Ewõr Ke Mour Elikin Mij?

“ELAÑE JUÕN armij eo ekajur enbwinin im emij en maroñ ke bar mour?” ri patriarch eo Job ear kajitõk jet 3,500 yiõ ko remotlok. (Job 14:14) Kajitõk in armij rar bwok kake iumin thousand yiõ ko. Iumin ebeben ko, armij ro ilo jabdewõt jukjuk in bed im manit ko rar etale kajitõk in im elõñ kain lemnak ko rar kwaloki.

Elõñ ro rej ba rej Ri Christian rej tõmak ilo lañ im hell. Ak, Ri Hindu, rej tõmak ilo bar juõn mour eo ej wõnmanlok wõt elikin mij. Ilo an kwalok kin lemnak eo an Ri Muslim, Emir Muawiyah, juõn ri jibañ ilo juõn jikin kabuñ eo an Ri Islam, ej ba: “Kimij tõmak enaj wõr juõn ran in ekajet elikin mij, ñe kwoj etal ñan iman mejen Anij, Allah, einwõt ñe kwoj etal ñan jikin ekajet.” Ekkar ñan tõmak eo an Ri Islam, inem Allah enaj karõk ial eo an kajjojo armij im lelok e ñan paradise ak ñan kijeek in bwil.

Ilo Sri Lanka, Ri Buddhist im Ri Catholic jimor rej likit kejam ko im window ko air bwe ren bellok wõt ñe ej wõr ri mij ilo moko imwiir. Juõn lamp in oil ej urur, im ilo box in ri mij eo ijo neen ri mij eo ej bed ie rej kejellok ñan kejam eo iman mweo. Kilen kein, rej tõmak, rej kabidodoik an diojlok jitõb eo an ri mij eo.

Ekkar ñan Ronald M. Berndt ilo University eo an Western Australia, Ri Australia Aborigine ro rej tõmak bwe “armij ewõr juõn mõttan jitõb eo an eban mij.” Ilo Africa jet bwij ko ie rej tõmak bwe elikin mij armij rej erom dimon, ak armij ro rebuñbuñ rej erom ro jimmair ilo jitõb ro renaj bõk kautiej im kajitõk kake ir einwõt ri tel ro jejjab lo ir kin mejed an jukjuk in bed eo.

Ilo jet ailiñ ko, tõmak ko kin wãwen eo ri mij ej bed ie rej kakobaba in manit eo ilo jukjuk in bed eo im mour in Christian. Ñan wanjoñok, ibwiljin elõñ Catholic ro im Protestant ro ilo West Africa, ej juõn manit ñan kalibubu class ko ñe juõn ej mij bwe ejelok juõn en maroñ reilok ñan class eo im lo jitõb eo an ri mij eo.

Emol, elõñ ukoktak in uak ko armij rej lilok ñan kajitõk in, ‘Ta eo ej walok ñan kij ñe jej mij?’ Ak, juõn bedbed in lemnak in kin uak ko reoktak jen don ej: Juõn men eo iloan juõn armij bwe eban mij im ej ellã jen mij. Jet armij rej tõmak bwe “juõn men” ej juõn jitõb. Ñan wanjoñok, ilo mõttan ko ilo Africa im Asia im odãn bwil kein ilo Pacific einwõt Polynesia, Melanesia, im Micronesia, elõñ rej tõmak bwe juõn jitõb​​—⁠jab juõn an​​—⁠ejjab mij. Ilo mol, ilo jet kajin ejelok nan in “an.”

Ewõr ke juõn jitõb ilo juõn armij eo emour? Jitõb in ej lukkun diojlok ke jen enbwin eo ilo mij? Elañe eindein, ta eo ej walok ñan jitõb eo? Im ta kejatdikdik eo ewõr ñan eo emij? Kajitõk kein jej aikwij jab kajekdoni. Jabdewõt bedbedin manit ak kabuñ ilo jukjuk im bed eo am, mij ej juõn mol eo emol jej aikwij jelmae. Kin menin, menin konono kein rej jelet yuk ilo juõn wãwen eo emũlal. Kimij rejañ yuk bwe kwon lale im etale wãwen in.