Ri Kokkure Wijki Ko
ILO ien ko an Bible, wijki ko rar watõki einwõt men ko ewõr aorõkiir. Ñan wanjoñok, ke Abraham ear wiaik juõn jikin kallip ñan lio belen jitenburu, Sarah, wijki ko rar kilajrake ilo kwon eo ñan lelok jikin eo.—Jenesis 23:15-18.
Eindein rainin, wijki ko elap aorõkiir, im ibelakin lal in elap lale ñan kejbãrok bukin wijki ko. Book eo State of the World 1998 ej ba: “Meñe elõñ armij ro ilo ailiñ ko itueañ rej kalimjek bukin wijki ko im lemnak kaki, remaroñ jab jelã bwe bukin wijki ko ilo ailiñ ko air ekanuij in bidodo ñan air jorrãn ian aolep kain wijki rot kan.” Ta eo ej kõmman kauwatata ñan kemour eo an bukin wijki kein ilo ailiñ in Europe ko itueañ im North America? Elõñ armij rej jitõñlok ñan jorrãn eo an bukin wijki ko, ak ebar wõr men ko jet rej kokkure wijki ko, juõn wijki ilo juõn ien, einwõt ilo nan in kõkkar. Ak ta kein? Etton in mejatoto im acid rain, den eo etton ej wõtlok laltak. Etton kein remaroñ jidik kin jidik kamõjnoik wijki ko, kõmman bwe en bidodo air jorrãn jen kij ko im nañinmij.
Iumin ñoul yiõ ko, ri katak ro kin men ko ibelakid im armij ro jet rar kwalok air nan in kakkõl kin aikwij eo ñan kejbãrok jikin menin mour ko rej tõbalbal im keinikkan ko an lal in. Ilo 1980 ko, elikin an scientist ro ilo Germany katak kin men ko etton in mejatoto eo ej jeleti im dennin acid eo ej wõtlok ion men ko ibelakid, rar kwalok jemlok eo: ‘Elañe ejelok jabdewõt men rej kõmman, ilo yiõ eo 2000, armij renaj maroñ aluije bukin wijki ko wõt ilo pija im movie ko.’ Ekamõnõnõ, bwe kajur eo an lalin in ej make kakajur e bwe tok ñan ien in kin an kajur bukin wijki ko rej jutak wõt ke elap kar kanan kaki kin jorrãn.
Ak ilo juõn tõre eo eaetok, ej Anij eo elap wõt ijo enaj kõmmane ñan kejbãrok bed eo an menin mour ko rej tõbalbal im keinikkan ko ibelakid. “Ej kaemololo tol ko jen mojabeo An” im “kadreklok ujoij ñõn kiru ko, im mar ko im jibõñ armij.” Im ear kallimur ñan “kokkure ro rej kokkure lõl.” (Sam 104:13, 14; Reveles̃õn 11:18) Enaj menin bwilõñ ñe armij in lal in renaj maroñ lañliñ ñan indio kin juõn lal eo eanemkwoj jen etton!—Sam 37:9-11.