“Al eo ilo Lomalo Eo” Buklemlem eo Ej Kakobaik Ruo Ien ko Etto
ILO Mei 22, 2007, ilo Alele eo an Israel ilo Jerusalem, rar kaluijuj kin juõn mõtõn buklemlem kar je ilo kajin Hibru enañin 1,400 yiõ ko remotlok. Ej juõn buklemlem kin jeje ko ilo Exodus 13:19–16:1. Jeje kein rej kitibuj men eo naetan “Al eo ilo Lomalo Eo,” al in anjo eo me dri Israel ro rar al kake iturin Lomalo eo Ekilmir elikin air kar bõk lomor ilo kabwilõñlõñ. Etke buklemlem in ear juõn menin kaluijuj?
Uak eo ej wawa ion tõre eo rar je buklemlem eo. Kar je buklemlem ko rar loi iturin Lomalo in Mij (Dead Sea) ikõtan ien kein 200 yiõ ko moktalok jen an kar Kraist lotak mae ran ko an dri jilik ro. Mokta jen air kar lo buklemlem eo kin “Al eo ilo Lomalo eo” enañin 60 yiõ ko remotlok, buklemlem eo wõt ear walok ilo kajin Hibru rar kajerbale kar Jeje ko jen jikin kwelok eo etan Aleppo (Aleppo Codex) im kar je enañin 900 yiõ ko remotlok. Ejelok bar jeje ilo kajin Hibru rar bar loi iomin buki yiõ ko ijellokin mõtõn ko jet rar loi.
Jemes S. Snyder, eo ej lolorjake Alele eo an Israel ej ba, “Buklemlem in kin Al eo ilo Lomalo Eo ej kakobaik ruo ien ko etto ikõtan Buklemlem ko jen Lomalo in Mij . . . im Jeje ko jen Aleppo.” Ekkar ñõn lein, buklemlem in ekoba jeje in Baibel ko jet, rej letok juõn wanjoñok ejej uan kin wãwen air drebij wõt ukok eo mokta im jab ukote.”
Mõtõn nan ko ilo buklemlem eo ej mõtõn jeje ko rar loi enañin 2,000 yiõ ko remotlok ilo juõn imõn jar in etto ilo jikin kwelok in Cairo ilo Ijipt. Bõtab, juõn armij eo ej aini im kakoni jeje ko ilo kajin Hibru ear jab jela kin aurõkin men kein mae ien eo ear konono iben juõn dri meletlet ilo tu jemlokõn yiõ ko ilo 1970. Rar etale buklemlem eo ñõn lale ewi toõn an ber im kakone mae ien eo rar kaluijuj kake ilo Alele eo an Israel.
Adolfo Roitman, eo ej jeban Alele eo an Israel etan Shrine of the Book im ej bõk erron lale Buklemlem ko jen Lomalo in Mij, ej ba: “Buklemlem in kin Al eo ilo Lomalo Eo ej kwalok joñõn tiljek in air kar kejbãrok jeje ko ilo Baibel iomin elõñ buki yiõ ko. Ekabwilõñlõñ bwe wãwen air kar je Al eo ilo Lomalo Eo 600 lok ñõn 700 yiõ ko remotlok ej jejit wõt ñõn ran kein.”
Baibel eo ej kakõrmol in Anij, im Jeova eo ej bõk erron ñõn kejbãroke. Bareinwõt ro rar anõk wãwen air kar je Baibel eo ear tiljek air kõmõne. Kin men in, jemaroñ liki bwe aolep nan ko ilo Baibel eo remol.
[Pija an eo ear kommane ilo peij 32]
Jen Alele eo an Israel ilo Jerusalem