Juon Lõta jãn Kumi eo Ej Lale Aolep Eklejia ko an Ri Kõnnaan ro an Jeova
Yokwe Kom̦ Ro Jeim im Jatim:
Jino jãn kar Imõniaroñroñ eo an Jãnwõde 1, 2008, ear jino wal̦o̦k juon taitõl̦in katak etan “Kajjioñe Tõmak eo Aer.” Jãn kar iien in, ear wal̦o̦k katak in ãlikin kajjojo jilu allõñ. Katak ko kar jei rar pedped wõt ioon taitõl̦in katak in. El̦ap wõt ad kar m̦õn̦õn̦õ ke jaar riiti katak kein!
Ta ko ro jet rar ba ãlikin aer kar riiti katak kein? Eokwe, ãlikin an kar juon kõrã riiti bwebwenato eo kõn Marta, ear je naan kein: “Iar ettõñ ke iar riiti bwebwenato eo an kõnke ãin e wõt bar ña. Ñe ej wõr rilotok, el̦ap wõt aõ kõn̦aan kwal̦o̦k karwainene ñan er im poub in kõm̦m̦an jerbal, im mel̦o̦kl̦o̦k jet iien bwe ij aikuj bõjrak jidik bwe in baj bwebwenato im m̦õn̦õn̦õ ippãn rein m̦õtta.” Ke juon jo̦dikdik ear riiti bwebwenato eo an Ester, ear ba: “Elukkuun m̦ool bwe emaroñ l̦ap ad l̦õmn̦ak wõt kõn nuknuk ko jej kõn̦aki im jitael̦ ko rekããltata. Ejjab nana ñe jej tõrejab bwe jen erreo im jejjet. Men eo dein, jejjab kõn̦aan bwe en l̦e jãn joñan ad tõrejab.” Ear bar wõnm̦aanl̦o̦k wõt im ba: “Men eo el̦ap an Jeova kaorõke ej bũruod.” Bareinwõt, ke juon jeid im jatid kõrã ear riiti bwebwenato eo kõn rijjilõk Piter, ekar lukkuun kãitoklimoen. Ear ba: “Joñan an kar em̦m̦an bwebwenato kein ippa, iar pijaik aõ pãd ie! Ej ãinwõt ñe iar mour ilo tõre eo im lo men ko rar wal̦o̦k! Aolep men ko eoon ko rar kwal̦o̦ki, iar loi, eñjaki, roñjaki, ãtbwier, im nemaki.”
Ebar lõñ armej ro jet rar jeje tok im kwal̦o̦k aer kam̦m̦oolol kõn katak kein. Men in ej kam̦ool naan ko rijjilõk Paul ear jei ilo iien ko etto ke ear ba: “Men otemjej em̦õj jei ilo Jeje ko, ar jei bwe en katakin kõj.” (Rom 15:4, UBS) Aet, Jeova ear likũti bwebwenato kein ilo Baibõl̦ ñan katakin kõj kõn elõñ men ko raorõk im remaroñ jipañ kõj. Kõj aolep, jekdo̦o̦n ewi toon ad pãd ilo m̦ool eo ak jemaroñ katak im bõk tokjãn jãn bwebwenato kein.
Kõmij kõn̦aan rõjañ kom̦ ñan riiti bok in ilo iien eo em̦õkajtata. Bareinwõt, kõjerbale ilo Iien Kabuñ an Baam̦le eo ami. Enaaj lukkuun em̦m̦an ippãn ajri ro nejimi bok in! Ñe eklejia eo ami ej katak kake ilo iien Katak Baibõl̦ an Eklejia, jab jol̦o̦k juon iien kweilo̦k! Bõk ami iien ñe kom̦ij riiti im jab ekkaiuriur. Pijaik ami pãd ilo iien eo im kajjioñ bõk ejja eñjake ko wõt me ro ilo Baibõl̦ rar bũki, im lo ta ko rar loi. Keidi ta ko rar kõm̦m̦ani ke rar iioon apañ ko ñan ta eo kwõn kar kõm̦m̦ane.
Kõmij lukkuun m̦õn̦õn̦õ in lewaj bok in ñan kom̦. Im kõmij tõmak bwe enaaj juon jeraam̦m̦an ñan kwe im baam̦le eo am̦. Kõm kõn̦aan lewaj am naanin yokyokwe im kajeraam̦m̦an ñan kom̦,
Kumi eo Ej Lale Aolep Eklejia ko an Ri Kõnnaan ro an Jeova