“Rej Kalle Wõt Meñe Elap Air Kenato”

ILO ailiñ ko ibelakin Lomalo Mediterranean elõñ armij ro rej kaddek wijki in date palm ko iturin moko imwiir. Wijki kein rebuñbuñ kin air aibujuij im kin an enno leiir. Bareinwõt, rej eddek im kajurlok iumin elõñlok jen jibuki yiõ ko.

King Solomon in etto eo ilo Israel ear kwalok ilo nan in kõkkar kin aibujuij eo an ledik in Shulem eo einwõt juõn wijki palm. (Al eo an Solomon 7:⁠7) Book eo Plants of the Bible (Menin Eddek ko Rej Konono Kake ilo Bible) ej ba: “Nan eo ilo kajin Hebrew kin wijki in date palm ej ‘tàmâr.’ . . . Kar juõn nan me Ri Jew ro rar kajerbale ñan kõkkar kin aibujuij im kãilar im ekkã air lelok ãt in ñan kõrã ro.” Ñan wanjoñok, ledik eo jatin Solomon me e deeo kar naetan Tamar. (2 Samuel 13:⁠1) Jet jemen im jinen rej likit wõt ãt in ñan ledik ro nejiir.

Ejjab kõrã ro re deeo wõt ej keidi ñan juõn wijki palm. Ri jeje sam ear al: “Ro ri wãnik renaj eddrek im lõñlok einwõt ni palm; renaj eddrek einwõt wijki cedar ko ilo Lebanon. Rej einwõt wijki ko emwij kalbwini iturin imõn Iroij, ko rej kouwa ilo worwor in Temple an ad Anij; Rej kalle wõt meñe elab air kenato, im rewãmourur ien otemjej.”​​—Psalm 92:​12-​14.

Ilo nan in kõkkar, ro rej tiljek ilo air karejar ñan Anij meñe reritto ekkã air keidi ñan wijki palm eo eaibujuij. “Uõn in juõn armij ej belin aibujuij, elañe rej loe ilo ial in wãnik,” Bible eo ej ba. (Jabõn Kennan Ko 16:​31) Meñe kajur eo ilo kanniek emaroñ mõjnolok kin air rittolok, ro reritto remaroñ kõmman bwe en kajur wõt mour in jitõb eo air ikijen air keini ak niknik in katak Nan in Anij, Bible eo. (Sam 1:​1-3; Jeremiah 17:​7, 8) Kinke nan ko air rejoij im joñok ko air remõn, ritto ro retiljek rej men in rejañ ñan ro jet im rej jebar leen ko remõn iumin elõñ yiõ ko. (Taitõs 2:​2-5; Dri Hibru 13:​15, 16) Einlok wõt wijki date palm eo, ritto ro remaroñ kajur wõt ilo ien air ritto.