KÕJATDIKDIK EO ÑAN RO REMEJ Etke Kwõmaroñ Tõmak bwe Em̦ool Kõjatdikdik In?

Ebõd ke ñan l̦õmn̦ak bwe ro remej renaaj bar mour? Rijjilõk Paul ear jab ba bwe ebõd l̦õmn̦ak in. Ear je im ba: “El̦aññe ad kõjatdikdik ilo Kũraij ej jem̦l̦o̦k wõt ilo mour in, innem enaaj l̦apl̦o̦k ad bũrom̦õj jãn armej otemjej. Ak m̦ool eo in, bwe Kũraij ear jerkakpeje jãn mej, im men in ej kein kam̦ool bwe ro rej kiki ilo mej, renaaj bareinwõt jerkakpeje.” (1 Korint 15:19, 20, UBS) Paul ear lukkuun tõmak bwe ro remej renaaj bar mour. Im jerkakpeje eo an Jijej ear kam̦oole men in.​—Jerbal 17:31, UBS.

Ebar wõr juon un unin am̦ maroñ tõmak ilo kõjatdikdik in bwe ro remej renaaj bar mour. Jeova ej juon Anij in m̦ool. Baibõl̦ ej ba: “Anij Eban riab.” (Taitõs 1:2) Jeova ejjañin riab, im ejãmin riab. Emaroñ ke kar kallim̦ur kõn kõjatdikdik in im kam̦ool bwe emaroñ kõmour ro remej, bõtab tokãlik ejab kajejjet kallim̦ur in an? Jeova ejãmin ãindein!

Etke Jeova ear karõk bwe juon iien ro remej ren bar mour? Kõnke el̦ap an yokwe kõj. Job ear kajjitõk im ba: “El̦aññe juon armej emej, enaaj bar mour ke?” Im ear wõnm̦aanl̦o̦k im ba: “Kwõnaaj kũr, innem inaaj uwaak Eok; Kwõnaaj kõn̦aan menin kõm̦m̦an an Peim̦.” (Job 14:14, 15) Job ear lukkuun tõmak bwe Jeova, eo el̦ap yokwe ippãn enaaj lukkuun kõn̦aan bar kõmouri e jãn mej. Anij eoktak ke kiiõ? Baibõl̦ ej ba: “Ña, Jeova, Ijjab oktak.” (Malakai 3:6) Anij elukkuun kõn̦aan lo an ro remej bar mour. Ekõn̦aan lo aer mour im m̦õn̦õn̦õ im em̦m̦an ãjmour ko aer. Eñin bar kõn̦aan eo an juon jemãn im jinen ajri ñan ajri eo nejier me emej. Men eo eoktak ej bwe Anij wõt ewõr an maroñ ñan kõm̦m̦ane jabdewõt men ekõn̦aan.​—Sam 135:6.

Jeova enaaj kamaroñ Nejin bwe en kõmour ro remej. Enaaj juon iien ekalañlõñ ñan ro rar bũrom̦õj kõn ro rejitõnbõro ippãer me rar mej. Ak ta naaj l̦õmn̦ak eo an Jijej kõn an ro remej bar mour? M̦okta jãn an kar Jijej kõmour Lazerõs jãn mej, Jijej ear lo joñan an kar kõrã ro jein Lazerõs im ro m̦õttan bũrom̦õj. Kõn men in, Jijej ear “jañ.” (Jon 11:35) Bar juon iien, Jijej ear iioone juon kõrã in Nein me ej kab mej l̦adik eo ej make wõt nejin. Kõn an kar Jijej tũriam̦okake kõrã in ear ba ñane, “Kwõn jab jañ.” Innem, ear m̦õkaj im kõmouri l̦adik eo nejin. (Luk 7:13) Jijej elukkuun bũrom̦õj ñe armej ro rej bũrom̦õj im ebar bũrom̦õj kõn ro remej. Jijej enaaj lukkuun m̦õn̦õn̦õ ilo iien eo ñe enaaj jako an armej ro ilo lal̦ in bũrom̦õj!

Em̦õj ke an mej juon eo ejitõnbõro ippam̦ im kwõlukkuun bũrom̦õj kake? Kwõmaroñ l̦õmn̦ak bwe mej ej juon apañ me eban jako. Bõtab ilo m̦ool, enaaj jako. Anij enaaj kejerkak armej ro jãn mej ilo an kõjerbal Nejin ñan kõm̦m̦ane men in. Keememej bwe Anij ekõn̦aan bwe kwõn lo an jejjet kũtien kallim̦ur in an. Ekõn̦aan bwe kwõn pãd ilo iien en̦ bwe kwõn bar iioone im atbo̦kwõje ro rejitõnbõro ippam̦. Pijaikl̦o̦k m̦õk amiro eo ejitõnbõro ippam̦ jim̦or mour ñan indeeo. Kwõban bar aikuj bũrom̦õj kõn an naaj jako ak mej!

Lionel, eo me jaar kwal̦o̦k kake m̦oktal̦o̦k, ej ba: “Ejjabto tokãlik, ikar katak bwe juon iien ro remej renaaj bar mour. Ilo jinoin, ekar pen aõ tõmake men in, im ikar jab lõke armej eo ear jiroñtok ña kake. Bõtab, ikar etale men in ilo Baibõl̦ ñan kam̦oole, im ikar lo bwe em̦ool! Kiiõ, ilukkuun kijooror in bar lo jim̦m̦a.”

Kokõn̦aan ke kal̦apl̦o̦k am̦ mel̦el̦e kõn kõjatdikdik in? Ri Kõnnaan ro an Jeova renaaj lukkuun m̦õn̦õn̦õ in kwal̦o̦k waj ñan kwe jãn Baibõl̦ eo am̦ make etke rej tõmak bwe juon iien ro remej renaaj bar mour.a—Lale kõmel̦el̦e eo itulal̦.