Abañ Ko ñan Katakin Ajiri Rainin
ILO jotenin ran eo, juõn armij an juõn imõn mõñã eo ear bojak in kil imõn mõñã eo ñan an etal ñan jikin jokwe eo an. Inem ruo kõrã im juõn ajiri rar deloñ ilo imõn mõñã eo im wia mõñã ko kijiir. Kinke ear mõk, leo an imõn mõñã eo ear kõnan jiroñ ir bwe emwij an kilek, ak ear beek in keboje mõñã ko kijiir. Ke kõrã ro ruo rar bwebwenato im mõñã, ajiri eo ear etõrto etõrtak ilo mõn mõñã eo, kowõtlok cookie ko kijen ilal, im juri. Jen air debij e, jinen ajiri eo ej ettõñdikdik wõt. Ke rar etal jen mweo, leo an imõn mõñã eo meñe emõk ear aikwij karreoik menoknok ko ajiri eo ear kõmmane ilo mweo.
Einwõt emwij am jelã kake, wãwen in emol ej kalikar bwe ibben elõñ family ko, rejjab katakin ajiri ilo wãwen eo ebolemen. Elõñ un ko kin abañ in. Jet jemen im jinen rej kõtlok wõt ajiri ro nejiir bwe ren kõmmani men ko rej kõnan, kinke rej lemnak bwe rej aikwij rittolok ilo jitõbõn anemkwoj. Ak kinke relukkun boub, jemen im jinen ajiri ro remaroñ jab bõk ien ñan lukkun lale aikwij ko air im katakin ir ilo bolemen. Jet jemen im jinen rej watõk bwe katak ko ilo school rej men ko raorõktata, inem rej kõtlok ajiri ro bwe ren anemkwoj toan wõt air lo tõbrak ilo katak ko air ilo school im wõnmanlok im bed ilo juõn college ebuñbuñ.
Ak, jet armij rej ba bwe jemen im jinen ajiri ro im armij ro jet rej aikwij ukõt kien ko air rej lemnak raorõk kin mwilin armij. Rej ba bwe ajiri ro rej bõk kunair ilo elõñ wãwen kowadoñ ko im kõtõrãi kien ilo school ej laplok wõt jen ran ñan ran. Kin men in, juõn ri tel an juõn middle school ilo Seoul, Republic in Korea, ear kalikar bwe katakin ajiri ro ñan kakõmanmanlok kadkadiir en men in aikwij eo moktata. Ear ba: “Elikin am kaddek juõn kadkad emõn inem kwomaroñ lelok jelãlokjen im katakin ir.”
Elõñ jemen im jinen ajiri ro me rekõnan bwe ajiri ro nejiir ren bed ilo college im lo tõbrak ilo mour im kajekdon nan in kakkõl ko. Elañe kwe juõn jemen ak jinen, kain armij rot eo kwokõnan bwe ajiri eo nejõm en einwõt? Kwokõnan ke bwe ajiri eo nejõm en rittolok im melele kin ta in mour erreo im bõk eddo? Kwokõnan ke bwe en erom juõn armij ejoij, eo ejelã ukoktak, emõn an lemnak im ewõr jitõbõn jibañ ilo mõnõnõ ibben? Elañe eindein, joij im etale katak eo tok ilal.