Kar Kalbuuji Jesus

Jesus im rijjilõk ro an rar etetal ilo Kom̦lal̦ Kidron l̦o̦k ñan Tol̦ Olivet. Elukwõn boñ ilo tõre in im ekar boñõn meram. Ke rar tõpar jikin kallib eo etan Getsemane, Jesus ear ba ñan er: ‘Kom̦win pãd ijin im ekkõl wõt.’ Innem ear etal ettol̦o̦k jidik jãn er ilo jikin kallib eo im jubukwe ñan lal̦. Meñe ear l̦ap an eddo bũruon, ak ear jar ñan Jeova im ba: “En jejjet ankilaam̦.” Innem Jeova ear jilkinl̦o̦k juon enjel̦ ñan kõkajoore. Ke Jesus ear jepl̦aakl̦o̦k ñan ippãn rijjilõk ro jilu, ear loe aer kiki. Innem ear ba: ‘Kom̦win ruj! Ejjab iien kiki kiiõ! M̦õttan jidik ejejjet awa eo bwe ren liaakel̦o̦k eõ ñan rũkõjdat ro.’

Ejjabto jãn iien eo, Judas ej jãdetok. Ear tõl tok juon kumi in rinana im rej ejjeb jãje im kein deñdeñ ippãertok. Judas ear jel̦ã ia eo Jesus enaaj kar pãd ie kõnke rekõn etal ñan jikin kallib in Getsemane. Im em̦õj an kar ba m̦oktal̦o̦k ñan rũttarin̦ae ro ke enaaj kaalikkarl̦o̦k ñan er wõn Jesus. Ear kajjul̦o̦k ñan ippãn Jesus im ba: ‘Yokwe eok, Rabbai’ innem ear mejenmaiki. Im Jesus ear ba: ‘Judas, ta kwõj ketake eõ kõn mejenma ke?’

Jesus ear kem̦aanl̦o̦k im kajjitõk ippãn rinana ro: “Wõn eo kom̦ij pukote?” Rar ba: “Jesus ri-Nazeret.” Innem ear uwaake er im ba: “Ña e.” Ke ej ba men in, l̦õm̦aro rar kãlikl̦o̦k im okjak. Bar juon alen Jesus ear bar kajjitõk ippãer: “Wõn eo kõmij pukote?” Rar bar uwaak im ba: “Jesus ri-Nazeret.” Jesus ear uwaak: ‘Em̦õj aõ kar ba waj, ña e. Kom̦win kõtl̦o̦k em̦m̦aan rein.’

Ke Piter ear lo ta eo ej wal̦o̦k, ear kanõktok jãje eo jãn men eo nien im m̦wijit lo̦jilñin Malkõs, rijerbal eo an bũrij l̦apl̦ap eo. Ak Jesus ear jibwe lo̦jilñin em̦m̦aan eo im ear mo̦. Innem ear ba ñan Piter: ‘Kwõn karo̦o̦l jaje n̦e ñan nien. El̦aññe kwõj ire kõn jaje, kwõnaaj mej kõn jaje.’ Innem rũttarin̦ae ro rar jibwe Jesus im lukwõje pein, ak rijjilõk ro an rar ko jãne. Kumi in rinana ro rar bõke ñan ippãn Annas, bũrij eo el̦ap. Annas ear kajitũkini Jesus im jilkinl̦o̦k ñan m̦weo im̦õn Bũrij L̦apl̦ap eo etan Keiapas. Ak ta eo ear wal̦o̦k ñan rijjilõk ro?