Wõn eo Enaj Najidik Lal in?

EKKAR ñan watwat ko jen World Food Programme, juõn dolul an United Nations ñan kamadmõd abañ eo kin kwuli, ear ba bwe 800 million armij ro​—elõñ iair rej ajiri⁠—rej bed ebake ien kwuli. Jejjo ran ko remotlok, dolul in ear ba bwe men ko im wãwen ko elõñ ailiñ ko rar maroñ kajerbali ñan namejelan abañ in rar bõki im kajerbali ñan namejelan abañ ko jet, einwõt terrorism. Nañinmij ko rejeded ak relõñlok rej kalaplok abañ in. Report eo an dolul in etan Global School Feeding Report ear ba kin ailiñ ko ilo Africa me robrak kin nañinmij in AIDS ie: “Juõn ebeben in jemen im jinen ajiri ro rar mij kin AIDS. Ekkã an walok bwe ajiri ro nejiir rejojolããr rar aikwij kabwe aikwij ko air make, im elõñ iair rejaje kilen kallip im wãwen ko rekabel ñan kabwe aikwij ko air jen ran ñan ran bwe rekin katakin armij ro jet kaki jen ebeben ñan ebeben.”

The World Food Programme ej kowõnmanlok jibadbad eo ñan najidik ajiri ro juõn alen ilo juõn ran ilo school ko. Lemnak eo ejjab ñan kadiklok abañ in kwuli wõt ak ñan jinoe program ko jet ñan air keini katak kin kilen kabõjrak nañinmij in HIV/AIDS ibwiljin ajiri ro.

Ilo jikin ko rar jinoe program kein, ajiri ro rar jino bõk mõñã ko reuñ kipdeir, katakin ir kin kejbãrok erreo ilo enbwiniir, im jibañ ko jet. Emwij bar lo bwe ilo jikin ko rar ukõt wãwen an armij ro mour ie, nañinmij in HIV/AIDS ear diklok.

Ekaburomõjmõj, bwe ilo jemlokin meñe ear lap air kate ir ñan kamadmõd abañ kein tõbrak ko kar jidik wõt im jab jejjet. Ak Bible eo ej kwalok juõn kallimur kin juõn mejelan enaj kamadmõde abañ eo kin kwuli ñan indio. “E naj ‘lõñ korn ilo ene,” Sam 72:16 ej ba. Iumin Ailiñ eo an Anij, armij ro renaj ba ñan Jehovah Anij: “Kwoj lotok lõl in im kaimlolo e, Kwo kanuij kamorur e . . . Kwoj lelok ñõn ir korn, ñe ein drein Am kapojõk ene.”​—Sam 65:9.

[Etan eo ear kõmman pija ilo peij 32]

WFP/Y. Yuge