Wãwen Eo Ekabel Ñan Namejelan Juõn Abañ

JILU likao ro ilo Central Africa rar kõnan bed ilo juõn district convention ilo ijo jikiir. Ewi wãwen air maroñ etal ñan ijo? Kar enañin 60 mile etolok im ial eo ekar nana im bũñalñal im kar ejelok wair wa. Rar bebe ñan kajerbal jilu bicycle ak rar jab maroñ ellolo bicycle ko me remaroñ kar jibadõklok ijo rej kõtõbare.

Juõn elder ilo congregation eo air ear lo abañ eo air im ear mõnõnõ in lelok bicycle eo waan​​—meñe emor ak ekar emõn wõt ñan kajerbale. Ear bareinwõt kamelele kin ta eo rar kõmmane jemaan ke e im bar ro jet mõttan rar karõk ibben don ñan etal ñan juõn convention. Elder eo ear rejañ erjil bwe ren kajerbal juõn bicycle. Ebidodo namejelan abañ eo ak renaj kar aikwij juõn karõk emõn ñan kõmmane men in. Ak ewi wãwen an jilu armij kajerbal juõn bicycle ñan ito​-itak?

Ñan bõprae air kõjeje iumin al, lõmarein rar ion don ilo ien rantak im likit mweiuk ko air ion bicycle eo. Leo moktata ear bicycle lok iman, im brother ro ruo rej etetal ilo mõkaj im lor e. Elikin juõn mõttan jilu mile, brother eo ear bicycle ear bõjrak im katartare bicycle eo iturin juõn wijki. Ilo mol, ear likit bicycle eo ilo juõn jikin me brother ro ruo remaroñ kar loe im bwe en ejelok armij en kwote. Eo ear bicycle moktata ear wõnmanlok im etetal ilo ial eo.

Ke brother ro ruo rar tõbarlok bicycle eo, brother eo kein ka ruo ear bicycle lok iman im brother eo juõn ear wõnmanlok wõt im bar etetal juõn mõttan jilu mile mokta jen an naj bicycle tokelik. Inem kin airjil kate wõt im lor kain karõk in, lõmarein rar maroñ kadiklok aetokin mile eo ren kar etetal ie jen 60 mile ñan 40 mile ko. Rar bõk elap tokjen jen air kate ir. Rar mõnõnõ im bed ibben Ri Christian ro jeiir im jatiir ilo convention eo im bõk ekan ko lor jitõb. (Dut. 31:​12) Ilo yiõ in, kwonaj ke kõmmane joñan wõt am maroñ ñan bed ilo district convention eo enaj walok ilo ijo jikim?