Unin an Baibõl̦ Pãdwõt ñan Rainin

Meñe Baibõl̦ eo emaroñ kar jako, ak ej pãdwõt ñan rainin. Tokjãn men in, jemaroñ ebbõk ad kaape im riiti. Ñe kwõj kããlõt juon ukokin Baibõl̦ em̦m̦an, kwõmaroñ lõke naan ko ie im tõmak bwe elukkuun jejjet ñan Jeje ko jinointata.a (Lale kõmel̦el̦e eo itulal̦.) Bõtab, etke Baibõl̦ ear maroñ pãdwõt ñan rainin meñe kar jei ilo peba ko rar m̦õkaj aer m̦or im jako, im meñe elõñ rar kajjioñ jol̦o̦ke im ukote kobban? Etke elõñ bwebwenato ko rekabwilõñlõñ kõn wãween an kar maroñ pãdwõt ñan rainin? Im etke Baibõl̦ ej juon bok ejejuwaan?

Elõñ ro rej katak Baibõl̦ rej errã ilo naan kein an rijjilõk Paul, eo ear je im ba: “Jeje ko otemjej em̦õj letok kõn kakũrm̦ool an Anij.” (2 Timote 3:16) Rej tõmak bwe unin an Baibõl̦ pãdwõt ñan rainin ej kõnke ej Naanin Anij im Anij eo ear kõjparoke ñan rainin. Faizal, eo kar kwal̦o̦k kake ilo katak eo jinointata ilo bok in, ear tokãlik pepe in katak Baibõl̦ ñan lale ñe em̦ool men kein armej ro rej ba kõn Baibõl̦ eo. Ear lukkuun bwilõñ kõn men ko ear katak im jel̦ã. Ear katak im lo bwe elõñ iaan katak ko an kabuñ ko reriab rejjab itok jãn Baibõl̦. Bareinwõt, ke ear katak ilo Baibõl̦ kõn kõn̦aan eo an Anij kõn lal̦ in, men in ear kõm̦akũt bũruon.

Faizal ej ba, “El̦ap aõ kiiõ tõmak bwe Baibõl̦ ej juon menin letok jãn Anij. Unin aõ ba men in ej kõnke el̦aññe Anij ear maroñ kõm̦anm̦an lañ im lal̦, ealikkar bwe enaaj kar wõr an maroñ ñan letok ñan kõj juon bok im kõjparoke bwe en pãdwõt ñan rainin. Ñe jejjab tõmak men in, ej ãinwõt ñe jej ba bwe edik joñan kajoor im maroñ eo ippãn Anij, eo Ekajoor Bõtata! Innem, wõn ña bwe in ba bwe edik joñan kajoor im maroñ eo an Anij?”​—Aiseia 40:8, UBS.