BAIBÕL̦ EO EJ UKOT MOUR KO
M̦okta jãn aõ lukkuun oktak, elõñ alen aõ likjab im kõm̦m̦ani bõd ko iar kõm̦m̦ani m̦okta
IIÕ IN L̦OTAK: 1953
AELÕÑ: AUJTÕRÕLIA
MOUR EO AN M̦OKTA: EKÕN ALWÕJI PIJA KO RENANA
MOUR EO AÕ M̦OKTA:
Ilo 1949 eo, jema ear em̦m̦akũt jãn Jãmne ñan Aujtõrõlia. Ear em̦m̦akũttok bwe en kappok an jerbal ilo jikin jerbal ko rej kappok dekã ko raorõk im ilo jikin kõm̦m̦an jarom ko. Ear jokwe ilo juon bukwõn etan Victoria, me ettol̦o̦k jãn bukwõn ko elõñ armej ie. Ilo ijin, jema ear m̦areik jinõ, im iar l̦otak ilo 1953 eo.
Jet iiõ ko tokãlik, jinõ ear jino katak Baibõl̦ ippãn Ri Kõnnaan ro an Jeova. Kõn men in, katak ko jãn Baibõl̦ rej jet iaan men ko ij keememeji jãn ke iar dik. Bõtab, jema ear dike aolep kabuñ. Ear jino lãj im nana an kõm̦m̦an ñan jinõ, im jinõ ear lukkuun mijake. Bõtab, ear wõnm̦aanl̦o̦k wõt im kũttiliek an katak Baibõl̦ im ear jino kaorõk men ko ear katak kaki. Ñe jema ej jako jãn m̦weo, ej kwal̦o̦k ta ko ear katak ñan kõm̦ro ledik eo jatũ. Ear kwal̦o̦k ñan kõm̦ro kõn an lal̦ in naaj erom juon pedetaij ilju im jekl̦aj im ad naaj lo m̦õn̦õn̦õ el̦aññe jej l̦oore kien ko ilo Baibõl̦ kõn wãween kõm̦m̦an ko ad.—Sam 37:10, 29; Aiseia 48:17.
Ke ear 18 aõ iiõ, iar aikuj em̦m̦akũt jãn m̦weo kõn an kar jema lãj. Meñe iar tõmak men ko jinõ ear katakin eõ kaki jãn Baibõl̦, ak iar jab kile joñan aer aorõk. Kõn men in, iar jab mour ekkar ñan men kein iar katak. Iar jino jerbal ãinwõt juon rũkõm̦m̦an jarom ilo jikin kõm̦m̦an mãlle ko. Ke ear 20 aõ iiõ, iar m̦are. Ledik eo erũttotata nejũm̦ro ear l̦otak 3 iiõ tokãlik, im iar bar jino l̦õmn̦ak kõn ta eo eaorõktata ilo mour e aõ. Kõnke iar jel̦ã bwe Baibõl̦ eo emaroñ jipañ baam̦le eo aõ, iar jino katak Baibõl̦ ippãn juon iaan Ri Kõnnaan ro an Jeova. Bõtab, lio ippa ear lukkuun dike Ri Kõnnaan ro an Jeova. Ãlikin aõ kar pãd ilo juon iaan kweilo̦k ko aer, ear ba bwe el̦aññe ijjab bõjrak jãn aõ katak Baibõl̦, inaaj aikuj etal jãn baam̦le eo. Kõnke iar jab lukkuun peran ilo iien eo, iar l̦oore kõn̦aan eo an im bõjrak jãn aõ katak. Tokãlik, iar ajl̦o̦k kõn aõ kar jab kate eõ ñan kõm̦m̦ane men eo iar jel̦ã bwe ejim̦we.
Juon raan, rijerbal ro m̦õtta rar kaalwõje eõ pija ko renana. Iar lukkuun eppal̦ kaki, bõtab m̦anit ko armej ro rar kõm̦m̦ani ilo pija kein rar lukkuun nana im kajjõjõ. Ear lukkuun nana aõ mour kõn aõ alwõji. Kõn aõ keememej wõt men ko iar katak jãn Baibõl̦, iar lukkuun tõmak bwe Anij enaaj kajeik eõ. Bõtab, jidik kõn jidik el̦ak l̦apl̦o̦k aõ loi im alwõji pija kein, ear jino oktak l̦õmn̦ak eo aõ kaki. Tokãlik, iar alwõji pija kein aolep iien im iar jaje bõjrak.
Ium̦win 20 iiõ ko tokãlik, ear etal im jakol̦o̦k aõ l̦oori men ko jinõ ear katakin eõ kaki. Men ko iar alwõji, rar kiiõ alikkar ilo kõm̦m̦an ko aõ. Ear lukkuun nana kobban lo̦ñiũ im ettoon kõm̦m̦an kõjak ko aõ. Ear lukkuun bõd im nana wãween l̦õmn̦ak eo aõ kõn an ruo armej pãd ippãn doon. Meñe iar mour wõt ippãn lio ippa, ak iar ellolo jãne. Ejako aõ kar l̦õmn̦ak bwe ewõr tokja kõnke iar lukkuun dike ña make im jõjõik m̦anit ko iar kõm̦m̦ani.
Ear rup pãd eo am̦ro, im el̦ap aõ kar iioon jorrããn im apañ ilo mour e aõ. Iar jar ñan Jeova kõn aolepen bũruõ. Innem, iar bar jino katak Baibõl̦, meñe em̦õj an kar mootl̦o̦k 20 iiõ jãn iien eo iar bõjrak. Ilo iien in, jema em̦õj an jako, im em̦õj an kar jinõ peptaij im erom juon iaan Ri Kõnnaan ro an Jeova.
WÃWEEN AN KAR BAIBÕL̦ EO UKOT MOUR EO AÕ:
Ear lukkuun oktak men ko iar kõm̦m̦ani ilo mour eo aõ jãn ta ko Baibõl̦ ej ba. Bõtab ilo iien in, em̦õj aõ kar peek ilo bũruõ bwe inaaj kate wõt eõ ñan kõm̦m̦an bwe in lo aenõm̦m̦an eo me Baibõl̦ ej kallim̦ur kake. Iar kate eõ bwe en bõjrak aõ kwal̦o̦k naan ko renana im ñan jel̦ã dãpij aõ illu. Iar bareinwõt pepe bwe inaaj bõjrak jãn aõ kõm̦m̦ani m̦anit ko rettoon, kããm̦bõl̦, kadek, im ko̦o̦t jãn bo̦o̦j eo aõ.
Rijerbal ro ilo jikin jerbal eo aõ rar jab mel̦el̦e etke iar kõn̦aan kõm̦m̦ani oktak kein rel̦l̦ap. Ium̦win jilu iiõ, rekõn kajjioñ kapoik eõ bwe in bar kõm̦m̦ani men ko renana ikõn kõm̦m̦ani. Ñe ij likjab im kõm̦m̦ane juon men ebõd, ãinwõt kanijnij ak kwal̦o̦k aõ illu, ekkã aer m̦õn̦õn̦õ im ba bwe ibar ro̦o̦l im ãinwõt m̦okta. Ñe rej ba men in, el̦ap aõ bũrom̦õj! Ekkã aõ inepata im l̦õmn̦ak bwe ejjel̦o̦k tokjãn aõ kate eõ.
Jikin jerbal eo aõ ear obrak kõn pija ko renana. Jet pija rar bũriini im jet rej wal̦o̦k ilo kampiutõr im kein alwõj ko. Aolep iien rijerbal ro rej jilkinto jilkintak pija nana ko ñan doon ilo kampiutõr ko, ãinwõt aõ kõn kõm̦m̦ane m̦okta. Meñe iar kajjioñ in jol̦o̦k aõ kõn̦aan lali im alwõji pija kein, ak rar wõnm̦aanl̦o̦k wõt im kajjioñ kõm̦m̦an bwe in jino bar alwõji. Kõn men in, iar kajjitõk jipañ im naanin rõjañ jãn armej eo iar katak Baibõl̦ ippãn. Ear lukkuun roñjake ña ke iar kwal̦o̦k aolepen bũruõ ñane. Innem, ear kwal̦o̦k ta eo imaroñ kõm̦m̦ane kõn m̦õjn̦o̦ eo aõ ilo an kar kwal̦o̦ktok jet eoon ko jãn Baibõl̦, im ear rõjañ eõ bwe in niknik ilo aõ jar im kajjitõk jipañ ippãn Jeova.—Sam 119:37.
Juon raan iar ko̦kweilo̦k rijerbal ro m̦õtta. Ke rar pãd, iar jiroñ er bwe ren lel̦o̦k pia ñan ruo iaan em̦m̦aan ro el̦ap aer arkool̦. Rar kal̦ap ainikieer im ba: “Taunin am̦ ba bwe kõmin lel̦o̦k limeer! Erro ej kate erro ñan jol̦o̦k aerro kõkadekdek!” Innem, iar ba: “Ijel̦ã, ejjel̦o̦k oktak jãn ña.” Jãn iien eo m̦aanl̦o̦k, rar kile bwe iar kate eõ ñan jol̦o̦k aõ kõn̦aan alwõji pija ko renana im ejako aer kajjioñ kapoik eõ bwe in ro̦o̦l ñan kõm̦m̦an ko aõ kar m̦okta.
Tokãlik, iar maroñ anjo̦ ioon m̦õjn̦o̦ eo aõ kõn an kar Jeova l̦ap an jipañ eõ. Ilo 1999 eo, iar peptaij im erom juon iaan Ri Kõnnaan ro an Jeova, im el̦ap aõ kam̦m̦oolol kõnke mour e aõ erreo im el̦ap aõ m̦õn̦õn̦õ.
Imel̦el̦e kiiõ etke Jeova ej diki men ko iar itoklimo in kõm̦m̦ani ilo mour e aõ. Ej ãinwõt juon Jemãd me el̦ap an yokwe kõj, im ear kõn̦aan kõjparok ña jãn men ko renana rej wal̦o̦k itok jãn an juon alwõji pija ko renana. Elukkuun m̦ool naan kein ilo Jabõn Kõnnaan 3:5, 6 me rej ba: “Kwõn lõke Jeova kõn aolepen bũruom̦, im kwõn jab atartar ioon jel̦ãl̦o̦kjen̦ eo am̦. Kwõn kwal̦o̦k E ilo ial̦ ko am̦ otemjel̦o̦k, innem Enaaj ba kajjien ial̦ ko am̦.” Naanin tõl ko ilo Baibõl̦ rar jab baj kõjparok wõt eõ ak rar bareinwõt kõm̦m̦an bwe in lo elõñ men ko rem̦m̦an ilo mour e aõ.—Sam 1:1-3.
WÃWEEN AÕ KAR BÕK TOKJÃN:
Ilo kar m̦okta, iar dike ña make im jõjõik m̦anit ko iar kõm̦m̦ani, ak kiiõ el̦ap aõ aenõm̦m̦an im ij kile bwe ewõr tokja. Bareinwõt, erreo mour e aõ im ij kile bwe Jeova ear jol̦o̦k aõ bõd im ej m̦õn̦õn̦õ in jipañ eõ. Ilo 2000 eo, iar m̦areik Karolin, juon kõrã edeo̦ me ej yokwe Jeova ãinwõt bar ña. El̦ap aenõm̦m̦an ilo m̦weo im̦õm̦ro. Kõm̦ro ej lukkuun kam̦m̦oolol bwe kõm̦ro ej uwaan juon doulul me aolep ro uwaan ilo pel̦aakin lal̦ in rej yokwe doon im erreo mour ko aer.