Kien ko Joñoul
BISHOP eo ilo England ilo Gloucester ear lo bwe elaplok jen jimettan in aolep priest ro ilo diocese (jikin eo me bishop eo ewor an maroñ ion) eo an rar jab maroñ elij aolep Kien ko Joñoul, im 10 percent iair rar jab jela tu-ia ilo Bible eo rar maroñ loi. Ak men in kar 450 yiõ ko remotlok. Wãwen eo ear oktak ke jen ien eo? Ejjab kanuij—einwõt juõn ekatak ilo Sunday Times kin priest ro an kabuñ in Anglican ear kalikar.
Jen 200 priest ro rar interview, 34 percent wõt rar maroñ kwalok aolep Kien ko Joñoul. Ibwiljin ro jet, juõn iair ear eñjake bwe kien kein ear lap an kananaik men ko, im bar juõn ear kajekdoni einwõt ejelok tokjen ñõn abañ ko ilo ran kein kin mwil emõn im nana.
Kwoj jela ke aolep Kien ko Joñoul ak ia eo kwomaroñ loi? Rej kalãjraki ilo book in Exodus, book eo kein karuo ilo Bible, eon ko 17 mokta ilo jebta 20. Etke kwojjab readi? Ijin ej juõn wãwen elamwan ñõn kalãjraki. Kien ko emen moktata ewor kõtan ñõn kabuñ eo ad ñõn Anij, eo kein ka lalim ej kalikar mour in family, kein ka jiljino ñõn ruatimjuõn rej jelet kõtan eo ad ibben armij ro jet, im eo kein kajoñoul ej einjuõn, ej kamakit kij ñõn etale burued make, ñõn lale un ko unin jej kõmmõn men ko. Ijin ej juõn kamelele ekadu kin ewi wãwen Christian ro remaroñ jerbale nan in kakabilek ko.
Kein kajuõn: Kabuñ ñõn Ri Kõmõnmõn eo ad wõt. Kein karuo: Jab kajerbal ekjap ko ilo kabuñ eo ad. Kein kajilu: Ien otemjej kautiej im kokwojarjar etan Anij. Kein kaemen: Kõtlok ien ñõn lemnak kin men ko lor jitõb, ilo ejelok men in kamad ko. Kein kalalim: Ajiri ro, kautiej jememi im jinemi. Kein kajiljino: Jab uror. Kein kajiljilimjuõn: Bõprae mour in lũñ. Kein karualitõk: Jab kwot. Kein karuatimjuõn: Konono mol. Kein kajoñoul: Jab ankwõnak.
Kien ko Joñoul rar mõttan lãjrak in kien ko kar lelok ñõn Moses. Ak kakabilek ko rej anañelok rej indio. (Rome 6:14; Kolosse 2:13, 14) Kin un in, ri kalor ro an Jesus rar elij nan ko jen im jitõñlok ñõn Kien ko Joñoul. (Rome 13:8-10) Mour rainin enaj laplok an kamõnõnõ—im diklok an wor uata—elañe aolep rar kautiej im mour ekkar ñõn nan in kakabilek ko rej kakõrmol in Anij!