Katak 7
Kwon Kebake Yuk ñõn Anij ilo Jar
Etke ej aorõk bwe jen jar ien otemjej? (1)
Jej aikwij jar ñõn wõn, im ewi wãwen? (2, 3)
Ta men ko remõn jemaroñ jar kaki? (4)
Ñãt eo kwoj aikwij jar? (5, 6)
Anij ej roñjake ke jar ko otemjej? (7)
1. Jar ej ien ad konono ilo ettã ibben Anij. Kwoj aikwij jar ñõn Anij ien otemjej. Kin unin kwomaroñ kebakelok e einwõt juõn jeran ebak. Jehovah ej utiej im kajur tata, ak ej roñjake jar ko ad! Kwoj jar ñõn Anij ke ien otemjej?—Psalm 65:2; 1 Tessalonika 5:17.
2. Jar ej mõttan wãwen kabuñ eo ad. Kin menin, jej aikwij jar ñõn Anij wõt, Jehovah. Ke Jesus ear bed ion lõl, ear jar ien otemjej ñõn Jemen, jab ñõn bar juõn anij. Jej aikwij kõmmõn eindein. (Matthew 4:10; 6:9) Bõtab, ien otemjej jej aikwij jar ilo etan Jesus. Wãwen in ej kwalok bwe jej kautiej jerbal eo an Jesus im jej tõmak ilo katok in binmour eo an.—John 14:6; 1 John 2:1, 2.
3. Ñe jej jar jej aikwij jar jen buruer. Jejjab kõnan kiili ad jar ak konono kaki jen juõn book in jar. (Matthew 6:7, 8) Jemaroñ jar ilo jabdewõt wãwen ettã buruer, ilo jabdewõt ien, im jabdewõt jikin. Anij emaroñ roñjake jar ko ilo buruer meñe ejelok ainiken. (1 Samuel 1:12, 13) Ej juõn men emõn ñõn etal ñõn juõn jikin ejelok keroro ie im ejenolok jen armij ro jet ñe jej jar kin aikwij ko ad make.—Mark 1:35.
4. Ta men ko kwomaroñ jar kaki? Jabdewõt men emaroñ jelet kõtan eo am ibben. (Pilippai 4:6, 7) Jar eo an Jesus ej kwalok bwe jen jar kin etan Jehovah im karõk ko an. Bareinwõt jemaroñ kajitõk kin aikwij ko ad ilo kanniek, ñõn jolok bwid ko ad, im kin jibañ ñõn kejbarok kij jen men in kabo ko. (Matthew 6:9-13) Jar ko ad ren ejelok jabdewõt kibbon ie. Jej aikwij jar kin men ko wõt rej ekkar ñõn ankil an Anij.—1 John 5:14.
5. Kwomaroñ jar ilo jabdewõt ien buruem ej kamakit yuk ñõn kamolol ak nebar Anij. (1 Kronikel 29:10-13) Kwoj aikwij jar ñe ewor abañ ko am im men ko rej melejoñe tõmak eo am. (Psalm 55:22; 120:1) Ej juõn men ekkar ñõn jar mokta jen am mõñã. (Matthew 14:19) Jehovah ej kir kij bwe jen jar “ilo ien otemjej.”—Epesõs 6:18.
6. Elaptata jej aikwij jar elañe jar kõmõn juõn bwid elap. Ilo ien kein jej aikwij eowore Jehovah kin an tiriamokake im jolok bwid ko ad. Elañe jej kwalok bwid ko ad ñõn e im kate wõt kij ñõn jab bar kõmmõni, Anij ej bojak “in jolok bwid.”—Psalm 86:5; Jabõn Kennan 28:13.
7. Jehovah ej roñjake jar ko an armij ro rewãnik wõt. Ñõn kõmmõn bwe Anij en roñjake jar ko am, kwoj aikwij kamãt am maroñ ñõn mour ekkar ñõn kien ko an. (Jabõn Kennan 15:29; 28:9) Ej aikwij wor ettã buru ñe kwoj jar. (Luke 18:9-14) Kwoj aikwij jerbal ekkar ñõn jar ko am. Inem kwonaj kamole men ko kwoj ba. Ilo ien in Jehovah enaj uake jar ko am.—Hebrew 11:6.