KAJJITÕK 7
Elemen Aõ Kõjparok Eõ jãn Menin Kapo eo ñan Pãd Ippãn Doon?
TA EO KWÕNÃJ KAR KÕM̦M̦ANE?
L̦õmn̦ak m̦õk kõn waanjoñak in: Ej kab ruo wõt allõñ in an Heather teiti Mike ak ej ba bwe ãinwõt ñe ear jel̦ã kajjeen jãn jem̦aan. Aolep iien erro ej text e doon im jol̦o̦k elõñ awa im kõnnaan ippãd doon ilo jeel̦boon ko nejierro. Joñan aerro jel̦ã l̦õmn̦ak ko an doon, ñe juon iaaerro ej kõnnaan, eo juon emaroñ jel̦ã ta eo ej tõn ba im ej wõnm̦aanl̦o̦k wõt im kõjem̦l̦o̦ke jãntõj eo an.
Ium̦win allõñ ko ruo, Mike im Heather rar jibwe pein doon im um̦m̦a jidik. Ak kiiõ ewõr juon men el̦apl̦o̦k an Mike kõn̦aan bwe erro en kõm̦m̦ane ijello̦kun aerro baj bwebwenato wõt im kõm̦m̦ani men kein. Heather ejjab kõn̦aan katõprak kõn̦aan eo an Mike ak ejjab bar kõn̦aan bwe en jako ijo aerro. Ejjel̦o̦k bar juon enañin ba ñane bwe elikatu im elukkuun aorõk. Im Heather ej ba ippãn make, ‘Kab ke kõm̦ro Mike lukkuun yokwe doon . . . ’
El̦aññe kwõrũtto im kwõpojak ñan am̦ teit kiiõ im en kar kwe Heather, ta eo kwõnãj kar kõm̦m̦ane?
BÕJRAK IM L̦ÕMN̦AK!
An ruo armej pãd ippãn doon ej juon menin letok jãn Anij ñan ro wõt em̦õj aer m̦are. Kõn men in, ñe juon jiroñ im juon likao rej pãd ippãn doon m̦okta jãn aerro m̦are rej ko̦kkure menin letok in. Ej ãinwõt ñe rej bõk nuknuk eo elukkuun aiboojoj me juon ear lel̦o̦k ñan er im iri jikin ko rettoon kake
Ta eo enaaj wal̦o̦k el̦aññe kwõj kattõre juon wa im eiim̦ am̦ kattõr? Eokwe kõn am̦ jab pokake kakien eo ñan jab kaiim̦ im kattõr, kwõnaaj itaak im jorrããn. Eñin men eo enaaj bar wal̦o̦k ñan eok el̦aññe kwõjjab pokake kien ko ilo Baibõl̦ kõn mour erreo, ãinwõt kien in me ej ba: “Kom̦win kõjparok kom̦ jãn l̦õñ.”—1 Tessalonika 4:3.
Ta ko renaaj wal̦o̦k ñe kwõjjab pokake kien in? Baibõl̦ ej ba: “Eo ej l̦õñ ej make jerawiwi n̦ae ãnbwinnin.” (1 Korint 6:18) Elemen an nãj men in wal̦o̦k?
Ke rũmmãlõtlõt ro rar kõm̦m̦an etale ko, rar lo bwe jo̦dikdik ro me em̦õj aer pãd ippãn bar juon m̦okta jãn aer m̦are, elõñ iaaer rar iioon juon ak enañin aolep wãween kein renana itulal̦.
INEPATA IM NANA AER MOUR. Enañin aolep jo̦dikdik ro me em̦õj aer pãd ippãn juon m̦okta jãn aer m̦are, rej ba bwe relukkuun kar ajl̦o̦k im nana aer mour tokãlik.
L̦ÕMN̦AK ETTOON. Ãlikin an juon l̦addik im leddik pãd ippãn doon, erro jim̦or ej l̦õmn̦ak im ba, ‘Bar wõn em̦õj an l̦e ak lie pãd ippãn?’
BŨROM̦ÕJ BWE EJJAB IM JEJJET ÑAN KÕN̦AAN EO AER ILO KAR JINOIN. Ilo tum̦wilal̦in bũruon ledik ro, em̦m̦anl̦o̦k ippãer juon eo me enaaj kõjparok er im jab iukkure kake er. Im elõñ l̦adik ro rej lo bwe ejakol̦o̦k aer kõn̦aan ledik ro me epidodo aer kar uwaake er.
M̦ool eo in: El̦aññe kwõj uwaake juon ñan pãd ippãn m̦okta jãn am̦ m̦areiki, kwõj ko̦kkure eok make ilo am̦ ajel̦o̦k men eo el̦ap an lukkuun aorõk. (Rom 1:24, UBS) Am̦ bõjin elukkuun aorõk ñan am̦ ajel̦o̦k ñan jabdewõt!
Kwal̦o̦k bwe kwõj juon eo epen an uwaake jabdewõt im ej lukkuun ‘kõjparoke jãn mourin l̦õñ.’ (1 Tessalonika 4:3) Innem juon raan ñe kwõnaaj m̦are, kiiõ kwõmaroñ pãd ippãn eo kwõj lukkuun yokwe. Im ñe komiro naaj pãd ippãn doon, kwoban aikuj inepata im ajl̦o̦k tokãlik, ak jãlõke eok make. Eñjake kein renana ekkã aer wal̦o̦k ãlikin an ruo armej pãd ippãn doon ak rar jab m̦are m̦okta.—Jabõn Kõnnaan 7:22, 23, UBS; 1 Korint 7:3, UBS.
TA AM̦ L̦ÕMN̦AK?
Armej eo elukkuun yokwe eok enaaj ke kõm̦m̦an bwe kwõn jorrããn im bũrom̦õj?
Armej eo elukkuun yokwe eok enaaj ke kapo eok ñan kõm̦m̦ani men ko renaaj ko̦kkure jem̦jerã eo am̦ ippãn Anij?—Hibru 13:4.