Juon lõta jãn Kumi eo Ej Lale Aolep Eklejia ko an Ri-Kõnnaan ro an Jeova

Yokwe Ri-Kwal̦o̦k Naan eo kõn Aelõñ eo:

Baj pijaikl̦o̦k m̦õk el̦aññe en kar kwe juon iaan rijjilõk ro im kwõj jutak ioon Tõl Olive, im Jesus ej wal̦o̦k waj ñan kwe. Innem m̦oktal̦o̦k jãn an wanlõñl̦o̦k ñan lañ, ej ba: “Kom̦ naaj obrak kõn kajoor ñe jetõb kwõjarjar enaaj itok ioomi, im kom̦ naaj kwal̦o̦k kõn ña ilo Jerusalem, ilo aolepen Judia im Sameria, im ñan ãne ko rettol̦o̦ktata ilo lal̦.” (Jrb. 1:8) En kar ewi wãween am̦ eñjake kõn naan kein?

Bõlen kwõnaaj kar bõk eñjake eo bwe eban tõprak jerbal eo Jesus ej jiroñ eok bwe kwõn kõm̦m̦ane. Kwõmaroñ l̦õmn̦ak im ba, ‘Ewi wãween an juon kumi edik in ri-kal̦oor ro maroñ kwal̦o̦k naan “ñan ãne ko rettol̦o̦ktata ilo lal̦”?’ Im bõlen kwõmaroñ bar keememej naanin kakkõl eo Jesus ear lewaj ilo boñõn eo m̦okta jãn an mej ke ear ba: “Juon ri-karejar ejjab utiejl̦o̦k jãn irooj eo an. El̦aññe rar kaeñtaan eõ, innem renaaj bar kaeñtaan kom̦. El̦aññe rar pokake naan ko aõ, innem renaaj bar pokake naan ko ami. Bõtab renaaj kõm̦m̦ani aolep men kein n̦ae kom̦ kõn wõt ãt eo eta, kõnke rejaje kajjien Eo ear jilkintok eõ.” (Jon 15:20, 21) Ilo am̦ kõl̦mãnl̦o̦kjen̦ kõn naan kein, kwõmaroñ kajjitõk ippam̦ make, ‘Ewi wãween bwe en maroñ lõt aõ kwal̦o̦k naan meñe inaaj iioon matõrtõr im jum̦ae?’

Rainin, jej bar iioon ejja wãween in wõt. Ãinwõt Ri-Kõnnaan ro an Jeova, ej aikuj lõt ad kwal̦o̦k naan ñan “ãne ko rettol̦o̦ktata ilo lal̦,” im ñan “armej in aelõñ otemjej.” (Matu 28:19, 20) Ewi wãween ad maroñ kõm̦m̦ane jerbal in, el̦aptata ñe kar kanaan l̦o̦k im̦aan bwe jenaaj iioon jum̦ae?

Bokin Jerbal ej kwal̦o̦k bwebwenato ko rekãitoktoklimo kõn wãween an kar Jeova jipañ rijjilõk ro im Kũrjin ro m̦õttaer bwe ren maroñ kajejjet jerbalin kwal̦o̦k naan eo aer. Kar kõm̦m̦ane bok in kwõj pojak in riiti ñan jipañ eok etale bwebwenato kein im bõk ejja eñjake ko wõt aer rekam̦õn̦õn̦õ kõn aer kar loe an jerbalin kwal̦o̦k naan m̦õkaj an wõnm̦aanl̦o̦k. Kwõnaaj lukkuun bwilõñ kõn an lõñ wãween ko relukkuun ãinl̦o̦kwõt juon ikõtaan ri-karejar ro an Anij ilo tõre ko an rijjilõk ro im ri-karejar ro an rainin. Kwõnaaj lo bwe wãween kein me rej ãinl̦o̦kwõt juon rejjab kitibuj wõt jerbal eo ad ak rej bar kitibuj wãween ad laajrak ilo ad kõm̦m̦ane jerbal in. Ejjel̦o̦k pere bwe ilo am̦ kõl̦mãnl̦o̦kjen̦ kõn men kein, men in enaaj kõkajoor tõmak eo am̦ bwe Jeova ej wõnm̦aanl̦o̦k wõt im tõl m̦õttan doulul eo an ijin ioon lal̦.

Kõmij kõjatdikdik im jar bwe am̦ etale bokin Jerbal enaaj kõkajoorl̦o̦k lõke eo am̦ bwe Jeova enaaj jipañ eok im bwe kajoorin jetõb kwõjarjar eo an enaaj kõkajoor wõt eok. Kõmij bar kõjatdikdik bwe am̦ katak bok in enaaj rõjañ eok ñan wõnm̦aanl̦o̦k wõt ilo an ‘lõt am̦ kwal̦o̦k kõn ennaan eo’ kõn Aelõñ eo an Anij im jipañ ro jet ñan pãd ilo ial̦ eo ej tõll̦o̦k ñan mour.​—Jrb. 28:23; 1 Tim. 4:16.