KAJJITÕK 3
Elemen Aõ Kõnnaan Ippãn Jinõ im Jema?
TA EO KWÕNÃJ KAR KÕM̦M̦ANE?
L̦õmn̦ak m̦õk kõn waanjoñak in: Jen ba bwe ejo̦teenin Wõnje. Im Geoffrey, eo me 17 an iiõ, ej kab m̦õj an kõm̦m̦ani jerbal ko an ilo m̦weo, im kiiõ ekõn̦aan kakkije. Innem ej jijet ilo jea eo em̦m̦antata ippãn im ej kõjo̦ TV eo im jino an alwõj.
Ej baj jijet wõt ak jemãn ej del̦o̦ñtok, bõtab ejjab mejãn m̦õn̦õn̦õ.
Jemãn ej ba ñane: “Geoffrey! Kwõjaam̦ alwõj TV, ãinwõt kõmar ba kwõn jipañ l̦adik en̦ jatũm̦ kõn homework kan̦ an? Kwõj baj jaje roñjake!”
Geoffery ej kõrraat im ba: “Pãddo kõnnaan.” Meñe jidik wõt an kõnnaan ak jemãn ej roñ.
Kõn men in, jemãn ej m̦al m̦aanl̦o̦k im ba: “Bar ba m̦õk, ta n̦e kwõj ba?”
Im Geoffery ej karo̦o̦l mejãn im ba, “Ejjel̦o̦k.”
Kiiõ jemãn elukkuun illu, im eba: “Jab kõnnaan rot n̦e tok ñan ña!”
El̦aññe en kar kwe Geoffery, ta eo kwõnãj kar kõm̦m̦ane bwe men in en jab wal̦o̦k?
BÕJRAK IM L̦ÕMN̦AK!
Kilen am̦ kõnnaan ippãn jinõm̦ im jem̦am̦ ej ãinwõt ñe kwõj kattõre juon wa. Ñan waanjoñak, el̦aññe kwõj ettõr ilo ial̦leplep eo im kiiõ em̦õj pineje, kwõnãj bar pukot juon ial̦ im jeer ñane.
ÑAN WAANJOÑAK:
Juon leddik etan Leah ej ba: “Elukkuun pen aõ kepaak jema im kõnnaan ippãn. Jet iien, ñe ij baj kõnono ippãn kõn jet men ej ba, ‘Jol̦o̦k aõ bõd, kwõj kõnnaantok ñan ña ke?’”
EWÕR JILU MEN KO LEAH EMAROÑ KÕM̦M̦ANI.
Bũroñe jemãn.
Leah ej bũroñ im ba, “L̦ababa, elukkuun aorõk men e ittõn ba! Kwõn roñjake!”
Jab kõnnaanl̦o̦k ñan jemãn.
Leah ej ba bwe eban bar kõnnaan ippãn jemãn kõn bũraabl̦õm̦ ko an.
Kõttar ñan bar juon iien em̦m̦an im kõnnaan kake men eo ear itõn kõnnaan kake.
Leah enaaj kõnnaan ippãn jemãn tokãlik, ak je juon lõta kõn bũraabl̦õm̦ eo ej iioone.
Ewi iaan men kein jilu kwõnãj kar ba ñan Leah bwe en kõm̦m̦ane?
L̦ÕMN̦AK M̦ÕK KÕN MEN IN: Kõn an jemãn Leah poub kõn men eo ej kõm̦m̦ane, ejjab loe ke ledik in nejin einepata. El̦aññe Leah ej kããlõt Nõm̦ba 1 im kajju bũroñ, jemãn emaroñ jab mel̦el̦e etke ej bũroñe. Men in emaroñ kõm̦m̦an bwe jemãn en jab m̦õn̦õn̦õ in roñjake men ko ej ba, im enaaj kaalikkar an Leah jab kautiej jemãn. (Epesõs 6:2) Innem alikkar bwe men eo kein kajuon eban jipañ ñan jidik.
Ãinwõt am̦ kar jeer ñan bar juon ial̦ kõnke em̦õj pineje ial̦leplep eo, kwõmaroñ bar pukot juon wãween ñan kõnnaan ippãn jinõm̦ im jem̦am̦
Meñe Nõm̦ba 2 emaroñ men eo epidodotata ñan an Leah kõm̦m̦ane, ak ejjab juon menin mãlõtlõt. Etke? Kõnke Leah ej aikuj kõnnaan ippãn jemãn kõn bũraabl̦õm̦ ko an bwe en maroñ jipañe ñan jel̦ã kilen kõm̦adm̦õdi. Im jemãn ej aikuj jel̦ã ta ko rej wal̦o̦k ilo mour eo an bwe en maroñ jipañe. El̦aññe Leah ejjab kõnnaanl̦o̦k ippãn jemãn, eban wõr men em̦m̦an enãj wal̦o̦k.
Bõtab ilo Nõm̦ba 3, Leah ejjab kõtl̦o̦k bwe apañ eo en kabõjrake jãn an kajjioñ kõnnaan ippãn jemãn. Ak ej kate e ñan bar pukot juon iien ñan kõnnaan ippãn. Im el̦aññe ej pepe in je juon lõta ñan jemãn kõn bũraabl̦õm̦ ko an, enaaj em̦m̦anl̦o̦k an mour ãlikin wõt an kõm̦m̦ane men in.
An je juon lõta emaroñ bar jipañe ñan lukkuun kwal̦o̦k ta ko ej kajjioñ in ba ñan jemãn. Ñe jemãn ej riiti lõta eo an, enaaj jel̦ã ta bũraabl̦õm̦ eo Leah ej iioone. Ejjel̦o̦k kajjitõk, men eo kein kajilu enaaj jipañ Leah im jemãn jim̦or. Kããlõt in ñan jijet im kõnono kake ippãn doon, ak ñan je juon lõta, ej l̦oore naanin rõjañ eo ilo Baibõl̦ me ej ba, “Kõttõpar men ko rej letok aenõm̦m̦an.”—Rom 14:19, UBS.
Bar ta ko jet Leah emaroñ kõm̦m̦ani?
L̦õmn̦ak kõn bar juon men. Innem bar je ta eo enaaj wal̦o̦k ñe enaaj kõm̦m̦ane men in.
JAB BA MEN KO RENAAJ KÕM̦M̦AN BWE EN BÕD AER L̦ÕMN̦AK
Keememej bwe men ko kwõj ba im men ko rũtto ro jinõm̦ im jem̦am̦ rej roñ am̦ ba, ejjab aolep iien renaaj jejjet ekkar ñan men eo kwõj kajjioñ in ba.
ÑAN WAANJOÑAK:
Jinõm̦ im jem̦am̦ rej kajjitõk etke kwõjjab mejãn m̦õn̦õn̦õ. Kwõl̦ak uwaak im ba, “Ijjab kõn̦aan kõnnaan kake.”
Erro l̦ak roñ am̦ ba men in ej ãinwõt ñe kwõj ba: “Ijjab lõke komiro ñan kõnnaan kõn bũraabl̦õm̦ e aõ. Inãj ba l̦o̦k ñan ro m̦õtta ak iban ba waj ñan komiro.”
L̦õmn̦ak m̦õk kõn am̦ iioon juon bũraabl̦õm̦, im jinõm̦ im jem̦am̦ rej ba bwe rekõn̦aan jipañ eok. Ak kwõj ba ñan er: “Jab inepata. Imaroñ make kõm̦adm̦õde.”
Jinõm̦ im jem̦am̦ rel̦ak roñ am̦ ba naan kein ej ãinwõt ñe kwõj ba ta ñan er?
Ta wãween eo em̦m̦anl̦o̦k ñan am̦ uwaake er?