KAJJITÕK KO BAIBÕL̦ EJ UWAAKI

Enaaj ke wõr juon wõt kien me enaaj tõl aolepen lal̦ in?

Baj l̦õmn̦ake m̦õk tokjãn ko renaaj wal̦o̦k ñe ewõr juon wõt kien enaaj tõl aolepen lal̦ in. Rainin, elõñ armej rej eñtaan kõn aer jeram̦õl, ak ro jet relukkuun m̦weiie. Bõtab, ñe ewõr juon kien ej tõl aolepen lal̦ in im eo ej tõl ie ejel̦ã im mel̦el̦e kõn aikuj ko an armej, mel̦el̦ein bwe ejjel̦o̦k bar juon armej enaaj pãd ilo aikuj. Kwõl̦ak lale armej ro remaroñ ke kajutak juon kien rot in?​—Riit Jeremaia 10:23.

Jãn iien ko etto ñan kiiõ in an kien ko ilo lal̦ in likjab ilo aer jipañ armej ro dooer, el̦aptata ro rejeram̦õl. Im ewõr jet kien ko me elukkuun nana im lãj aer kõm̦m̦an ñan armej ro. (Ekklisiastis 4:1, UBS; 8:9) Bõtab, Anij eo Ekajoor Bõtata ej kallim̦ur bwe enaaj bõktok juon kien ñan bõk jikin aolep kien ko ilo lal̦ in. Im eo enaaj tõl ilo Kien in enaaj jipañ im kabwe aikuj ko an aolep armej ro.​—Riit Aiseia 11:4; Daniel 2:44.

Ta ko Aelõñ ak kien eo an Anij enaaj katõpraki?

Jeova Anij ear kããlõt juon Rũtõl em̦m̦an ñan an naaj tõl aolepen lal̦ in. Rũtõl in ej Jijej, eo im ej Nejin Anij. (Luk 1:31-33) Ke Jijej ear pãd ioon lal̦ in, ear m̦õn̦õn̦õ in jipañ armej. Ilo iien eo enaaj Kiiñ im tõl lal̦ in, enaaj kõm̦m̦an bwe aolep armej ro jãn aelõñ otemjej ren bõrokuk, im enaaj bareinwõt kõm̦m̦an bwe en jako an armej ro eñtaan.​—Riit Sam 72:8, 12-14.

Aolep armej renaaj ke kile Jijej ak watõke bwe ej juon Rũtõl? Jaab. Bõtab, Jeova el̦ap an meanwõd. (2 Piter 3:9) Ej letok iien ñan an armej ro kile Jijej ak watõke bwe ej juon Rũtõl. M̦õttan jidik Jijej enaaj jol̦o̦k aolep armej ro renana, im kõm̦m̦an bwe en wõr aenõm̦m̦an im jokwane ilo aolepen lal̦ in.​—Riit Maika 4:3, 4.