ej juõn dri ekajet etan Samson. Jeova eo ej lelok ñõn Samson kajur eo an. Mokta jen an lotak Samson, Jeova e ar jiroñ jinen im ba: ‘Mottõn jirik kwo naj keutak nejõm ladrik. E naj tel im lomoren Israel jen dri Pi-lis’tia ro.

Dri Pi-lis’tia ro rej armij ro re nana im rej jokwe ilo Ke’nean. Elõñ eman in tõrinae ro ibeir, im rej lukkun kokkure dri Israel ro. Juõn ien, ke Samson ej ilok ilo ial eo an ñõn ijo jikin dri Pi-lis’tia ro, juõn kiru laiõn elap ej itok im roror im wonmaik e. Ak Samson ej mõn laiõn eo kin pein wõt. Ej bareinwõt mõn elõñ buki dri Pi-lis’tia ro re nana.

Tokelik, Samson ej yokwe juõn kõra etan Di-lai’la. Dri tel ro an dri Pilis’tia ro rej kalimuri Di-lai’la bwe kajojo iair enaj lelok ñõn e 1,100 mõttõn silver elañe enaj jiroñ ir kin unin an Samson lukkun kajur. Di-lai’la e kõnan bõk monni in elap. Ejjab juõn jeran Samson emol, ak armij an Anij. Kin men in ej keini an kajitõk iben Samson kin men eo im ej kõmõn bwe en lukkun kajur.

Eliktata, Di-lai’la ej karel Samson bwe en jiroñ e men eo etino kin an kajur. Ej ba, ‘Re jañin bukwe kolan bõra, jen ien eo I ar lotak, bwe Anij e ar kãlet iõ bwe in juõn dri korijeran ejej uan, etan dri Naz’ar. Elañe r’ar bukwe kolan bõra, e naj kar joko aõ kajur.’

Eokwe, ke Di-lai’la e jela men in, e ar kakiki e ion neen. Inem ej kir juõn eman bwe en dreloñ im mwijbõre. Ke e ar ruj Samson, e joko kajur eo an. Inem dri Pi-lis’tia ro rej dreloñ im jibwe e. R’ar itiki mejen, im kõmõn bwe en air dri kamakoko.

Juõn ran, dri Pi-lis’tia ro r’ar kõmõn juõn kwojkwoj elap ñõn kabuñ ñõn anij eo air, etan Degon, im rej kadriojlok Samson jen prisõn bwe ren kajerere kake e. Ak kolan bõran e ar jino in bar edrek. Samson ej konono ñõn ladrik eo ej jibwe pein im tel e: ‘Kwon kotlok iõ bwe in tolumi jur ko jurin mwin.’ Inem Samson ej jar ñõn Jeova bwe en kakajur e, im ej kapjere jur ko. Ej lamij im ba: ‘In mij iben dri Pi-lis’tia ro. Eor 3,000 dri Pi-lis’tia ro ilo kwojkwoj eo, im ke Samson e ar kõnkõn kin aolepen an maroñ nae jur ko, mweo e ar okjak im buñõt aolepen armij rein renana im re mij.