E Jeebeplok Jerusalem

E MOTLOK kiõ elõñlok jen 10 yiõ jen ke Kiñ Neb-u-kad-nez’zar e ar bõk aolep dri Israel ro im r’ar ber ilo jikul ko remõn ñõn Babilõn. Im kiõ lale mõk ta eo ej walok! Rej tile Jerusalem. Im dri Israel ro r’ar jab mij rej lukwõj peir im ãñinlok ir ñõn Babilõn.

Kememij, eñin men eo me dri kanan ro an Jeova r’ar kakkil ir im ba e naj walok elañe armij ro r’ar jab ilok jen air nana. Ak dri Israel ro r’ar jab eoroñ dri kanan ro. R’ar wonmanlok wõt ilo air kabuñ ñõn anij wan ko im jab ñõn Jeova. Kin men in, armij ro rej tellokin bõk kaje. Je jela men in kinke Izikiel, dri kanan eo an Anij ej kennanek kij kin men ko re nana me dri Israel ro r’ar kõmõni.

Kwo jela ke wõn Izikiel? Ej juõn ian likao ro me Kiñ Neb-u-kad-nez’zar e ar bõk ñõn Babilõn elõñlok jen 10 yiõ mokta lok jen an walok kokkure in elap ilo Jerusalem. E ar bareinwõt bõk Daniel im lõmaro jilu jeran, Sha’drach, Me’shach, im A-bed’ne-go ñõn Babilõn ilo ejja ien eo wõt.

Ke Izikiel e ar ber ilo Babilõn, Jeova e ar kwalok ñõn e men ko re nana im r’ar walok ilo Jerusalem ilo tempel eo. Jeova ej kõmõn men in ikijen juõn men in kabwilõñlõñ. Ilo mol, Izikiel ej berwõt ilo Babilõn, ak Jeova ej lelok bwe en lo aolep menko rej walok iloan tempel eo. Im men ko Izikiel ej loi re kanuij in nana!

‘Kwon lale mõk men in jõjõik ko armij ro rej kõmõni ijin ilo tempel eo,’ Jeova ej jiroñ Izikiel. ‘Lale worwor ko re obrõk kin pija in serpent im men in mour ko jet. Im lale an dri Israel ro kabuñ ñõn ir!’ Izikiel ej lo men kein, im ej jei men ko rej walok.

‘Kwoj lo ke men ko dri tel ro an Israel rej kõmõni ilo etino?’ Jeova ej kajitõk iben Izikiel. Aet, ej lo men kein bareinwõt. Eor 70 eman, im aolepeir rej kabuñ ñõn anij wan. Rej ba: ‘Jeova ejjab lo kij. Emotlok jen eneo.’

Inem Jeova ej kwalok ñõn Izikiel jet kõra ro rej ber ilo aur in tempel eo i-tu eañ. Rej jijõt ijo im kabuñ ñõn Tam’muz, anij wan eo. Im lale lõmarõn rej ber ilo jikin dreloñ ñõn loan tempel eo an Jeova! Eor tarrin 25. Izikiel ej lo ir. Rej buñbero ñõn tu-rear im kabuñ ñõn al!

‘Armij rein rej kajekron iõ,’ Jeova ej ba. ‘Rejjab baj kõmõni wõt menko re nana ak rej dreloñ iloan tempel eo aõ im kõmõni ie.’ Kin men in Jeova ej kalimur: ‘Re naj iñjake kajur in aõ illu. Im I jamin buromõj kake ir ñe re jorran.’

Ej tarrin jilu wõt yiõ elikin an Jeova kwalok men kein ñõn Izikiel im dri Israel ro rej jumae Kiñ Neb-u-kad-nez’zar. Kin men in ej ilem tõrinaek ir. Elikin juõn yiõ jimõttõn, dri Babilõn ro rej rupi worwor in Jerusalem im tile jikin kwelok eo im e bwillok im bwil brij. Enañin aolepen armij ro re mij, im bwe ro r’ar bõklok ir im kajebokweik ir ilo Babilõn.

Etke Jeova e ar kotlok bwe kokkure in elap en walok ñõn dri Israel ro? Aet, kinke r’ar jab eoroñ Jeova im jab bokake kien ko an. Men in ej kwalok joñan an lap tokjen bwe jen bokake Anij ien otemjej.

Mokta rej kotlok jet armij bwe ren berwõt ilo enen Israel. Kiñ Neb-u-kad-nez’zar ej likit juõn dri Ju, etan Ged-a-lai’a bwe en lale armij rein. Ak jet ian dri Israel ro re mõn Ged-a-lai’a. Kiõ armij ro re mijõk bwe dri Babilõn ro re naj itok im kokkure aolepeir kinke men in e nana e ar walok. Kin men in, rej iun Jeremaia bwe en ilok ibeirlok, im rej ko ñõn Ijipt.

Men in e kõmõn bwe en ejelok juõn armij ilo enen Israel. Iomin 70 yiõ ejelok juõn armij ej jokwe ilo eneo. Ejelok kobban. Ak Jeova ej kalimur bwe enaj kajeblak armij ro an ñõn eneo elikin 70 yiõ. Ak iomin ien in, ta eo ej walok ñõn ro dron Anij ilo enen Babilõn, ijo r’ar bõklok ir ñõn e? Jen lale.