Jisõs Ej Jeblaklok Ñõn Lõñ

IOMIN jet ran, Jisõs ej kwalok e mõke ñõn ro dri kaloran elõñ alen. Juõn ien, tarrin 500 ian dri kalor ro rej loe. Ilo ien an weaktok ñõn ir, kwo jela ke ta eo Jisõs ej konono ibeir kake? Ailiñ in Anij. Jeova e ar jilkintok Jisõs ñõn lõl bwe en katakin kin Ailiñ eo. Im ej kõmõn men in manlok wõt elikin an jerkakbiji jen ro remij.

Kwoj kememij ke ta ailiñ in Anij? Aet, Ailiñ eo ej juõn lukkun kien an Anij i lõñ, im Jisõs ej E eo me Anij e ar kãlet e bwe en kiñ. Einwõt emwij ar katak, Jisõs e ar kwalok im kamol bwe e naj juõn kiñ emõn ilo an najirik ro re kwuli, im bareinwõt kajerkakbiji ro re mij ñõn mour!

Inem ñe Jisõs ej iroij einwõt kiñ ilo lõñ iomin juõn tausan yiõ, ta eo e naj walok ion lõl? Aet, aolepen lõl e naj oktak im erõm juõn paredais e aibujuij. E naj ejelok bar tõrinae, ak koaroñ, ak nañinmij, ak mij. Je jela bwe emol men in kinke Anij e ar kõmõnmõn lõl bwe en juõn paredais bwe armij ro ren mõnõnõ kake. Eñin unin an kar kõmõnmõn jikin kallip in Iden ilo jinoin. Im Jisõs e naj lale bwe men eo Anij e kõnan kõmõne en tõbrak.

Ien eo ej itok kiõ bwe Jisõs en jeblaklok ñõn lõñ. Iomin 40 ran, Jisõs e ar kwalok e mõke ñõn ro dri kaloran. Inem rej lukkun tõmak bwe e bar mour. Ak mokta jen an ilok jen ro dri kaloran ej jiroñ ir: ‘Komin berwõt ilo Jerusalem mae ien eo komij bõk jitõb kwojarjar.’ Jitõb kwojarjar eo ej kajur eo an Anij, einwõt juõn kõto e kajur, im e naj jibañ ro dri kaloran bwe ren kõmõnmõn ankil an Anij. Eliktata, Jisõs ej ba: ‘Komin kennan kin iõ ñõn ijoko retolok tata i lõl.’

Elikin an Jisõs ba men in, juõn men in kabwilõñlõñ ej walok. E jino wonliñlok ñõn lõñ, einwõt am loe ijin. Inem juõn kõro ej binej e jen mejeir, im dri kalor ro rejjab bar lo Jisõs. Jisõs ej ilok ñõn lõñ, im e jino iroij ion ro dri kaloran ion lõl jen lõñ.